ന്യൂഡല്‍ഹി: പതിവ് തെറ്റിച്ചില്ല, രാജ്യത്ത് ഇന്നും ഇന്ധന വില വര്‍ധിപ്പിച്ചു. തുടര്‍ച്ചയായ അഞ്ചാം ദിവസമാണ് പെട്രോള്‍, ഡീസല്‍ വിലയില്‍ വര്‍ധനവുണ്ടായത്. അന്താരാഷ്ട്ര എണ്ണവിലയിലുണ്ടായ അനിയന്ത്രിതമായ വര്‍ധനയെ തുടര്‍ന്നാണ് ഇന്നലെ വിലക്കയറ്റമെന്ന പതിവ് പല്ലവി ഇന്നും അധികൃതര്‍ പറഞ്ഞിട്ടുണ്ട്. ഇതോടെ എക്കാലത്തേയും ഉയര്‍ന്ന നിലയിലേക്കാണ് പെട്രോളും ഡീസലുമെത്തിയത്.
സര്‍ക്കാര്‍ ഉടമസ്ഥതയിലുള്ള ഇന്ധന ചില്ലറ വ്യാപാരികളുടെ വില വിജ്ഞാപനം അനുസരിച്ച് പെട്രോള്‍, ഡീസല്‍ വില ലിറ്ററിന് 35 പൈസ വീതമാണ് വര്‍ധിപ്പിച്ചത്.
ഡല്‍ഹിയില്‍ പെട്രോള്‍ ലിറ്ററിന് 109.34 രൂപയും മുംബൈയില്‍ 115.15 രൂപയുമാണ്. ഡീസലിന് ഇപ്പോള്‍ ഡല്‍ഹിയില്‍ ലിറ്ററിന് 98.07 രൂപയും മുംബൈയില്‍ 106.23 രൂപയുമായി.
കൊല്‍ക്കത്തയില്‍ പെട്രോളിനും ഡീസലിനും യഥാക്രമം 109.79, 101.19, ചെന്നൈയില്‍ 106.04, 102.25 എന്നിങ്ങനെയാണ് വില.
ബെംഗളൂരുവില്‍ പെട്രോള്‍ ലിറ്ററിന് 113.15 രൂപയ്ക്കും ഡീസല്‍ 104.09 രൂപയ്ക്കും ഹൈദരാബാദില്‍ ഒരു ലിറ്റര്‍ പെട്രോള്‍ 113.72 രൂപയ്ക്കും ഒരു ലിറ്റര്‍ ഡീസലിന് 106.98 രൂപയ്ക്കും ലഭ്യമാണ്.
രാജസ്ഥാനിലെ അതിര്‍ത്തി നഗരമായ ഗംഗാനഗറിലാണ് ഏറ്റവും ചെലവേറിയ ഇന്ധനം. അവിടെ പെട്രോള്‍ ലിറ്ററിന് 121.62 രൂപയും ഡീസല്‍ ലിറ്ററിന് 112.52 രൂപയുമാണ് വില.
മൂല്യവര്‍ധിത നികുതിയെ ആശ്രയിച്ച് പെട്രോള്‍, ഡീസല്‍ വില ഓരോ സംസ്ഥാനത്തിനും വ്യത്യസ്തമാണ്. അതിനിടെ, എണ്ണയുടെ വിതരണവും ആവശ്യവും സംബന്ധിച്ച വിഷയത്തില്‍ കേന്ദ്രസര്‍ക്കാര്‍ നിരവധി എണ്ണ കയറ്റുമതി രാജ്യങ്ങളുമായി ചര്‍ച്ച നടത്തുന്നുണ്ടെങ്കിലും വിലയില്‍ ഉടനടി ഇളവുണ്ടാകാന്‍ സാധ്യതയില്ല.
അന്താരാഷ്ട്ര എണ്ണവില ബാരലിന് 19 ഡോളറായി കുറയുമ്പോള്‍ ഉപഭോക്താക്കള്‍ക്ക് ലഭിക്കുന്ന നേട്ടം വര്‍ധിപ്പിക്കാന്‍ പെട്രോള്‍, ഡീസല്‍ എന്നിവയുടെ എക്‌സൈസ് തീരുവ സര്‍ക്കാര്‍ ഉയര്‍ത്തിയിരുന്നു. അന്താരാഷ്ട്ര വില 85 ഡോളറായി വീണ്ടെടുത്തപ്പോള്‍, എക്‌സൈസ് തീരുവ പെട്രോളിന് ലിറ്ററിന് 32.9 രൂപയും ഡീസലിന് 31.8 രൂപയുമായി തുടരുകയാണ്.
നേരത്തെ, പെട്രോളിയം പ്രകൃതിവാതക മന്ത്രാലയം പ്രധാന എണ്ണ ഉല്‍പ്പാദക രാജ്യങ്ങളിലേക്ക് എണ്ണയുടെ വില, വിതരണം, ആവശ്യം എന്നിവയെക്കുറിച്ച് അടുത്തിടെ ആശങ്ക ഉന്നയിച്ചതായി ഒരു സ്രോതസ്സ് വെളിപ്പെടുത്തിയതായി എ എന്‍ ഐ റിപ്പോര്‍ട്ട് ചെയ്തു.
അന്താരാഷ്ട്ര തലത്തില്‍ ക്രൂഡ് ഓയില്‍ വില ഉയരുന്ന സാഹചര്യത്തില്‍ സൗദി അറേബ്യ, കുവൈത്ത്, യു എ ഇ, റഷ്യ തുടങ്ങി നിരവധി രാജ്യങ്ങളിലെ ഊര്‍ജ മന്ത്രാലയങ്ങളുമായി പെട്രോളിയം മന്ത്രാലയം ബന്ധപ്പെട്ടിരുന്നു.
