ദോഹ: ഖത്തര്‍ ജ്യോതിശാസ്ത്ര കേന്ദ്രത്തിന്റെ തലവന്‍ ശൈഖ് സല്‍മാന്‍ ബിന്‍ ജാബര്‍ അല്‍-താനി അല്‍ഖോറില്‍ ആദ്യത്തെ ഉല്‍ക്കാശില കണ്ടെത്തി. സോഷ്യല്‍ മീഡിയയില്‍ ഉല്‍ക്കാശിലയുടെ ചിത്രം പോസ്റ്റ് ചെയ്തു. കോസ്മിക് ഗ്ലാസ് എന്നറിയപ്പെടുന്ന ഒരു തരം ടെക്‌റ്റൈറ്റ് ആണിത്.
അല്‍ ശര്‍ക്കിന് നല്‍കിയ പ്രസ്താവനയില്‍ അല്‍ ഖോര്‍ ബീച്ചിലൂടെ നടക്കുമ്പോള്‍ യാദൃശ്ചികമായി അപൂര്‍വമായ പ്രകൃതിദത്ത ഗ്ലാസ് കണ്ടെത്തുകയായിരുന്നുവെന്ന് ജ്യോതിശാസ്ത്രജ്ഞന്‍ വിശദീകരിച്ചു. ‘കടല്‍ത്തീരത്തിനടുത്തുള്ള പാറകള്‍ക്കിടയില്‍ നിന്നാണ് ഉല്‍ക്കാശില കണ്ടെത്തിയത്, ഭാഗികമായി വെള്ളത്തില്‍ മുങ്ങിയിരുന്നു,’ അദ്ദേഹം പറഞ്ഞു, അത് ‘ടെക്‌റ്റൈറ്റ്’ എന്നറിയപ്പെടുന്ന കോസ്മിക് ഗ്ലാസ് ആണെന്ന് സ്ഥിരീകരിക്കാന്‍ സ്‌പെഷ്യലിസ്റ്റുകളെ സമീപിക്കുകയായിരുന്നു. ഉല്‍ക്കാശിലയുടെ ഭാരവും അതിന്റെ വീഴ്ചയുടെ സമയവും നിര്‍ണ്ണയിക്കാന്‍ കഴിയില്ലെന്നും അദ്ദേഹം കൂട്ടിച്ചേര്‍ത്തു.
സൂക്ഷ്മപരിശോധനയില്‍ ഉല്‍ക്കാശിലയുടെ അരികുകള്‍ ഉരുകുന്നതിന്റെ ലക്ഷണങ്ങള്‍ കാണിക്കുന്നുണ്ടെന്നും അത് അന്തരീക്ഷത്തില്‍ പ്രവേശിച്ച് പിണ്ഡമായി രൂപാന്തരപ്പെട്ടുവെന്നതിന്റെ തെളിവാണെന്നും ശൈഖ് സല്‍മാന്‍ അഭിപ്രായപ്പെട്ടു.
ഖത്തര്‍ ജ്യോതിശാസ്ത്ര കേന്ദ്രം ഖത്തറില്‍ മുമ്പ് 30ലധികം ഉല്‍ക്കാശിലകള്‍ കണ്ടെത്തിയിട്ടുണ്ടെന്ന് ജ്യോതിശാസ്ത്രജ്ഞന്‍ സ്ഥിരീകരിച്ചു. ടെക്‌റ്റൈറ്റിന്റെ മറ്റ് നിരവധി ശകലങ്ങള്‍ അല്‍ ഖോറില്‍ കണ്ടെത്താനാകുമെന്ന് പ്രതീക്ഷിക്കുന്നതായും അദ്ദേഹം പറഞ്ഞു.
ഇത്രയും വലിപ്പമുള്ള ഉല്‍ക്കാശിലകള്‍ കണ്ടെത്തുന്നത് രാജ്യത്തും മേഖലയിലും ജ്യോതിശാസ്ത്ര ഗവേഷണത്തിനും പഠനത്തിനും പ്രധാനമാണെന്ന് അദ്ദേഹം വ്യക്തമാക്കി.
