ന്യൂഡല്ഹി: നടിയെ ആക്രമിച്ച കേസിലെ പീഡന ദൃശ്യങ്ങള് കോടതിയില് നിന്നും ചോര്ന്ന സംഭവത്തില് അന്വേഷണം ആവശ്യപ്പെട്ട് അതിജീവിത സുപ്രിം കോടതിയില്. സംഭവത്തില് പുനരന്വേഷണം ആവശ്യപ്പെട്ട് സുപ്രിം കോടതി ചീഫ് ജസ്റ്റിസിന് കത്ത് നല്കി.
സംഭവത്തില് ആശങ്ക പ്രകടിപ്പിച്ച അതിജീവിത ദൃശ്യം അനുമതിയില്ലാതെ തുറന്നത് ഞെട്ടിക്കുന്ന സംഭവമാണെന്ന് കത്തില് പറയുന്നു. ദൃശ്യം ചോര്ന്നതോടെ തന്റെ സ്വകാര്യത ഹനിക്കപ്പെട്ടെന്നും അവര് കത്തില് പറയുന്നു.
കത്തിന്റെ പകര്പ്പ് പ്രധാനമന്ത്രി നരേന്ദ്രമോദിക്കും മുഖ്യമന്ത്രി പിണറായി വിജയനും മനുഷ്യാവകാശ കമ്മീഷന് ഉള്പ്പെടെയുള്ളവര്ക്കും കൈമാറിയിട്ടുണ്ട്. അടിയന്തര നടപടി ആവശ്യപ്പെട്ടാണ് കത്ത്. കോടതിയില് നിന്നും നീതി ലഭിക്കുമെന്ന് പ്രതീക്ഷിച്ച തനിക്ക് കടുത്ത അനീതിയാണ് നേരിട്ടതെന്നും അവര് വ്യക്തമാക്കി.
എറണാകുളം ജില്ലാ സെഷന്സ് കോടതിയില് നിന്നും 2019 ഡിസംബര് 20ന്് ദൃശ്യങ്ങള് ചോര്ന്നതായി വിചാരണ കോടതിയില് സംസ്ഥാന ഫോറന്സിക് വിഭാഗം സ്ഥിരീകരിച്ചിരുന്നു. കോടതിയിലേക്ക് ദൃശ്യങ്ങളെത്തിച്ച സമയത്തിന് മുമ്പ് വീഡിയോ ഫയലില് ചില സാങ്കേതിക മാറ്റങ്ങള് സംഭവിച്ചതായും ദൃശ്യങ്ങളുടെ ഹാഷ് വാല്യു മാറിയതായും നേരത്തെ സൂചന ലഭിച്ചിരുന്നു. ഇതിന് പിന്നാലെ നടത്തിയ അന്വേഷണത്തിലാണ് ദൃശ്യങ്ങള് ചോര്ന്ന വിവരം കണ്ടെത്തിയത്.
