ദോഹ: ശീതകാലത്തിന്റെ അവസാന ഘട്ടങ്ങളെ സൂചിപ്പിക്കുന്ന പ്രധാന കാലാവസ്ഥാ സൂചനകളിലൊന്നായ അല്‍-ഷോല നക്ഷത്രകാലം ആരംഭിച്ചതായി ഖത്തര്‍ കാലാവസ്ഥാ വകുപ്പ് (ക്യു എം ഡി) അറിയിച്ചു. 2026 ജനുവരി 2ന് ആരംഭിച്ച ഈ കാലയളവ് 13 ദിവസത്തേക്കാണ് നീണ്ടുനില്‍ക്കുക.
തങ്ങളുടെ ഔദ്യോഗിക സാമൂഹികമാധ്യമ അക്കൗണ്ടുകളിലൂടെ പങ്കുവെച്ച അറിയിപ്പില്‍, അല്‍-ഷോല ശീതകാലത്തിലെ മൂന്നാമത്തെ നക്ഷത്രവും അല്‍-മ്രബാനിയ്യാ കാലഘട്ടത്തിന്റെ അവസാന ഘട്ടവുമാണെന്ന് വകുപ്പ് വ്യക്തമാക്കി. ഈ കാലയളവ് പരമ്പരാഗതമായി വര്‍ഷത്തിലെ ഏറ്റവും തണുത്ത ദിവസങ്ങളെ സൂചിപ്പിക്കുന്നതായും അറിയിച്ചു.
ഈ ഘട്ടത്തില്‍ സാധാരണയായി താപനിലയില്‍ കുറവ് അനുഭവപ്പെടുന്നതായി കാലാവസ്ഥാ നിരീക്ഷകര്‍ വ്യക്തമാക്കി. ശീതകാലത്തിലെ ഏറ്റവും തണുത്ത ഘട്ടങ്ങളിലൊന്നാണ് അല്‍-ഷോല കാലമെന്നും പ്രത്യേകിച്ച് പുലര്‍ച്ചെ സമയങ്ങളില്‍ മൂടല്‍മഞ്ഞ് രൂപപ്പെടുന്നത് ഈ കാലയളവിനൊപ്പം തുടരുമെന്നും ഖത്തര്‍ കാലാവസ്ഥാ വകുപ്പ് കൂട്ടിച്ചേര്‍ത്തു.
