മുംബൈ: ബോളിവുഡ് ഇതിഹാസം ധര്മേന്ദ്ര (89) അന്തരിച്ചു. മുംബൈയിലെ വസതിയിലായിരുന്നു അന്ത്യം. ആറ് പതിറ്റാണ്ട് ബോളിവുഡിനെ ത്രസിപ്പിച്ച ധര്മേന്ദ്ര മൂന്നൂറോളം സിനിമകളില് അഭിനയിച്ചിട്ടുണ്ട്. ഇവയില് പലതും സൂപ്പര് ഹിറ്റുകളാണ്. രാജ്യം പദ്മഭൂഷണ് നല്കി ആദരിച്ച ധര്മേന്ദ്ര 2009ല് രാജസ്ഥാനില്നിന്ന് ലോക്സഭാംഗമായിരുന്നു.
ദീര്ഘകാലമായി അസുഖ ബാധിതനായി ചികിത്സയിലായിരുന്നു. ശ്വാസതടസ്സത്തെ തുടര്ന്ന് ഒരാഴ്ച മുന്പാണ് ധര്മേന്ദ്രയെ ആശുപത്രിയില് പ്രവേശിപ്പിച്ചത്. കഴിഞ്ഞ ഏപ്രിലില് ഇദ്ദേഹത്തിന് നേത്രശസ്ത്രക്രിയ നടത്തിയിരുന്നു. ബോളിവുഡിലെ എക്കാലത്തെയും മികച്ച താരങ്ങളിലൊരാളായാണ് ധര്മേന്ദ്രയെ വിശേഷിപ്പിക്കുന്നത്
1960ല് ‘ദില് ഭി തേരാ, ഹം ഭി തേരാ’ എന്ന ചിത്രത്തിലൂടെയാണ് തുടക്കം. ഷോലെ, ധരംവീര്, ചുപ്കേ ചുപ്കേ, ഡ്രീം ഗേള് തുടങ്ങിയ ചിത്രങ്ങള് ധര്മേന്ദ്രയെ പ്രശസ്തനാക്കി. ധര്മേന്ദ്ര അവസാനമായി അഭിനയിച്ച ‘ഇക്കിസ്’ എന്ന ചിത്രം ഡിസംബര് 25ന് റിലീസ് ചെയ്യാനിരിക്കുകയാണ്. നടി ഹേമമാലിനിയാണ് ധര്മേന്ദ്രയുടെ ഭാര്യ. പ്രകാശ് കൗര് ആദ്യ ഭാര്യയാണ്. ബോളിവുഡ് താരങ്ങളായ സണ്ണി ഡിയോള്, ബോബി ഡിയോള്, ഇഷ ഡിയോള് എന്നിവരുള്പ്പെടെ ആറു മക്കളുണ്ട്.
