ദോഹ: ഏറ്റവും നൂതനമായ മാര്ക്കറ്റിംഗ് ടൂളിനുള്ള ഗ്ലോബല് ഹ്യൂമന് പീസ് യൂണിവേഴ്സിറ്റിയുടെ ഡോ. എ പി ജെ അബ്ദുല് കലാം ഇന്നൊവേഷന് അവാര്ഡ് മീഡിയ പ്ലസ് സി ഇ ഒയും ഖത്തര് ബിസിനസ് കാര്ഡ് ഡയറക്ടറി ചീഫ് എഡിറ്ററുമായ ഡോ. അമാനുല്ല വടക്കാങ്ങര ഏറ്റുവാങ്ങി.
പീപ്പിള് ഫോറം ഓഫ് ഇന്ത്യ ഭാരത് സേവക് സമാജുമായി സഹകരിച്ച് ന്യൂഡല്ഹിയിലെ ആന്ധ്രപ്രദേശ് ഭവനിലെ ഡോ. ബി ആര് അംബേദ്കര് ഓഡിറ്റോറിയത്തില് നടന്ന പ്രൗഡമായ ചടങ്ങില് കേന്ദ്ര സാമൂഹ്യ നീതി സഹമന്ത്രി ഡോ. രാം ദാസ് അത്താവാലെക്ക് വേണ്ടി യൂണിവേഴ്സിറ്റി വൈസ് ചാന്സിലറും തമിഴ്നാട് മുന് ജഡ്ജുമായ ഡോ. കെ വെങ്കിടേശന്, തമിഴ്നാട് മുന് പ്രിന്സിപ്പല് സെക്രട്ടറി കെ സമ്പത്ത് കുമാര്, യൂണിവേഴ്സിറ്റി ഡയറക്ടര് വലര്മതി എന്നിവര് ചേര്ന്നാണ് പുരസ്കാരം സമ്മാനിച്ചത്.
ഖത്തര് ബിസിനസ് കാര്ഡ് ഡയറക്ടറിക്കാണ് പുരസ്കാരം. നേരത്തെ കാലിക്കറ്റ് യൂണിവേഴ്സിറ്റിയുടേയും പുരസ്കാരം ഖത്തര് ബിസിനസ് കാര്ഡ് ഡയറക്ടറി സ്വന്തമാക്കിയിരുന്നു.
2007 മുതല് ഖത്തര് ആസ്ഥാനമായി പ്രവര്ത്തിക്കുന്ന മീഡിയ പ്ലസ് പ്രസിദ്ധീകരിക്കുന്ന ഖത്തര് ബിസിനസ് കാര്ഡ് ഡയറക്ടറിക്ക് അമേരിക്ക, യു കെ. ഇന്ത്യ തുടങ്ങി വിവിധ രാജ്യങ്ങളില് നിന്നും നിരവധി പുരസ്കാരങ്ങള് ഇതിനകം ലഭിച്ചിട്ടുണ്ട്.
ലോകത്തിലെ ഏറ്റവും വലിയ ബിസിനസ് കാര്ഡ് ഡയറക്ടറിക്കുള്ള യൂണിവേഴ്സല് റിക്കോര്ഡ് ഫോറം അവാര്ഡ് നേടിയ ഖത്തര് ബിസിനസ് കാര്ഡ് ഡയറക്ടറി ഉപഭോക്താക്കളേയും സംരംഭകരേയും നേരിട്ട് ബന്ധപ്പെടുത്തുകയും മികച്ച ബിസിനസിന് അവസരമൊരുക്കുകയും ചെയ്യുന്ന നൂതന സംരംഭമാണ്. കഴിഞ്ഞ 17 വര്ഷമായി ഖത്തറില് നിന്നും പ്രസിദ്ധീകരിക്കുന്ന ഡയറക്ടറി ഇന്തോ ഗള്ഫ് ബിസിനസ് പ്രോല്സാഹിപ്പിക്കുന്ന സംരംഭം എന്ന നിലക്കും ശ്രദ്ധേയമാണ്.
