ദോഹ: ആര്‍ട്ടണ്‍ ക്യാപിറ്റല്‍ അടുത്തിടെ പുറത്തിറക്കിയ ഗ്ലോബല്‍ പാസ്പോര്‍ട്ട് പവര്‍ റാങ്ക് 2025 പ്രകാരം ഖത്തര്‍ പാസ്പോര്‍ട്ട് ആഗോള റാങ്കിംഗില്‍ 44-ാം സ്ഥാനത്ത് തുടരുന്നു. 120 എന്ന മൊബിലിറ്റി സ്‌കോറോടെയാണ് ഖത്തര്‍ ഈ സ്ഥാനം കൈവരിച്ചതെന്ന് റിപ്പോര്‍ട്ട് വ്യക്തമാക്കുന്നു.
ഖത്തര്‍ പാസ്പോര്‍ട്ട് കൈവശമുള്ളവര്‍ക്ക് 69 രാജ്യങ്ങളിലേക്ക് വിസയില്ലാതെ പ്രവേശിക്കാനാവും. കൂടാതെ 42 രാജ്യങ്ങളില്‍ വിസ ഓണ്‍ അറൈവല്‍ സൗകര്യവും ലഭ്യമാണ്. 78 രാജ്യങ്ങളിലേക്ക് യാത്ര ചെയ്യുന്നതിനായി മുന്‍കൂട്ടി വിസ ആവശ്യമാണ്. ഒമ്പത് രാജ്യങ്ങളില്‍ ഇലക്ട്രോണിക് ട്രാവല്‍ ഓതറൈസേഷന്‍ സംവിധാനവും നിലവിലുണ്ട്.
ആഗോള തലത്തില്‍ യു എ ഇ ഏറ്റവും ശക്തമായ പാസ്പോര്‍ട്ടുമായി ഒന്നാം സ്ഥാനം നേടി. 179 രാജ്യങ്ങളിലേക്ക് വിസയില്ലാതെ യാത്ര ചെയ്യാനാകുന്ന യു എ ഇ പാസ്പോര്‍ട്ടാണ് പട്ടികയില്‍ മുന്‍പന്തിയില്‍. സിംഗപ്പൂര്‍ 30-ാം സ്ഥാനത്ത് നിന്നുയര്‍ന്ന് രണ്ടാം സ്ഥാനത്തെത്തി. സ്‌പെയിനിനൊപ്പം രണ്ടാം സ്ഥാനമാണ് സിംഗപ്പൂറിന്. ഇരുരാജ്യങ്ങളിലെയും പൗരന്മാര്‍ക്ക് 175 രാജ്യങ്ങളിലേക്ക് വിസയില്ലാതെ യാത്ര ചെയ്യാനാകും.
ഗള്‍ഫ് സഹകരണ കൗണ്‍സില്‍ (ജിസിസി) രാജ്യങ്ങളില്‍ ഖത്തറിന് പിന്നാലെ കുവൈത്ത് 45-ാം സ്ഥാനത്താണ്. സൗദി അറേബ്യയും ബഹ്‌റൈനും യഥാക്രമം 48-ാം സ്ഥാനവും ഒമാന്‍ 51-ാം സ്ഥാനവും നേടി.
അമേരിക്കന്‍ ഐക്യനാടുകള്‍ക്ക് 2025-ല്‍ 168 എന്ന മൊബിലിറ്റി സ്‌കോറോടുകൂടി 9-ാം സ്ഥാനമാണ് ലഭിച്ചത്. 2024-ല്‍ യു എസിന് 173 എന്ന സ്‌കോറോടെ 8-ാം സ്ഥാനമുണ്ടായിരുന്നു. അതേസമയം, 2024-ല്‍ 174 എന്ന മൊബിലിറ്റി സ്‌കോറോടെ 7-ാം സ്ഥാനത്തുണ്ടായിരുന്ന യുണൈറ്റഡ് കിംഗ്ഡം ഈ വര്‍ഷം 169 എന്ന സ്‌കോറോടെ 8-ാം സ്ഥാനത്തേക്ക് താഴ്ന്നു.
193 ഐക്യരാഷ്ട്രസഭാംഗരാജ്യങ്ങളുടെയും ആറു പ്രദേശങ്ങളുടെയും പാസ്പോര്‍ട്ടുകള്‍ ഉള്‍പ്പെടെ ആകെ 199 രാജ്യങ്ങളെയാണ് പാസ്പോര്‍ട്ട് ഇന്‍ഡക്‌സ് പരിഗണിച്ചത്. മൊബിലിറ്റി സ്‌കോറും വിസയില്ലാത്ത പ്രവേശനവും വിസ ഓണ്‍ അറൈവല്‍ സൗകര്യവും തമ്മിലുള്ള അനുപാതവും അടിസ്ഥാനമാക്കിയായിരുന്നു റാങ്കിംഗ്. തുല്യത ഉണ്ടാകുന്ന സാഹചര്യങ്ങളില്‍ ഐക്യരാഷ്ട്രസഭയുടെ വികസന പരിപാടിയുടെ 2018ലെ മനുഷ്യവികസന സൂചിക ടൈബ്രേക്കറായി ഉപയോഗിച്ചു.
