ദോഹ: ഖത്തറുമായുള്ള പങ്കാളിത്തവും ബന്ധവും പ്രോത്സാഹിപ്പിക്കുന്നതിനും കമ്പനിയുടെ സാന്നിധ്യവും നിക്ഷേപവും രാജ്യത്ത് കൂടുതല്‍ വര്‍ധിപ്പിക്കുന്നതിനുള്ള പുതിയ വഴികള്‍ പര്യവേക്ഷണം ചെയ്യുന്നതിനുമുള്ള ശ്രമം തങ്ങള്‍ നടത്തുകയാണെന്ന് ബോയിംഗ് ഗ്ലോബല്‍ പ്രസിഡന്റ് ഡോ. ബ്രണ്ടന്‍ നെല്‍സണ്‍ പറഞ്ഞു.
നൂതന സാങ്കേതിക വികസന ശ്രമങ്ങളെ പിന്തുണച്ചും കഴിവുകള്‍ വാഗ്ദാനം ചെയ്തും ഖത്തറിലെ സാമ്പത്തിക വൈവിധ്യവത്ക്കരണത്തിനും വളര്‍ച്ചാ പദ്ധതികള്‍ക്കും ബോയിംഗ് നല്‍കിയ സംഭാവനകളെ കുറിച്ചും അദ്ദേഹം ചൂണ്ടിക്കാട്ടി. അല്‍-അറബ് പത്രത്തിന് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം.
ഖത്തര്‍ ദേശീയ ദര്‍ശനം 2030, ദേശീയ വികസന തന്ത്രം എന്നിവയെ പിന്തുണയ്ക്കാന്‍ തങ്ങള്‍ പൂര്‍ണ്ണമായും പ്രതിജ്ഞാബദ്ധരാണെന്നും ഖത്തറുമായുള്ള പങ്കാളിത്തം വര്‍ധിപ്പിക്കുന്നതിന് കൂടുതല്‍ നിക്ഷേപം നടത്താന്‍ ആഗ്രഹിക്കുന്നതായും നെല്‍സണ്‍ പറഞ്ഞു.
ഖത്തര്‍ എയര്‍വേയ്സ് ലോകത്തിലെ ഏറ്റവും മികച്ച എയര്‍ലൈനായി കണക്കാക്കപ്പെടുന്നുവെന്നും പുതിയ 777-8 എയര്‍ കാര്‍ഗോ എയര്‍ക്രാഫ്റ്റിന്റെ ആദ്യ ഉപഭോക്താവാണ് എന്നും അദ്ദേഹം അഭിപ്രായപ്പെട്ടു. നിലവില്‍ 110-ലധികം പുതിയ ബോയിംഗ് വിമാനങ്ങളും ഓര്‍ഡറിലുണ്ട്. ഇത് യാത്രാ, ചരക്ക് ഗതാഗത ശേഷി വര്‍ധിപ്പിക്കാന്‍ എയര്‍ലൈനെ പ്രാപ്തമാക്കും. വ്യോമയാനം, വിനോദസഞ്ചാരം, വ്യാപാരം എന്നീ മേഖലകളില്‍ ഖത്തറിന്റെ അഭിലാഷമായ വളര്‍ച്ചാ പദ്ധതികളെ പിന്തുണയ്ക്കുന്നതിനുള്ള തങ്ങളുടെ സംഭാവനയില്‍ അഭിമാനിക്കുന്നുവെന്നും അദ്ദേഹം ഊന്നിപ്പറഞ്ഞു.
യുവാക്കള്‍ക്കുള്ള അവസരങ്ങള്‍ വര്‍ധിപ്പിക്കുകയും രാജ്യത്തിന്റെ അഭിലാഷമായ വളര്‍ച്ചാ പദ്ധതികളെ പിന്തുണയ്ക്കുകയും ചെയ്യുന്ന നിരവധി സംരംഭങ്ങളിലൂടെ ബോയിംഗ് ഖത്തറിലെ ലാഭേച്ഛയില്ലാതെ പ്രവര്‍ത്തിക്കുന്ന സംഘടനകളുമായി സഹകരിക്കുന്നു. 2009 മുതല്‍, ഖത്തറിലെ സ്റ്റെം വിദ്യാഭ്യാസ മേഖലയിലും തൊഴില്‍ ശക്തി വികസനത്തിലും ബോയിംഗ് 1.5 ദശലക്ഷം ഡോളര്‍ (5.4 ദശലക്ഷം റിയാല്‍) നിക്ഷേപിച്ചിട്ടുണ്ട്. കുട്ടികള്‍ക്കായി സംഘടിപ്പിച്ച സ്റ്റെം വര്‍ക്ക്ഷോപ്പുകള്‍ക്ക് പുറമേ ഇന്‍ജാസ് ഖത്തറുമായി സഹകരിച്ച് ബോയിംഗ് വര്‍ഷം തോറും സംഘടിപ്പിക്കുന്ന സംരംഭകത്വ പരിപാടിയില്‍ നിന്ന് ഇതുവരെ അയ്യായിരത്തിലധികം വിദ്യാര്‍ഥികള്‍ പ്രയോജനം നേടിയിട്ടുണ്ടെന്നും നെല്‍സണ്‍ കൂട്ടിച്ചേര്‍ത്തു.
ഖത്തറിലെ നിരവധി സര്‍വകലാശാലകളുമായും ഗവേഷണ സ്ഥാപനങ്ങളുമായും പങ്കാളിത്തം സ്ഥാപിച്ച് ഗവേഷണത്തിലും വികസനത്തിലും ബോയിംഗ് നിക്ഷേപം നടത്തുന്നു. 2016 മുതല്‍ ഖത്തര്‍ സര്‍വകലാശാലയുമായുള്ള പങ്കാളിത്തം ചൂണ്ടിക്കാണിച്ചു. അതനുസരിച്ച് ഖത്തര്‍ യൂണിവേഴ്‌സിറ്റി കോളേജ് ഓഫ് എഞ്ചിനീയറിംഗിന്റെ നിരവധി സംരംഭങ്ങളെ കമ്പനി പിന്തുണയ്ക്കുന്നു.
