ദോഹ: ഇന്ത്യന് കള്ച്ചറല് സെന്റര് സംഘടിപ്പിക്കുന്ന ഇന്ത്യന് കാര്ണിവല് മെയ് 15, 16 തിയ്യതികളില് അരങ്ങേറുമെന്ന് ഐ സി സി ഭാരവാഹികള് വാര്ത്താ സമ്മേളനത്തില് അറിയിച്ചു. ഐഡിയില് ഇന്ത്യന് സ്കൂളില് വൈകിട്ട് നാലു മുതല് 10 വരെയാണ് കാര്ണിവല് സമയം. അനൂപ് ശങ്കറും സംഘവും അവതരിപ്പിക്കുന്ന സംഗീത സായാഹ്നമാണ് ഇന്ത്യന് കാര്ണിവലില് ഏറ്റവും ശ്രദ്ധേയം.
ഇരുപതിനായിരത്തിലധികം സന്ദര്ശകരെ പ്രതീക്ഷിക്കുന്ന കാര്ണിവലില് ഇന്ഡോ- ഖത്തര് സൗഹൃദം ശക്തമാക്കുകയും ഇന്ത്യന് സാംസ്ക്കാരിക വൈവിധ്യങ്ങള് പ്രകടമാക്കുകയും ചെയ്യും.
ഐ സി സി അംഗത്വമുള്ള സംഘടനകള്, ഇന്ത്യന് സ്കൂളുകള്, സ്ഥാപനങ്ങള് തുടങ്ങിയവയുടെ ലൈവ് ഓര്ക്കസ്ട്ര, ചെണ്ട മേളം, സംഘംനൃത്തം തുടങ്ങി നിറപ്പകിട്ടാര്ന്ന സാംസ്ക്കാരിക പരിപാടികള്, കേരളത്തിന്റെ തിരുവാതിര, ഗുജറാത്തിന്റെ ഗര്ബ നൃത്തം, വിവിധ ഇന്ത്യന് സംസ്ഥാനങ്ങളുടെ പവലിയനുകള്, ഇന്ത്യയുടെ കേന്ദ്ര- സംസ്ഥാന സര്ക്കാരുകളുടെ സാമൂഹ്യ സേവന പദ്ധതികളെ കുറിച്ചുള്ള പവലിയന്, ഹാന്റിക്രാഫ്റ്റ്, പരമ്പരാഗത വസ്ത്രങ്ങള്, ആഭരണങ്ങള്, ഫുഡ് കോര്ഡ് തുടങ്ങിയവയും ഇന്ത്യന് കാര്ണിവലിലുണ്ടാകും.
പരിപാടിയോടനുബന്ധിച്ച് പുതിയ ലോഗോയും ഐ സി സി മൊബൈല് ആപ്പും ഐ സി സി പ്രിവിലേജ് കാര്ഡും പുറത്തിറക്കും.
