ദോഹ: ഈ വര്ഷം ഖത്തര് ആകാശ നിരീക്ഷകര്ക്ക് ലൈറിഡ് ഉല്ക്കാവര്ഷം കാണാന് കഴിയുമെന്ന് ഖത്തര് കലണ്ടര് ഹൗസ് റിപ്പോര്ട്ട് ചെയ്തു. 2025 ഏപ്രില് 22 ചൊവ്വാഴ്ച വൈകുന്നേരം ലൈറിഡ് അതിന്റെ ഉച്ചസ്ഥായിയിലെത്തുമെന്നും ബുധനാഴ്ച പുലര്ച്ചെ വരെ തുടരുമെന്നും ഖത്തര് കലണ്ടര് ഹൗസ് റിപ്പോര്ട്ട് പറയുന്നു.
ഏപ്രില് പകുതി മുതല് ഏപ്രില് 25 വരെ നീണ്ടുനില്ക്കുന്ന നിരീക്ഷണ ജാലകത്തില് വര്ഷം തോറും ആവര്ത്തിക്കുന്ന ലൈറിഡ് ഉല്ക്കാവര്ഷം ഏപ്രില് 22ന് അതിന്റെ ഉച്ചസ്ഥായിയിലെത്തുമെന്ന് ഖത്തര് കലണ്ടര് ഹൗസിലെ ജ്യോതിശാസ്ത്ര വിദഗ്ധന് ഡോ. ബഷീര് മര്സൂഖ് പറഞ്ഞു.
തിളക്കമുള്ള ഉല്ക്കകള്ക്ക് പേരുകേട്ട ഈ പ്രതിഭാസം മണിക്കൂറില് 20 ഉല്ക്കകള് എന്ന തോതില് ഉണ്ടാകുമെന്നാണ് പ്രതീക്ഷിക്കുന്നത്. ഖത്തറിലും അറബ് മേഖലയിലും അര്ധരാത്രി മുതല് ബുധനാഴ്ച പുലര്ച്ചെ വരെ വടക്കുകിഴക്കന് ചക്രവാളത്തിലാണ് കാണാനാവുക. നഗ്നനേത്രങ്ങള്കൊണ്ട് ലൈറിഡ് ദൃശ്യമാകുമെന്ന് വിദഗ്ധര് സ്ഥിരീകരിക്കുന്നു.
ഉല്ക്കാ വര്ഷത്തിന്റെ അസാധാരണമായ ചിത്രങ്ങള് ലഭിക്കുന്നതിന് ഇമേജിംഗ് സമയത്ത് എക്സ്പോഷര് ദൈര്ഘ്യം വര്ധിപ്പിക്കേണ്ടതിന്റെ പ്രാധാന്യം കണക്കിലെടുത്ത് ചിത്രങ്ങള് എടുക്കാന് ഡിജിറ്റല് ക്യാമറകള് ഉപയോഗിക്കാമെന്ന് അദ്ദേഹം ചൂണ്ടിക്കാട്ടി.
എല്ലാ ഏപ്രിലിലും ഭൂമി അതിന്റെ പൊടിപടലത്തെ മുറിച്ചുകടക്കുന്നതിനാല് കണികകള് അന്തരീക്ഷവുമായി കൂട്ടിയിടിക്കുകയും ആകാശത്ത് ദൃശ്യമായ മിന്നലുകള് പുറപ്പെടുവിക്കുകയും ചെയ്യുന്നതിനാല് ലൈറിഡ് ഉല്ക്കാവര്ഷത്തിന്റെ ഉറവിടം താച്ചര് ധൂമകേതുവാണെന്ന് ഡോ. മര്സൂക്ക് അഭിപ്രായപ്പെട്ടു.
ലൈറിഡ് ഉല്ക്കാവര്ഷം കാണുന്നതിനുള്ള ഏറ്റവും നല്ല സ്ഥലങ്ങള് വാസയോഗ്യമായ മേഖലകളില് നിന്നും പ്രകാശ മലിനീകരണത്തില് നിന്നും വളരെ അകലെയുള്ള ഇരുണ്ടതും വിദൂരവുമായ പ്രദേശങ്ങളാണെന്നും നിരീക്ഷണത്തിന് ഏറ്റവും അനുയോജ്യമായ സമയം ചൊവ്വാഴ്ച വൈകുന്നേരം മുതല് ബുധനാഴ്ച പുലര്ച്ചെ വരെയാണെന്നും അദ്ദേഹം വ്യക്തമാക്കി.
