ദോഹ: പൊതുജന സുരക്ഷ വര്‍ധിപ്പിക്കുന്നതിന് ഖത്തറിലെ അപകടകരമായ മൃഗങ്ങളുടെയും ജീവികളുടെയും സര്‍വേയും ഇന്‍വെന്ററിയും മന്ത്രാലയങ്ങള്‍ ആരംഭിച്ചു.
ആഭ്യന്തര മന്ത്രാലയവുമായി സഹകരിച്ച് പരിസ്ഥിതി, കാലാവസ്ഥാ വ്യതിയാന മന്ത്രാലയം ആരംഭിച്ച ഈ സര്‍വേ അപകടകരമായ മൃഗങ്ങളെയും ജീവികളെയും ഏറ്റെടുക്കുന്നത് നിയന്ത്രിക്കുന്നതുമായി ബന്ധപ്പെട്ട 2019 ലെ നിയമ നമ്പര്‍ (10) ലെ വ്യവസ്ഥകള്‍ നടപ്പിലാക്കുന്നതിന്റെ ഭാഗമാണ്.
മൃഗങ്ങളുടെയും ജീവികളുടെയും ഉടമകളെ ഒരു ഫോം വഴി രജിസ്റ്റര്‍ ചെയ്യാനും [email protected] എന്ന ഇമെയില്‍ വഴി സമര്‍പ്പിക്കാനും പരിസ്ഥിതി മന്ത്രാലയം ആവശ്യപ്പെട്ടു. ഇതുവരെ ആകെ 48 മൃഗങ്ങളെ പട്ടികയില്‍ തിരിച്ചറിഞ്ഞിട്ടുണ്ട്. എന്നിരുന്നാലും, ‘ഈ പട്ടികയില്‍ പരാമര്‍ശിച്ചിരിക്കുന്ന മൃഗങ്ങളുടെയും ജീവികളുടെയും ഒരേ കുടുംബത്തില്‍പ്പെട്ട മറ്റെല്ലാ ഇനങ്ങളെയും ഉപജാതികളെയും പരിഗണിക്കും’ എന്നും മന്ത്രാലയം ചൂണ്ടിക്കാട്ടി.
രജിസ്‌ട്രേഷന്‍ പൂര്‍ത്തിയാക്കാനുള്ള അവസാന തിയ്യതി 2025 ഏപ്രില്‍ 22 ആണ്.
അധികാരികളില്‍ നിന്ന് ലൈസന്‍സ് ഇല്ലാതെ അപകടകരമായ മൃഗങ്ങളെയും ജീവികളെയും സ്വന്തമാക്കുന്നത് കുറ്റകൃത്യമായും നിയമപ്രകാരം ശിക്ഷാര്‍ഹമായും കണക്കാക്കുമെന്നും മന്ത്രാലയം ഊന്നിപ്പറഞ്ഞു. നിയമത്തിലെ ആര്‍ട്ടിക്കിള്‍ (8) അനുസരിച്ച് മൂന്ന് വര്‍ഷത്തില്‍ കൂടാത്ത തടവും 100,000 ഖത്തര്‍ റിയാല്‍ കവിയാത്ത പിഴയും ഉള്‍പ്പെടെ ശിക്ഷകള്‍ വ്യത്യാസപ്പെടാം.
