കോട്ടയം: ക്രിസ്ത്യന് പെണ്കുട്ടികളെ തട്ടിക്കൊണ്ടുപോകാന് ഈഴവ യുവാക്കള്ക്ക് പരിശീലനം ലഭിക്കുന്നുണ്ടെന്ന ആരോപണവുമായി സിറിയന് കത്തോലിക്ക വൈദികനും ദീപിക ബാലസഖ്യം ഡയറക്ടറുമായ ഫാദര് റോയി കണ്ണന്ചിറ. നാര്ക്കോട്ടിക് ജിഹാദ് സംബന്ധിച്ച പാലാ ബിഷപ്പിന്റെ വിദ്വേഷ പ്രസ്താവന ഉയര്ത്തിയ വിവാദങ്ങള്ക്കിടെയാണ് പുതിയ ആരോപണങ്ങള്. പെണ്കുട്ടികളെ പ്രണയം നടിച്ച് വശത്താക്കാന് ഈഴവ യുവാക്കാള്ക്ക് സ്ട്രാറ്റജിക് ആയ പരിശീലനം ലഭിക്കുന്നുവെന്നും അത് തടയാന് സഭയ്ക്കാകുന്നില്ലെന്നുമാണ് വൈദികന് പറയുന്നത്. ഒരു മാസത്തിനുള്ളില് കോട്ടയത്തിന് അടുത്തുള്ള ഇടവകയില് നിന്ന് ഒമ്പത് പെണ്കുട്ടികളെ ഇത്തരത്തില് കൊണ്ടുപോയതായും അദ്ദേഹം പറഞ്ഞു. വെബ് പോര്ട്ടലായ ട്രൂ കോപ്പി തിങ്ക് ആണ് വാര്ത്ത ആദ്യം പുറത്തുവിട്ടത്.
