കൊച്ചി: കെ എസ് ആര് ടി സി ബസ് ഇടിച്ചതിനെ തുടര്ന്ന് ഗുരുതരമായി പരിക്കേറ്റ കാല്നടയാത്രക്കാരിയെ ഒറ്റയ്ക്ക് രക്ഷിക്കാന് മുന്നിട്ടിറങ്ങി ബസില് യാത്ര ചെയ്തിരുന്ന നഴ്സ്.
വി പി എസ് ലേക്ഷോര് ആശുപത്രിയിലെ ഓപ്പറേറ്റിംഗ് തിയേറ്റര് സ്റ്റാഫ് നഴ്സായ ദീപമോള് കെ എം രാത്രി ഷിഫ്റ്റ് കഴിഞ്ഞ് കെ എസ് ആര് ടി സി ബസില് വീട്ടിലേക്ക് മടങ്ങുമ്പോഴാണ് തുറവൂരിനടുത്ത് അപകടം സംഭവിച്ചത്.
കാല്നട യാത്രക്കാരിയായ ശോഭന (63) റോഡരികില് അബോധാവസ്ഥയിലായിരുന്നു. തല്ക്ഷണം തന്നെ ദീപമോള് സഹായത്തിനായി ഇറങ്ങി.
ആരുടെയും സഹായമില്ലാതെ ദീപമോള് ഉടന് തന്നെ സി പി ആര് ആരംഭിച്ചു. ആന്തരിക രക്തസ്രാവത്തിന്റെ ലക്ഷണങ്ങള് ഉണ്ടായിരുന്നെങ്കിലും ദുര്ബലമായ നാഡിമിടിപ്പ് തിരികെ കൊണ്ടുവന്നു. തുടര്ന്ന് ശോഭനയെ അടുത്തുള്ള തുറവൂര് താലൂക്ക് ആശുപത്രിയിലേക്ക് മാറ്റി. അവിടെ പ്രഥമശുശ്രൂഷ നല്കിയെങ്കിലും നില ഗുരുതരമായതിനാല് രോഗിയെ ആലപ്പുഴ മെഡിക്കല് കോളേജിലേക്ക് റഫര് ചെയ്തു.
”ആലപ്പുഴ മെഡിക്കല് കോളേജിലേക്ക് വളരെ ദൂരമുണ്ട്. രക്തസ്രാവം വളരെ ഗുരുതരമായിരുന്നു. അതുകൊണ്ട് രോഗിയെ വിപിഎസ് ലേക്ഷോര് ആശുപത്രിയിലേക്ക് കൊണ്ടുപോകാമെന്ന് ഞാന് പറഞ്ഞു. യാത്രയിലുടനീളം, രോഗിയുടെ ശ്വാസോച്ഛ്വാസം നിലനിര്ത്താന് ആംബു ബാഗ് ഉപയോഗിച്ച് തുടര്ച്ചയായി സിപിആര് നല്കി”, ദീപമോള് പറഞ്ഞു.
ലേക്ഷോറില് എത്തിയയുടനെ എമര്ജന്സി വിഭാഗത്തിലെ വിദഗ്ധ സംഘം രോഗിയെ ഇന്ട്യൂബ് ചെയ്ത് ഹൃദയാഘാതത്തില് നിന്ന് പുനരുജ്ജീവിപ്പിച്ചു. തുടര്ന്ന് ന്യൂറോ സര്ജിക്കല് ഐ സി യുവിലേക്ക് മാറ്റി. പക്ഷേ പരിക്കുകള് ഗുരുതരമായതിനാല് അടുത്ത ദിവസം ശോഭനയ്ക്ക് ജീവന് നഷ്ടമായി.
”തലയ്ക്കേറ്റ പരിക്ക് വളരെ ഗുരുതരമാണെന്ന് എനിക്കറിയാമായിരുന്നു, പക്ഷേ അവര് അതിജീവിക്കുമെന്ന് ഞാന് പ്രാര്ഥിച്ചുകൊണ്ടിരുന്നു,” ശവസംസ്കാര ചടങ്ങില് പങ്കെടുത്ത ശേഷം കണ്ണുനീരോടെ അടക്കി ദീപമോള് പറഞ്ഞു.
വിപിഎസ് ലേക്ഷോര് മാനേജിംഗ് ഡയറക്ടര് എസ് കെ അബ്ദുള്ളയും മറ്റ് ജീവനക്കാരും ദീപമോളുടെ ധൈര്യത്തെയും പെട്ടെന്നുള്ള നടപടിയെയും പ്രശംസിച്ചു. ശോഭനയ്ക്ക് കഴിയുന്നതെല്ലാം ചെയ്തതിന് അവരുടെ കുടുംബവും അവരോട് നന്ദി പറഞ്ഞു. അപകടത്തെക്കുറിച്ച് പൊലീസ് കേസ് രജിസ്റ്റര് ചെയ്തിട്ടുണ്ട്.
