വാഷിംഗ്ടണ്: ഒമിക്രോണ് വകഭേദവുമായി ബന്ധപ്പെട്ട് അമേരിക്കയില് ആദ്യ മരണം റിപ്പോര്ട്ട് ചെയ്തു. ടെക്സാസിലാണ് ഒമിക്രോണ് വകഭേദം സ്ഥിരീകരിച്ചയാള് മരിച്ചത്. തിങ്കളാഴ്ചയാണ് മരണം സംഭവിച്ചതെന്ന് ഹാരിസ് കൗണ്ടി ആരോഗ്യ വകുപ്പ് അറിയിച്ചു. ഇയാള് കോവിഡ് പ്രതിരോധ വാക്സിന് എടുത്തിരുന്നില്ലെന്നും അധികൃതര് വ്യക്തമാക്കി.
അന്പതിനും അറുപതിനു മിടയ്ക്ക് പ്രായമുള്ളയാളാണ് അസുഖം ബാധിച്ച് മരിച്ചത്. പ്രായമുള്ളവര് പ്രതിരോധ കുത്തിവയ്പ് എടുക്കാതിരിക്കുകയും കോവിഡ് ബാധിക്കുന്ന സാഹചര്യമുണ്ടാകുകയും ചെയ്താല് ഗുരുതരമായ സങ്കീര്ണതകള് ഉണ്ടാകാനുള്ള സാധ്യത കൂടുതലാണെന്ന് ആരോഗ്യ വകുപ്പ് പ്രസ്താവനയില് പറഞ്ഞു.
ഡിസംബര് 18 വരെയുള്ള വിവരങ്ങള് പ്രകാരം അമേരിക്കയിലെ കോവിഡ് കേസുകളില് 73 ശതമാനവും ഒമിക്രോണ് വകഭേദം കാരണമാണെന്ന് സി ഡി സി തിങ്കളാഴ്ച അറിയിച്ചു. ബ്രിട്ടനിലാണ് ആഗോളതലത്തില് ആദ്യത്തെ ഒമിക്രോണ് മരണം സ്ഥിരീകരിച്ചത്. ബ്രിട്ടനില് നിലവില് 12 പേര് ഒമിക്രോണ് വകഭേദം ബാധിച്ച് മരിച്ചിട്ടുണ്ട്. 104 പേരാണ് നിലവില് ആശുപത്രിയിലുള്ളതെന്ന് ഉപപ്രധാനമന്ത്രി ഡൊമിനിക് റാബ് മാധ്യമങ്ങളോട് പറഞ്ഞു.
