ദോഹ: യു എന് ലോക ഇന്നൊവേഷന് ദിനത്തോടനുബന്ധിച്ച് നവീകരണം, സാങ്കേതികവിദ്യ, ഭാവിയിലേക്കുള്ള ചിന്താഗതി എന്നിവയിലൂടെ ക്ലാസ് മുറികളെ പരിവര്ത്തനം ചെയ്യുന്ന അധ്യാപകരെ അംഗീകരിക്കുന്നതിനും ശാക്തീകരിക്കുന്നതിനുമായി പെഡഗോക്സ് ടീച്ചേഴ്സ് ഇന്നൊവേഷന് പുരസ്ക്കാരം നല്കുന്നു.
സ്കൂള് ആമസോണ്, എബിറ്റ എഐ എന്നിവയുമായി സഹകരിച്ച് മൊമെന്റം മീഡിയ സംഘടിപ്പിക്കുന്ന പെഡഗോക്സ് ടീച്ചേഴ്സ് ഇന്നൊവേഷന് പുരസ്ക്കാരം ഖത്തറിലെ 22 ഇന്ത്യന് സ്കൂളുകളില് പരീക്ഷണാടിസ്ഥാനത്തിലാണ് നടപ്പിലാക്കുന്നതെന്ന് സംഘാടകര് വാര്ത്താ സമ്മേളനത്തില് അറിയിച്ചു. ഭാവി പതിപ്പുകളില് ജി സി സിയിലുടനീളമുള്ള സ്കൂളുകളില് വ്യാപിപ്പിക്കാന് പദ്ധതിയുണ്ട്.
ഏപ്രില് 22 മുതല് മെയ് 30 വരെ ഖത്തറിലെ പങ്കെടുക്കുന്ന സ്കൂളുകളില് സ്കൂള് ഓറിയന്റേഷന് സെഷനുകള് നടത്തും. അവാര്ഡ് ലക്ഷ്യങ്ങള് മനസ്സിലാക്കാനും നൂതന ക്ലാസ് റൂം പ്രോജക്ടുകളുടെ ഉദാഹരണങ്ങള് പര്യവേക്ഷണം ചെയ്യാനും സമര്പ്പണ പ്രക്രിയയെക്കുറിച്ചുള്ള മാര്ഗ്ഗനിര്ദ്ദേശം നേടാനും അധ്യാപകരെ സഹായിക്കുന്നതിനാണ് ഒന്നര മണിക്കൂര് വരെ നീളുന്ന പരിപാടികള് രൂപകല്പന ചെയ്തിരിക്കുന്നത്.
പെഡഗോക്സ് വെബ്സൈറ്റ് വഴി അധ്യാപകര്ക്ക് മെയ് 30-നകം അവരുടെ പ്രോജക്ട് എന്ട്രികള് സമര്പ്പിക്കാം. എഐ പവര്ഡ് വിശകലനവും വിദഗ്ദ്ധ ജൂറി അവലോകനങ്ങളും സംയോജിപ്പിച്ച് ഹൈബ്രിഡ് മോഡലിലൂടെ സമര്പ്പണങ്ങള് വിലയിരുത്തും. ഇത് നീതി, സുതാര്യത, യഥാര്ഥ വിദ്യാഭ്യാസ സ്വാധീനത്തില് ശ്രദ്ധ കേന്ദ്രീകരിക്കല് എന്നിവ ഉറപ്പാക്കുന്നു.
അന്താരാഷ്ട്ര അധ്യാപക ദിനce/ ഒക്ടോബര് 5ന് ഫൈനലിസ്റ്റുകള് തത്സമയം തങ്ങളുടെ പദ്ധതികള് അവതരിപ്പിക്കും. വിജയിച്ച സ്കൂളിലെ മികച്ച മൂന്ന് വിജയികള്ക്കും മൂന്ന് സ്കൂള് പ്രതിനിധികള്ക്കും ആഗോളതലത്തില് അംഗീകരിക്കപ്പെട്ട വിദ്യാഭ്യാസ മാതൃക പര്യവേക്ഷണം ചെയ്യുന്നതിന് ഫിന്ലാന്ഡിലേക്ക് വിദ്യാഭ്യാസ യാത്ര നല്കും.
കൂടുതല് വിവരങ്ങള്ക്ക് [email protected] എന്ന ഇമെയില് വിലാസത്തില് ബന്ധപ്പെടാവുന്നതാണ്.
വാര്ത്താ സമ്മേളനത്തില് സ്കൂള് ആമസോണ് സി ഇ ഒ സനാഫിര് ഒ കെ, എബിറ്റ എ ഐ സി ഇ ഒ മുസ്തഫ സൈദലവി, ഫിറോസ് ഗോ മുസാഫിര്, സൈഫുദ്ദീന് മൊമെന്റം മീഡിയ എന്നിവര് പങ്കെടുത്തു.
