കൊച്ചി: രാജേഷ് മാധവന് ആദ്യമായി സംവിധാനം ചെയ്ത ചിത്രമാണ് പെണ്ണും പൊറാട്ടും. ഐ എഫ് എഫ് ഐയില് പ്രീമിയര് നടന്ന ചിത്രത്തിന് ഐ എഫ് എഫ് കെയിലും നിറഞ്ഞ കയ്യടി ലഭിച്ചിരുന്നു. തിയേറ്റര് റിലീസിലും മികച്ച പ്രേക്ഷക- നിരൂപക പ്രശംസ നേടിയ ചിത്രം സമീപകാലത്ത് തിയേറ്റര് റിലീസിന് മുന്പേ ഒടിടി അവകാശം വില്ക്കാന് കഴിഞ്ഞ മലയാളത്തിലെ അപൂര്വ്വം ചിത്രങ്ങളില് ഒന്നാണ്.
നെറ്റ്ഫ്ളിക്സ് ആണ് ചിത്രത്തിന്റെ സ്ട്രീമിംഗ് അവകാശം സ്വന്തമാക്കിയിരുന്നത്. ഇപ്പോള് പെണ്ണും പൊറാട്ടും സിനിമ ഒടിടിയില് സ്ട്രീമിംഗ് ആരംഭിച്ചിരിക്കുകയാണ്. മലയാളത്തിനൊപ്പം ഹിന്ദി, തമിഴ്, തെലുങ്ക്, കന്നഡ ഭാഷകളിലും പ്ലാറ്റ്ഫോമിലൂടെ പ്രേക്ഷകര്ക്ക് കാണാനാവും.
സുട്ടു എന്ന നായയാണ് ചിത്രത്തിലെ കേന്ദ്ര കഥാപാത്രം. ടൊവിനോ തോമസ് ആണ് ഈ നായയ്ക്ക് ശബ്ദം പകര്ന്നിരിക്കുന്നത് എന്നതും കൗതുകം. ഫാന്റസിയും സോഷ്യല് സറ്റയറും ചേര്ത്തിണക്കുന്ന കഥാപരിസരമാണ് ചിത്രത്തിന്റേത്. കര്ഷകത്തൊഴിലാളികളും യുവാക്കളും അടങ്ങുന്ന സാധാരണക്കാരായ ഗ്രാമവാസികളാണ് ചിത്രത്തിലെ മറ്റ് കഥാപാത്രങ്ങള്. കോമഡിയിലും ആക്ഷനിലും ഉള്പ്പെടെ, ഭൂരിഭാഗം കഥാപാത്രങ്ങളും പുതുമുഖങ്ങളാണ് അവതരിപ്പിക്കുന്നത്, എന്നതാണ് ചിത്രത്തിന്റെ മറ്റൊരു പ്രത്യേകത. മഹേഷിന്റെ പ്രതികാരം, ആന്ഡ്രോയിഡ് കുഞ്ഞപ്പന്, ന്നാ താന് കേസ് കൊട് തുടങ്ങിയ സിനിമകളിലൂടെ മലയാള സിനിമയില് പുതുമകള് അവതരിപ്പിച്ച നിര്മ്മാതാവ് സന്തോഷ് ടി കുരുവിളയുടെ എസ്ടികെ ഫ്രെയിംസ് ആണ് ചിത്രം നിര്മ്മിച്ചത്.
കാസ്റ്റിംഗ് ഡയറക്ടറായി തുടക്കം കുറിച്ച് പിന്നീട് അഭിനേതാവായും നായകനായും ശ്രദ്ധ നേടിയ രാജേഷ് മാധവന് ഇപ്പോള് സംവിധായകനായി ‘പെണ്ണും പൊറാട്ടും’ അവതരിപ്പിക്കുമ്പോള്, അദ്ദേഹത്തിന്റെ മുന് അനുഭവങ്ങളും ചലച്ചിത്ര മേളകളിലെ അംഗീകാരങ്ങളും സിനിമയെ കുറിച്ചുള്ള പ്രേക്ഷക പ്രതീക്ഷകള് ഉയര്ത്തിയിരുന്നു. ഐ എഫ് എഫ് കെയ്ക്ക് മുന്പ് ഗോവയില് ഗാല പ്രീമിയര് വിഭാഗത്തിലും ചിത്രം പ്രദര്ശിപ്പിക്കപ്പെട്ടിരുന്നു.
മമ്മൂട്ടിയെ നായകനാക്കി അമല് നീരദ് സംവിധാനം ചെയ്ത ‘ഭീഷ്മ പര്വ്വം’, ‘റാണി പത്മിനി’ തുടങ്ങിയ ചിത്രങ്ങളുടെ രചനാ പങ്കാളിയായ രവിശങ്കര് ആണ് ചിത്രത്തിന്റെ കഥ, തിരക്കഥ, സംഭാഷണം ഒരുക്കിയിരിക്കുന്നത്. സബിന് ഉരളിക്കണ്ടി ഛായാഗ്രഹണം നിര്വ്വഹിക്കുന്ന ചിത്രത്തിന്റെ എഡിറ്റിംഗ് ചമന് ചാക്കോയാണ് നിര്വഹിച്ചത്.
