ദോഹ: അധിനിവേശ ജറുസലേമിലെ ഫലസ്തീന് അഭയാര്ഥികള്ക്കായുള്ള യു എന് റിലീഫ് ആന്ഡ് വര്ക്ക്സ് ഏജന്സി (യു എന് ആര് ഡബ്ല്യു എ) ആസ്ഥാനത്ത് ഇസ്രായേല് കുടിയേറ്റക്കാര് നടത്തിയ ആക്രമണത്തെ ശക്തമായ ഭാഷയില് ഖത്തര് അപലപിച്ചു. അന്താരാഷ്ട്ര നിയമങ്ങളോടുള്ള വെല്ലുവിളിയും അഭിപ്രായ സ്വാതന്ത്ര്യത്തിന്റെ മറവില് നഗ്നമായ ഭീഷണിയുമാണിതെന്ന് ഖത്തര് കുറ്റപ്പെടുത്തി.
ആസൂത്രിത ഇസ്രായേല് ലക്ഷ്യം ഗാസ മുനമ്പിലുള്ള ദശലക്ഷക്കണക്കിന് ഫലസ്തീനികളെ ലക്ഷ്യമിടുന്നതായി വിദേശകാര്യ മന്ത്രാലയം പ്രസ്താവനയില് മുന്നറിയിപ്പ് നല്കി.
വിനാശകരമായ മാനുഷിക പ്രത്യാഘാതങ്ങള് ഒഴിവാക്കാന് അന്താരാഷ്ട്ര സമൂഹം ഉറച്ചുനില്ക്കേണ്ടതിന്റെ ആവശ്യകത മന്ത്രാലയം ഊന്നിപ്പറഞ്ഞു.
വിദേശകാര്യ മന്ത്രാലയം യു എന് ആര് ഡബ്ല്യു എയ്ക്ക് ഖത്തറിന്റെ പൂര്ണ്ണ പിന്തുണ പുതുക്കി. സഹോദരങ്ങളായ ഫലസ്തീന് ജനതയുടെ നിയമാനുസൃതമായ അവകാശങ്ങള്ക്കായുള്ള ഉറച്ചതും പിന്തുണയ്ക്കുന്നതുമായ നിലപാടിനെ അടിസ്ഥാനമാക്കി 1967-ലെ അതിര്ത്തികളില് സ്വതന്ത്ര രാഷ്ട്രം സ്ഥാപിക്കാനുള്ള അവരുടെ അവകാശമാണ് ഏറ്റവും പ്രധാനമെന്നും ഖത്തര് പറഞ്ഞു.
