ദോഹ: സംസ്കൃതി ഖത്തറിന്റെ ആഭിമുഖ്യത്തില് ഹമദ് മെഡിക്കല് കോര്പ്പറേഷന് ബ്ലഡ് ഡോണര് സെന്ററിന്റെ സഹകരണത്തോടെ രക്തദാന ക്യാമ്പ് സംഘടിപ്പിച്ചു.
രക്തദാന ക്യാമ്പിന്റെ ഉദ്ഘാടനം ഖത്തര് ഇന്ത്യന് എംബസി ഫസ്റ്റ് സെക്രട്ടറി സച്ചിന് ദിനകര് ശംഖ്പാല് നിര്വ്വഹിച്ചു. സംസ്കൃതിയുടെ ജീവ കാരുണ്യ പ്രവര്ത്തനങ്ങള് മാതൃകാപരവും അഭിനന്ദനര്ഹവുമാണെന്ന് അദ്ദേഹം അഭിപ്രായപ്പെട്ടു.
ഹമ്മദ് ബ്ലഡ് ഡോണേഷന് സെന്റര് മാനേജര് സദീഖ അല് മഹമൂദി ചടങ്ങില് ബ്ലഡ് ബാങ്കിന്റെ സേവനങ്ങളെക്കുറിച്ചും രക്തദാനത്തിന്റെ പ്രധാന്യത്തെ കുറിച്ചും വിശദീകരിച്ചു.
സംസ്കൃതി ബിന് ഒമ്രാന് യൂണിറ്റ് പ്രസിഡന്റ് ജിതിന് ചക്കോത്ത് അധ്യക്ഷത വഹിച്ചു. സംസ്കൃതി പ്രസിഡന്റ് സാബിത്ത് സഹീര്, ജനറല് സെക്രട്ടറി ഷംസീര് അരിക്കുളം, ഡോ. കുട്ടീസ് മെഡിക്കല് സെന്റര് പ്രതിനിധി ഡോ.ഗോപാല് ശങ്കര്, ഹരീഷ് വലിയേടത്ത്, സംസ്കൃതി സാമൂഹിക സേവന വിഭാഗം കണ്വീനര് സന്തോഷ് ഓ കെ, സംസ്കൃതി കേന്ദ്ര കമ്മിറ്റി അംഗങ്ങള് തുടങ്ങിയവര് ചടങ്ങില് പങ്കെടുത്തു.
സംസ്കൃതി ബിന് ഒമ്രാന് യൂണിറ്റ് സെക്രട്ടറി രാജു വി കെ സ്വാഗതവും ഓര്ഗനൈസിംഗ് കമ്മറ്റി കണ്വീനര് ഇതിയാസ് ബിബിന് നന്ദിയും പറഞ്ഞു.
ക്യാമ്പില് സ്ത്രീകള് ഉള്പ്പെടെ 150 ഓളം അംഗങ്ങളാണ് രക്തം ദാനം ചെയ്തത്. ക്യാമ്പില് കുട്ടീസ് മെഡിക്കല് സെന്ററിന്റെ സൗജന്യ ഡോക്ടര് കണ്സല്ട്ടേഷന്, വിവിധ സൗജന്യ മെഡിക്കല് സേവനങ്ങള് എന്നിവ ഒരുക്കിയിരുന്നു.
