ദോഹ: ഖത്തര് ടൂറിസം മേഖല നേരിടുന്ന എല്ലാ പ്രതിബന്ധങ്ങളും പരിഹരിക്കാനും രാജ്യത്തിന്റെ മൊത്തത്തിലുള്ള പുരോഗതിക്കൊപ്പം വികസനത്തിനും ലക്ഷ്യമിട്ട് നടപടിക്രമങ്ങളും നിയന്ത്രണങ്ങളും കാര്യക്ഷമമാക്കുന്ന പദ്ധതികളും തന്ത്രങ്ങളും വികസിപ്പിക്കുന്നതിലാണ് ശ്രദ്ധ കേന്ദ്രീകരിക്കുന്നതെന്ന് ഖത്തര് ടൂറിസം ചെയര്മാന് സഅദ് ബിന് അലി ബിന് സഅദ് അല് ഖര്ജി പറഞ്ഞു.
സമീപ വര്ഷങ്ങളില് ഖത്തര് ടൂറിസം മേഖല ഗണ്യമായ വികസനത്തിന് സാക്ഷ്യം വഹിച്ചതായി അദ്ദേഹം ചൂണ്ടിക്കാട്ടി. ഖത്തര് നാഷണല് വിഷന് 2030ന് കീഴില് സാമ്പത്തിക വൈവിധ്യവല്ക്കരണത്തിനുള്ള രാജ്യത്തിന്റെ തന്ത്രത്തിന്റെ പ്രധാന സ്തംഭങ്ങളിലൊന്നാണ് ഇതെന്ന് അദ്ദേഹം ഊന്നിപ്പറഞ്ഞു. ഹയ്യ കാര്ഡ് അത്യാധുനികവും അനുയോജ്യവുമായ രീതിയില് വികസിപ്പിക്കുന്നതിനുള്ള നിരവധി പദ്ധതികള് നടന്നുവരികയാണെന്ന് അദ്ദേഹം പറഞ്ഞു.
ലോകമെമ്പാടുമുള്ള ആളുകള്ക്ക് ഖത്തര് സന്ദര്ശിക്കാനും പ്രവേശിക്കാനും അനുവദിക്കുന്ന ഫിഫ ലോകകപ്പ് ഖത്തര് 2022 കാലത്ത് ഹയ്യ കാര്ഡ് അവതരിപ്പിച്ചത് ഈ വര്ഷം ഫെബ്രുവരിയില് നീട്ടിയിരുന്നു.
ഖത്തര് ചേംബര് സംഘടിപ്പിച്ച യോഗത്തില് ഖത്തര് ചേംബര് ചെയര്മാന് ശൈഖ് ഖലീഫ ബിന് ജാസിം അല്താനി, ഖത്തര് ചേംബര് ഫസ്റ്റ് വൈസ് ചെയര്മാന് മുഹമ്മദ് ബിന് ത്വാര് അല് കുവാരി, ബോര്ഡ് അംഗവും ടൂറിസം കമ്മിറ്റി ചെയര്മാനുമായ ശൈഖ് ഹമദ് ബിന് അഹമ്മദ് അല്താനി എന്നിവര് സംസാരിച്ചു.
