ദോഹ: നികുതി അനുസരണക്ഷമത വര്ധിപ്പിക്കുന്നതിനുള്ള തുടര്ച്ചയായ ശ്രമങ്ങളുടെ ഭാഗമായി എക്സൈസ് നികുതി നിയമം ലംഘിച്ചതായി കണ്ടെത്തിയ നിരവധി റീട്ടെയില് സ്ഥാപനങ്ങള്ക്കെതിരെ നടപടിയെടുത്തതായി ജനറല് ടാക്സ് അതോറിറ്റി അറിയിച്ചു. പുകയില ഉത്പന്നങ്ങളുടെ അനധികൃത വ്യാപാരം തടയുന്നതിനായി നടത്തിവരുന്ന നിയന്ത്രണ ക്യാമ്പെയ്നുകളുടെ ഭാഗമായാണ് ഈ നടപടി.
അതോറിറ്റിയുടെ പരിശോധന സംഘം അംഗീകൃത നികുതി സ്റ്റാമ്പുകള് ഇല്ലാതെയും അംഗീകരിച്ച മാനദണ്ഡങ്ങള് പാലിക്കാതെയും വിപണിയില് വില്പ്പനയ്ക്കുണ്ടായിരുന്ന 5,000-ത്തിലധികം പാക്കറ്റ് പുകയില ഉത്പന്നങ്ങള് പിടിച്ചെടുക്കുകയും കണ്ടുകെട്ടുകയും ചെയ്തു.
നിയമലംഘനം നടത്തിയ സ്ഥാപനങ്ങളുടെ ഉടമകള്ക്കെതിരെ നിയമ റിപ്പോര്ട്ടുകള് തയ്യാറാക്കിയിട്ടുണ്ടെന്നും നിലവിലുള്ള നിയമങ്ങള് അനുസരിച്ച് ആവശ്യമായ നിയമനടപടികള് സ്വീകരിക്കുന്നതിനുള്ള നടപടികള് പുരോഗമിക്കുകയാണെന്നും അതോറിറ്റി വ്യക്തമാക്കി.
പുകയില ഉത്പന്നങ്ങളുടെ അനധികൃത വ്യാപാരം കണ്ടെത്തുകയും തടയുകയും ചെയ്യുന്നതിനായി സപ്ലൈ ചെയിനുകളുടെ വിശകലനവും ഓഡിറ്റും ഉള്പ്പെടുന്ന അതോറിറ്റിയുടെ തുടര്ച്ചയായ പരിശോധന ക്യാമ്പെയ്നുകളുടെ ഭാഗമായാണ് ഈ നടപടികള്.
ഇത്തരത്തിലുള്ള നടപടികള് വ്യക്തികളുടെ ജീവിത നിലവാരം മെച്ചപ്പെടുത്തുന്നതിനും പുകവലിയുടെ വ്യാപനം കുറയ്ക്കുന്നതിനും ലക്ഷ്യമിടുന്ന മൂന്നാം ദേശീയ വികസന തന്ത്രം (2024- 2030)യുമായി ഒത്തുചേരുന്നതാണെന്ന് അതോറിറ്റി അറിയിച്ചു.
ഉldhാദനത്തിനും ഇറക്കുമതിക്കും നികുതി ചുമത്തുന്നതിനിലൂടെ പുകയിലയും അതിന്റെ ഉപോത്പന്നങ്ങളും ഉണ്ടാക്കുന്ന ആരോഗ്യ അപകടങ്ങളില് നിന്ന് സമൂഹത്തെ സംരക്ഷിക്കുകയാണ് ദേശീയ ആരോഗ്യ തന്ത്രത്തിന്റെ ലക്ഷ്യം. ഈ ലക്ഷ്യങ്ങളോടും ജനറല് ടാക്സ് അതോറിറ്റിയുടെ പ്രവര്ത്തനങ്ങള് പൊരുത്തപ്പെടുന്നതാണെന്ന് പ്രസ്താവനയില് വ്യക്തമാക്കി.
എക്സൈസ് നികുതിക്ക് വിധേയമായ ഉത്പന്നങ്ങളില് പതിക്കുന്ന, എന്ക്രിപ്റ്റുചെയ്ത ഡാറ്റ ഉള്ക്കൊള്ളുന്ന ഭൗതിക ലേബല് അല്ലെങ്കില് ഡിജിറ്റല് കോഡ് രൂപത്തിലുള്ള പ്രത്യേക അടയാളമാണ് നികുതി സ്റ്റാമ്പ് എന്നത് പ്രത്യേകം ശ്രദ്ധിക്കേണ്ടതാണ്.
ജനറല് ടാക്സ് അതോറിറ്റി നികുതി സ്റ്റാമ്പ് സംവിധാനത്തിന്റെ ഒന്നാംഘട്ടവും രണ്ടാംഘട്ടവും 2022-ല് ആരംഭിച്ചുവെന്നും മൂന്നാംഘട്ടം 2023 തുടക്കത്തില് പ്രാദേശിക വിപണികളില് നടപ്പിലാക്കിയതാണെന്നും അറിയിച്ചു.
ഈ ഘട്ടപ്രകാരം, പ്രാദേശിക വിപണികളില് വിതരണം ചെയ്യുന്ന എല്ലാ പുകയില ഉത്പന്നങ്ങളും അതിന്റെ ഉപോത്പന്നങ്ങളും അംഗീകൃത നികുതി സ്റ്റാമ്പുകള് ധരിച്ചിരിക്കണം.
പുകയില ഉത്പന്നങ്ങളുടെ അനധികൃത വ്യാപാരം നിരീക്ഷിക്കുന്നതിനായി പരിശോധന ക്യാമ്പെയ്നുകള് തുടരുമെന്ന് ജനറല് ടാക്സ് അതോറിറ്റി ആവര്ത്തിച്ചു വ്യക്തമാക്കിയതോടൊപ്പം നിയമപരമായ ഉത്തരവാദിത്വങ്ങള് ഒഴിവാക്കുന്നതിനായി ബന്ധപ്പെട്ട എല്ലാ സ്ഥാപനങ്ങളും നികുതി നിയമങ്ങളും അനുബന്ധ ചട്ടങ്ങളും കര്ശനമായി പാലിക്കണമെന്ന് ആവശ്യപ്പെട്ടു.
അതോടൊപ്പം, സിഗരറ്റുകളും മറ്റ് പുകയില ഉത്പന്നങ്ങളും ഇറക്കുമതി ചെയ്യുന്നവര് എക്സൈസ് ഉത്പന്നങ്ങളുടെ ട്രാക്ക് ആന്ഡ് ട്രേസ് സംവിധാനത്തിന്റെ ഭാഗമായി ‘ധരീബ’ പ്ലാറ്റ്ഫോമില് രജിസ്റ്റര് ചെയ്യണമെന്ന് അതോറിറ്റി അഭ്യര്ഥിച്ചു. സാധുവായതും സജീവമാക്കിയതുമായ എക്സൈസ് നികുതി സ്റ്റാമ്പുകള് ഇല്ലാതെ രാജ്യത്തിനുള്ളില് യാതൊരു എക്സൈസ് ഉത്പന്നങ്ങളും ഇറക്കുമതി ചെയ്യുകയോ വിതരണം ചെയ്യുകയോ അനുവദനീയമല്ലെന്നും അതോറിറ്റി വ്യക്തമാക്കി.
