ദോഹ: ഹമദ് മെഡിക്കല് കോര്പ്പറേഷന്റെ പുകയില നിയന്ത്രണ കേന്ദ്രത്തിന്റെ ശ്രമങ്ങളുടെ ഭാഗമായി സെന്ട്രല് മുനിസിപ്പല് കൗണ്സില് എച്ച് എം സിയില് നിന്നുള്ള പുകയില നിയന്ത്രണ കേന്ദ്രത്തിന്റെ ശ്രമങ്ങളും തുടര്ച്ചയായി ‘പുകയില രഹിത മജ്ലിസിനുവേണ്ടി ഒരുമിച്ച്’ സംരംഭവും അവതരിപ്പിക്കുന്നു.
ലോകാരോഗ്യ സംഘടനയുടെ അംഗീകൃത കേന്ദ്രമായ ഹമദ് മെഡിക്കല് കോര്പറേഷനിലെ പുകയില നിയന്ത്രണ കേന്ദ്രം ഡയറക്ടര് ഡോ. അഹമ്മദ് മുഹമ്മദ് അല് മുല്ലയുടെ നേതൃത്വത്തിലാണ് സംഘത്തെ നയിച്ചത്. സംഘത്തില് ഡോ. മഹാ അല് മുഹന്നദി, ഡോ. ജമാല് ബസേഹി, നൂര് എല് നഖീബ് എന്നിവരും ഉണ്ടായിരുന്നു.
പുകവലി വിരുദ്ധ പ്രവര്ത്തനങ്ങളുടെ ഫലപ്രാപ്തി വര്ധിപ്പിക്കുന്നതിന് മുനിസിപ്പല് കൗണ്സിലുമായി പരസ്പര സഹകരണത്തിനുള്ള വഴികള് ചര്ച്ച ചെയ്യുന്നതിനും ‘പുകവലി രഹിത മജ്ലിസിനുവേണ്ടി ഒരുമിച്ച്’ എന്ന സംരംഭത്തെ പിന്തുണയ്ക്കുന്നതിനുമായിരുന്നു യോഗത്തിന്റെ ലക്ഷ്യം. സെന്ട്രല് മുനിസിപ്പല് കൗണ്സിലിന്റെ അധികാരപരിധിക്കുള്ളില് പുകവലി പ്രശ്നം പരിഹരിക്കുന്നതിനുള്ള തന്ത്രങ്ങളെക്കുറിച്ചുള്ള ചര്ച്ചയുടെ ഭാഗമായാണ് കൂടിക്കാഴ്ച നടന്നത്. സെന്ട്രല് മുനിസിപ്പല് കൗണ്സില്, ജനറല് സെക്രട്ടേറിയറ്റ് അംഗങ്ങള് യോഗത്തില് പങ്കെടുത്തു.
പുകവലി നിയന്ത്രണത്തില് ഖത്തറിന്റെ യാത്ര, പുകയില നിയന്ത്രണ കേന്ദ്രത്തിന്റെ കാഴ്ചപ്പാട്, ചികിത്സാ രീതികള്, പുകവലി വിരുദ്ധ പ്രവര്ത്തനങ്ങളുടെ ഭാഗമായി കേന്ദ്രം നല്കുന്ന സൗകര്യങ്ങള് എന്നിവ ഡോ. അല് മുല്ല അവലോകനം ചെയ്തു. പുകവലിയുടെ ദൂഷ്യഫലങ്ങള്, പുകവലി പ്രശ്നത്തിന്റെ തോത്, ഖത്തറിലെ ഇറക്കുമതി ചെയ്യുന്ന പുകയിലയുടെ അളവ് എന്നിവയെക്കുറിച്ചുള്ള ആഗോള സ്ഥിതിവിവരക്കണക്കുകള് ഡോ. അല് മുല്ല അവതരിപ്പിച്ചു.
