മനാമ: ഇറാന്‍ ആക്രമണങ്ങള്‍ ആരംഭിച്ചതിന് ശേഷം ബഹ്‌റൈനെ ലക്ഷ്യമിട്ട് വന്ന 147 മിസൈലുകളും 282 ഡ്രോണുകളും പ്രതിരോധ സംവിധാനങ്ങള്‍ തകര്‍ത്ത് വീഴ്ത്തിയതായി ബഹ്‌റൈന്‍ അറിയിച്ചു. ബഹ്‌റൈന്‍ ന്യൂസ് ഏജന്‍സി പുറത്തുവിട്ട പ്രസ്താവനയിലാണ് ഈ വിവരം അറിയിച്ചത്.
നിലവിലുള്ള സംഘര്‍ഷാവസ്ഥയില്‍ രാജ്യം ലക്ഷ്യമിട്ട് വിക്ഷേപിച്ച ഈ ആയുധങ്ങളെ പ്രതിരോധിക്കാന്‍ വായു പ്രതിരോധ സംവിധാനങ്ങള്‍ സജീവമായി പ്രവര്‍ത്തിച്ചതായി ബഹ്‌റൈന്‍ പ്രതിരോധ സേനയുടെ ജനറല്‍ കമാന്‍ഡ് വ്യക്തമാക്കി.
സിവിലിയന്‍ ലക്ഷ്യങ്ങളെയും സ്വകാര്യ സ്വത്തുക്കളെയും ലക്ഷ്യമിട്ട് ബാലിസ്റ്റിക് മിസൈലുകളും ഡ്രോണുകളും ഉപയോഗിക്കുന്നത് അന്താരാഷ്ട്ര മനുഷ്യാവകാശ നിയമങ്ങളുടെയും യു എന്‍ ചാര്‍ട്ടറിന്റെയും ലംഘനമാണെന്ന് അധികൃതര്‍ പറഞ്ഞു.
ഈ ആക്രമണങ്ങള്‍ പ്രാദേശിക സമാധാനത്തിനും സുരക്ഷയ്ക്കും നേരിട്ടുള്ള ഭീഷണിയാണെന്നും പ്രസ്താവനയില്‍ കൂട്ടിച്ചേര്‍ത്തു.
പ്രദേശത്ത് സംഘര്‍ഷം ശക്തമാകുന്നതിനിടെ വിവിധ രാജ്യങ്ങള്‍ വായു പ്രതിരോധ സംവിധാനങ്ങള്‍ സജീവമാക്കുകയും അടിസ്ഥാന സൗകര്യങ്ങളും സാധാരണജനങ്ങളെയും സംരക്ഷിക്കാന്‍ മുന്‍കരുതല്‍ നടപടികള്‍ സ്വീകരിക്കുകയും ചെയ്യുന്ന സാഹചര്യത്തിലാണ് ഈ റിപ്പോര്‍ട്ട് പുറത്തുവന്നത്.
