മുംബൈ: ഇന്ത്യന്‍ സിനിമയിലെ ശ്രദ്ധേയ നടനും ദേശീയ പുരസ്‌കാര ജേതാവുമായ നാനാ പടേക്കര്‍ (75) അന്തരിച്ചു. ഇന്ന് പുലര്‍ച്ചെ മുംബൈയിലെ വസതിയില്‍ ഹൃദയാഘാതത്തെ തുടര്‍ന്നായിരുന്നു അന്ത്യം.
ഹൃദയാഘാതമുണ്ടായതിനെ തുടര്‍ന്ന് അടിയന്തര ചികിത്സ നല്‍കിയെങ്കിലും ജീവന്‍ രക്ഷിക്കാനായില്ലെന്ന് എ എന്‍ ഐ റിപ്പോര്‍ട്ട് ചെയ്തു. 45 മിനിറ്റോളം തുടര്‍ച്ചയായി സിപിആര്‍ നല്‍കിയെങ്കിലും പ്രതികരണമുണ്ടായില്ലെന്നാണ് റിപ്പോര്‍ട്ട്. സംഭവത്തില്‍ മെഡിക്കോ- ലീഗല്‍ കേസ് (എംഎല്‍സി) രജിസ്റ്റര്‍ ചെയ്തിട്ടുണ്ട്. മണിപ്പാല്‍ ആശുപത്രിയിലെ ഓങ്കോളജി വിഭാഗം മേധാവി ഡോ. ശേഖര്‍ സകല്‍ക്കര്‍ പോസ്റ്റ്‌മോര്‍ട്ടത്തിന് നേതൃത്വം നല്‍കുമെന്നും റിപ്പോര്‍ട്ടില്‍ പറയുന്നു.
അഞ്ച് പതിറ്റാണ്ട് നീണ്ട അഭിനയജീവിതം
വിശ്വനാഥ് പടേക്കര്‍ എന്ന യഥാര്‍ഥ പേരുള്ള നാനാ പടേക്കര്‍ ഹിന്ദി, മറാത്തി സിനിമകളില്‍ ശക്തമായ കഥാപാത്രങ്ങളിലൂടെ ശ്രദ്ധേയനായ താരമായിരുന്നു. അഞ്ച് പതിറ്റാണ്ടിനടുത്ത് നീണ്ട അഭിനയജീവിതത്തില്‍ വ്യത്യസ്തവും വെല്ലുവിളി നിറഞ്ഞതുമായ കഥാപാത്രങ്ങളെ അവതരിപ്പിച്ച് ഇന്ത്യന്‍ സിനിമയിലെ മികച്ച അഭിനേതാക്കളിലൊരാളായി അദ്ദേഹം അംഗീകരിക്കപ്പെട്ടു.
മഹാരാഷ്ട്രയിലെ നിലവിലെ റായ്ഗഡ് ജില്ലയില്‍ ഉള്‍പ്പെടുന്ന മുരുഡ്- ജന്‍ജിറയില്‍ ഒരു മറാത്തി കുടുംബത്തിലാണ് ജനനം. നാടകവേദിയിലൂടെയാണ് അഭിനയരംഗത്തേക്ക് എത്തിയത്. പിന്നീട് സിനിമയില്‍ തന്റേതായ ഇടം നേടിയ അദ്ദേഹം ഗൗരവമേറിയതും വ്യത്യസ്തവുമായ കഥാപാത്രങ്ങളിലൂടെ ശ്രദ്ധേയനായി.
1978-ല്‍ പുറത്തിറങ്ങിയ ‘ഗമന്‍’ എന്ന ചിത്രത്തിലൂടെയാണ് സിനിമാരംഗത്തെ അരങ്ങേറ്റം. തുടര്‍ന്ന് പരിന്ദ, ക്രാന്തിവീര്‍, അഗ്നിസാക്ഷി, അബ് തക് ഛപ്പന്‍, വെല്‍ക്കം തുടങ്ങിയ നിരവധി ചിത്രങ്ങളില്‍ ശ്രദ്ധേയ വേഷങ്ങള്‍ അവതരിപ്പിച്ചു.
ഗൗരവമേറിയ നാടകങ്ങള്‍ മുതല്‍ കുറ്റാന്വേഷണ കഥകള്‍, ഹാസ്യചിത്രങ്ങള്‍, സാമൂഹിക പ്രസക്തിയുള്ള സിനിമകള്‍ തുടങ്ങി വിവിധ വിഭാഗങ്ങളിലുള്ള ചിത്രങ്ങളില്‍ അദ്ദേഹം അഭിനയിച്ചു. കഥാപാത്രങ്ങളുടെ തീവ്രമായ അവതരണശൈലിയായിരുന്നു നാനാ പടേക്കറുടെ പ്രധാന സവിശേഷതകളിലൊന്ന്.
അഭിനയത്തിന് പുറമെ തിരക്കഥാകൃത്ത്, സംവിധായകന്‍ എന്നീ നിലകളിലും നാനാ പടേക്കര്‍ സിനിമയില്‍ സാന്നിധ്യമറിയിച്ചു. അഭിനയ മികവിന് ദേശീയ ചലച്ചിത്ര പുരസ്‌കാരങ്ങളും ഫിലിംഫെയര്‍ പുരസ്‌കാരങ്ങളും ഉള്‍പ്പെടെ നിരവധി അംഗീകാരങ്ങള്‍ ലഭിച്ചിട്ടുണ്ട്.
മുംബൈയിലെ സര്‍ ജെ ജെ ഇന്‍സ്റ്റിറ്റ്യൂട്ട് ഓഫ് അപ്ലൈഡ് ആര്‍ട്ടില്‍ പഠിച്ച നാനാ പടേക്കര്‍ മറാത്തി നാടകവേദിയിലും ദീര്‍ഘകാലം പ്രവര്‍ത്തിച്ചു. നാടകവേദിയിലെ അനുഭവങ്ങള്‍ അദ്ദേഹത്തിന്റെ തിരക്കഥാരചനയിലും സംഭാഷണാവതരണത്തിലും കഥാപാത്രങ്ങളുടെ സൂക്ഷ്മമായ അവതരണത്തിലും വലിയ സ്വാധീനം ചെലുത്തി.
1991-ല്‍ പുറത്തിറങ്ങിയ ‘പ്രഹാര്‍: ദ ഫൈനല്‍ അറ്റാക്ക്’ എന്ന ആക്ഷന്‍- ഡ്രാമയിലൂടെയാണ് നാനാ പടേക്കര്‍ ഫീച്ചര്‍ ഫിലിം സംവിധായകനായി അരങ്ങേറ്റം കുറിച്ചത്. ചിത്രത്തില്‍ അദ്ദേഹം പ്രധാന വേഷത്തിലും അഭിനയിച്ചു. ഡിംപിള്‍ കപാഡിയ, മാധുരി ദീക്ഷിത്, ഗൗതം ജോഗ്ലേക്കര്‍ എന്നിവരും ചിത്രത്തില്‍ പ്രധാന വേഷങ്ങളിലെത്തി.
ഇന്ത്യന്‍ സൈന്യത്തിലെ ഒരു കമാന്‍ഡോയുടെ ജീവിതവും പരിശീലനവും അച്ചടക്കവും പ്രമേയമാക്കിയ ചിത്രം സൈനിക പരിശീലനത്തിന്റെ യാഥാര്‍ഥ്യബോധമുള്ള അവതരണത്തിന് നിരൂപക പ്രശംസ നേടി.
