കോഴിക്കോട്: രക്ത ബന്ധങ്ങളേക്കാള് ചിലപ്പോള് സുഹൃദ്ബന്ധങ്ങള് വളരാറുണ്ട്. പ്രത്യേകിച്ചും ജോലി സ്ഥലത്തെ ബന്ധങ്ങള്. ജീവിതത്തിന്റെ വഴിത്തിരിവുകളില് കണ്ടുമുട്ടി ആജീവനാന്ത മിത്രങ്ങളായവര് പലരുമുണ്ട. ആഴത്തില് വേരൂന്നി പുഷ്പിച്ച് പരിമളം പരത്തുന്ന അത്തരം ചില ബന്ധങ്ങളുടെ കഥയാണ് സൈനുദ്ദീനും കണ്ണനും പറയാനുള്ളത്. അര നൂറ്റാണ്ടിനോളം പഴക്കമുള്ള ആ സൗഹൃദം ഇതാ വീണ്ടും പൂത്തിരിക്കുന്നു. കോഴിക്കോട് ജില്ലയിലെ പ്രസിദ്ധമായ കുറ്റ്യാടിപുഴ ഒഴുകും വഴിയായ ഗുളികപ്പുഴയുടെ ഓളങ്ങള് പറയുന്ന ചേരാപുരത്തെ സൗഹൃദ വര്ത്തമാനം.
തിരുവനന്തപുരത്തുകാരന് സൈനുദ്ദീന് ഏറെ പണിപ്പെട്ടാണ് ഈ ഗ്രാമത്തിലെത്തിയത്. തന്റെ സുഹൃത്ത് കണ്ണനെ കാണാന്. ചേരാപുരത്തെ എടവന ചാലില് കണ്ണനെ തേടിയാണ് അദ്ദേഹമെത്തിയത്.
അര നൂറ്റാണ്ടിനപ്പുറത്ത് അഹമ്മദാബാദിലെ സ്റ്റാര് ബേക്കറിയില് ഒന്നിച്ച് ജോലി ചെയ്തതാണവര്. ചേരാപുരം അങ്ങാടിയിലുള്ള എടവന ചാലില് സൈനുദ്ദീന് എത്തുമ്പോള് കാലം അതിന്റെ വാതിലുകള് തുറന്നിട്ടു.
ജീവകാരുണ്യ പ്രവര്ത്തകനായ സൈനുദ്ദീന് തിരുവനന്തപുരം വിതുരയില് ‘മലബാര് ഹോട്ടല്’ നടത്തുന്നു. മലബാറിനോടുള്ള ഇഷ്ട്ടം കൊണ്ടാണ് ഹോട്ടലിന് അങ്ങിനെ പേര് നല്കിയത്. കണ്ണനുമായുള്ള കൂടിക്കാഴ്ച വളരെ സന്തോഷം നല്കുന്നു എന്ന് സൈനുദീന് പറഞ്ഞു. ജീവിതത്തിന്റെ തിരക്കിനിടയില് .സ്നേഹ ബന്ധങ്ങള്ക്ക് സമയം കണ്ടെത്താത്ത ഈ കാലത്ത് ഇരുവരുടെയും കൂടി കാഴ്ചകള് വിസ്മയകരം തന്നെയാണ്.
