വാഷിംഗ്ടണ്: ഹോര്മുസ് കടലിടുക്കിലൂടെ കടന്നുപോകുന്ന എണ്ണക്കപ്പലുകള് തടയാന് ഇറാന് ശ്രമിച്ചാല് അമേരിക്ക ഇരുപത് മടങ്ങ് ശക്തിയായി തിരിച്ചടിക്കുമെന്ന് ട്രംപിന്റെ മുന്നറിയിപ്പ്. എന്നാല് നിലവിലെ യുദ്ധാവസ്ഥ വളരെ പെട്ടെന്ന് അവസാനിക്കാനിടയുണ്ട് എന്നും ട്രംപ് പറഞ്ഞു.
ഇറാനില് പുതിയ പരമോന്നത നേതാവായി തെരഞ്ഞെടുക്കപ്പെട്ട മുജ്തബ ഖംനേയിക്ക് പിന്തുണ പ്രഖ്യാപിച്ച് രാജ്യത്തുടനീളം വന് ജനക്കൂട്ടങ്ങള് ഒന്നിച്ചുകൂടി. സംഘര്ഷത്തിന്റെ അവസാനം എപ്പോള് വരുമെന്നത് അമേരിക്കയല്ല, ഇറാനാണ് തീരുമാനിക്കുകയെന്നു തെഹ്റാന് വ്യക്തമാക്കി.
മധ്യപൂര്വ്വേഷ്യയിലെ അമേരിക്കന്- ഇസ്രായേല് താത്പര്യങ്ങളെ ലക്ഷ്യമിട്ട് ഇറാന് പ്രത്യാക്രമണങ്ങള് തുടരുകയാണെന്ന് റിപ്പോര്ട്ടുകള് പറയുന്നു. ബഹ്റൈന്, കുവൈത്ത്, സൗദി അറേബ്യ എന്നിവിടങ്ങളിലെ അമേരിക്കന് സൈനിക കേന്ദ്രങ്ങള്ക്കും ആക്രമണങ്ങള് ഉണ്ടായതായി വിവരം. ഇസ്രായേലില് കുറഞ്ഞത് രണ്ട് പേര് കൊല്ലപ്പെട്ടതായി റിപ്പോര്ട്ടുകളുണ്ട്.
അതേസമയം ഇസ്രായേലും ഹിസ്ബുള്ളയും തമ്മില് അതിര്ത്തി മേഖലയില് പരസ്പരം ആക്രമണം തുടരുകയാണ്. ലെബനോനില് ഇസ്രായേല് നടത്തിയ ആക്രമണങ്ങളില് ഇതുവരെ 486 പേരിലധികം പേര് കൊല്ലപ്പെട്ടതായി റിപ്പോര്ട്ടുകള് സൂചിപ്പിക്കുന്നു.
