കൊച്ചി: മഴവില്ല് വനിതാ ഫിലിം സൊസൈറ്റി ആഗസ്റ്റ് 9, 10, 11 തിയ്യതികളില് കോട്ടയം അനശ്വര തിയേറ്ററില് സംഘടിപ്പിക്കുന്ന മൂന്നാമത് അന്താരാഷ്ട്ര ചലച്ചിത്രമേളയില് ഐഷാ സുല്ത്താന സംവിധാനം ചെയ്ത ‘ഫ്ളഷ്’ പ്രദര്ശിപ്പിക്കും. അനശ്വര തിയേറ്ററില് 10ന് രാവിലെ 10 മണിക്കാണ് ചിത്രത്തിന്റെ പ്രദര്ശനം.
ലക്ഷദ്വീപില് നിന്നുള്ള ആദ്യ വനിതാ സംവിധായിക ഐഷാ സുല്ത്താന ഒരുക്കിയ ഫ്ളഷിന് മികച്ച പ്രതികരണമാണ് ലഭിച്ച് വരുന്നത്. കഴിഞ്ഞ ദിവസം നടന്ന അന്താരാഷ്ട്ര വനിതാ ചലച്ചിത്രമേളയില് നിറഞ്ഞ സദസ്സിലാണ് ചിത്രം പ്രദര്ശിപ്പിച്ചത്. സൂപ്പര് താരനിരയുള്ള ബിഗ്ബജറ്റ് ചിത്രങ്ങള്ക്ക് ലഭിക്കുമാറുള്ള പ്രേക്ഷക ശ്രദ്ധയാണ് നവാഗതരെ വച്ച് ഒരുക്കിയ ഫ്ളഷിന് ലഭിച്ചിരിക്കുന്നത്. ലക്ഷദ്വീപിന്റെ ഭൂപ്രകൃതി പശ്ചാത്തലമാക്കി ഒരുക്കിയ ഫ്ളഷ് ലക്ഷദ്വീപിന്റെ കഥ പറയുന്ന ചിത്രമാണ്.
കലാമൂല്യവും ജനപ്രിയവുമായ സിനിമയാണ് ഫ്ളഷെന്നും താനുള്പ്പെടെ ഒരുപാട് പേരുടെ വിയര്പ്പ് ആ ചിത്രത്തിന് പിന്നിലുണ്ടെന്നും ഐഷാ സുല്ത്താന പറയുന്നു. എത്രയോ പേരുടെ ദിവസങ്ങള് നീണ്ട അധ്വാനത്തിലൂടെയാണ് സിനിമ നിങ്ങളിലേക്ക് എത്തുന്നത്. എന്റെ നാടിന്റെ കഥയാണ് ആ സിനിമ പറയുന്നതെന്ന് ഐഷ സുല്ത്താന വ്യക്തമാക്കി.
പുതുമുഖ താരങ്ങളെയും ദ്വീപ് നിവാസികളെയും ഉള്പ്പെടുത്തിയാണ് ഫ്ളഷ് ചിത്രീകരിച്ചിരിക്കുന്നത്.
നായികാ പ്രാധാന്യമുള്ള ചിത്രത്തില് മുംബൈ മോഡലായ ഡിമ്പിള് പോള് ആണ് കേന്ദ്രകഥാപാത്രത്തെ അവതരിപ്പിക്കുന്നത്. ബീനാ കാസിം നിര്മ്മിച്ചിരിക്കുന്ന ഫ്ളഷിന്റെ ക്യാമറ കെ ജി രതീഷാണ് നിര്വ്വഹിച്ചിരിക്കുന്നത്. എഡിറ്റിംഗ്- നൗഫല് അബ്ദുല്ല, സംഗീതം- വില്യം ഫ്രാന്സിസ്, കൈലാഷ് മേനോന്, പി ആര് ഒ-
പി ആര് സുമേരന്.
