ദോഹ: അമീര്‍ ശൈഖ് തമീം ബിന്‍ ഹമദ് അല്‍താനി ലുസൈല്‍ പ്രാര്‍ഥന ഗ്രൗണ്ടില്‍ ഈദുല്‍ അദ്ഹ പ്രാര്‍ഥന നടത്തി.
അമീറിന്റെ വ്യക്തിഗത പ്രതിനിധി ശൈഖ് ജാസിം ബിന്‍ ഹമദ് അല്‍ താനി, ശൈഖ് അബ്ദുല്ല ബിന്‍ ഖലീഫ അല്‍ താനി, ശൈഖ് മുഹമ്മദ് ബിന്‍ ഖലീഫ അല്‍താനി, ശൂറ കൗണ്‍സില്‍ സ്പീക്കര്‍ ഹസന്‍ ബിന്‍ അബ്ദുല്ല അല്‍ ഗാനം, നിരവധി ശൈഖുമാര്‍, മന്ത്രിമാര്‍, ശൂറ കൗണ്‍സില്‍ അംഗങ്ങള്‍, രാജ്യത്തെ നിരവധി ഉന്നതരായ അംബാസഡര്‍മാര്‍, നയതന്ത്ര ദൗത്യങ്ങളുടെ തലവന്‍മാര്‍ തുടങ്ങിയവരും ഈദ് നമസ്‌ക്കാരത്തില്‍ പങ്കെടുത്തു.
കാസേഷന്‍ കോടതി ജഡ്ജിയും സുപ്രിം ജുഡീഷ്യറി കൗണ്‍സില്‍ അംഗവുമായ ശൈഖ് ഡോ. തഖീല്‍ ബിന്‍ സയര്‍ അല്‍ ഷമ്മാരി പ്രാര്‍ഥനയ്ക്ക് നേതൃത്വം നല്‍കുകയും ഈദ് പ്രഭാഷണം നടത്തുകയും ചെയ്തു.
ഈദ് അല്‍ അദ്ഹ ദൈവത്തിന്റെ പവിത്രമായ ആചരണമാണെന്ന് അദ്ദേഹം വിശദീകരിച്ചു. വിശ്വാസത്തിന്റെ മഹത്വവും മുസ്‌ലിംകള്‍ തമ്മിലുള്ള ഐക്യവും ഈ മഹത്തായ ദിനത്തില്‍ ഔദാര്യം, നീതി, വിശ്വസ്തത എന്നിവയുടെ പ്രാധാന്യം അദ്ദേഹം ഊന്നിപ്പറഞ്ഞു, ഇസ്ലാമിലെ ബലി അര്‍പ്പണത്തെ സംബന്ധിച്ച സുപ്രധാന വിധികള്‍ എടുത്തുകാണിച്ചു. ദൈവത്തോടുള്ള ആരാധനയെ പ്രേരിപ്പിക്കുകയും ഈ ആചാരത്തിലൂടെ അല്ലാഹുവിലേക്ക് അടുക്കുക എന്ന ഉദ്ദേശവും ഊന്നിപ്പറയുകയും ചെയ്തു.
ആത്മാക്കളുടെ ശുദ്ധീകരണം, ഹൃദയങ്ങളെ നന്നാക്കല്‍, കുടുംബബന്ധങ്ങള്‍ ശക്തിപ്പെടുത്തല്‍, സമൂഹത്തിനുള്ളിലെ സാഹോദര്യബന്ധം വര്‍ധിപ്പിക്കല്‍ എന്നിവയും അദ്ദേഹം ഉദ്‌ബോധിപ്പിച്ചു. നേതാക്കളെ അനുസരിക്കാനും അവര്‍ക്കുവേണ്ടി പ്രാര്‍ഥിക്കാനും മുസ്ലിം സഭയോട് ചേര്‍ന്നുനില്‍ക്കാനുമുള്ള ബാധ്യത അദ്ദേഹം വിശ്വാസികളെ ഓര്‍മ്മിപ്പിച്ചു.
