ഹനോയ്: വിയറ്റ്നാമില് നിന്ന് പുറപ്പെട്ട ചരക്ക് കപ്പല് ദക്ഷിണ ചൈനാ കടലില് മുങ്ങിയതിനെ തുടര്ന്ന് 45 പേരെ രക്ഷപ്പെടുത്തിയതായി വിയറ്റ്നാം വിദേശകാര്യ മന്ത്രാലയം അറിയിച്ചു. കപ്പലിലുണ്ടായിരുന്ന 62 പേരില് 17 പേരെ ഇനിയും കണ്ടെത്താനായിട്ടില്ല.
സംഭവത്തെ തുടര്ന്ന് വിയറ്റ്നാം അധികൃതര് അടിയന്തര രക്ഷാപ്രവര്ത്തനം ആരംഭിച്ചതായി വിദേശകാര്യ മന്ത്രാലയ വക്താവ് ഫാം തു ഹാങ് അറിയിച്ചു. ചൈനീസ് തിരച്ചില്- രക്ഷാ സംഘങ്ങളുടെയും സമീപ പ്രദേശങ്ങളില് സഞ്ചരിച്ചുകൊണ്ടിരുന്ന മറ്റ് കപ്പലുകളുടെയും സഹകരണത്തോടെയാണ് രക്ഷാപ്രവര്ത്തനം നടക്കുന്നതെന്നും അവര് വ്യക്തമാക്കി.
ശക്തമായ കാറ്റും ഉയര്ന്ന തിരമാലകളും നാവിക ഗതാഗതത്തെ സാരമായി ബാധിച്ചിരുന്ന സ്പ്രാറ്റ്ലി ദ്വീപുകള്ക്ക് സമീപമുള്ള സമുദ്ര മേഖലയിലാണ് അപകടം സംഭവിച്ചതെന്ന് വക്താവ് പറഞ്ഞു.
കാണാതായവരെ കണ്ടെത്തുന്നതിനായി ലഭ്യമായ എല്ലാ സംവിധാനങ്ങളും വിന്യസിച്ചിട്ടുണ്ടെന്നും ഇരു രാജ്യങ്ങളിലെയും ബന്ധപ്പെട്ട അധികൃതര് തമ്മിലുള്ള അടുത്ത ഏകോപനത്തോടെ രക്ഷാപ്രവര്ത്തനം തുടരുകയാണെന്നും ഫാം തു ഹാങ് അറിയിച്ചു.
ലോകത്തിലെ ഏറ്റവും തിരക്കേറിയ സമുദ്ര വ്യാപാര പാതകളിലൊന്നാണ് ദക്ഷിണ ചൈനാ കടല്. ഈ മേഖലയിലെ ചില ഭാഗങ്ങളില് കാലാവസ്ഥാ സാഹചര്യങ്ങള് പെട്ടെന്ന് മാറുന്നതിനാല്, പ്രത്യേകിച്ച് കൊടുങ്കാറ്റ് കാലത്തും മണ്സൂണ് സമയത്തും നാവിക യാത്രയ്ക്ക് കൂടുതല് അപകടസാധ്യതയുണ്ടാകാറുണ്ട്.
