ദോഹ: മുന്സിപ്പാലിറ്റി മന്ത്രാലയവും വിദാം ഫുഡ് കമ്പനിയുമായി സഹകരിച്ച് വാണിജ്യ- വ്യവസായ മന്ത്രാലയം ജൂണ് 22 മുതല് ജൂലൈ ഒന്നു വരെ ഈദ് അല് അദ്ഹയുമായി ബന്ധപ്പെട്ട് ആടുകള് സബ്സിഡി നിരക്കില് വിതരണം ചെയ്യും.
ഈദുല് അദ്ഹ വിപണി ക്രമപ്പെടുത്തുക, ചരക്കുകള്ക്ക് താങ്ങാനാവുന്ന വില നല്കുക, വില സ്ഥിരപ്പെടുത്തുക, വിതരണവും ഡിമാന്ഡും തമ്മില് സന്തുലിതാവസ്ഥ സൃഷ്ടിക്കുക, വിതരണത്തിന്റെ ആവശ്യം വര്ധിക്കുന്ന സീസണുകളില് പ്രാദേശിക വിപണിയെ സ്ഥിരപ്പെടുത്തുക എന്നിവയാണ് ഇത്തരമൊരു സംരംഭം ലക്ഷ്യമിടുന്നതെന്ന് പ്രസ്താവനയില് വാണിജ്യ- വ്യവസായ മന്ത്രാലയം അറിയിച്ചു.
വിദാം ഫുഡ് കമ്പനിയുമായി തദ്ദേശീയവും ഇറക്കുമതി ചെയ്യുന്നതുമായ ആടുകളെ സബ്സിഡിയോടെ വില്ക്കാനും ആടുകളുടെ തൂക്കവും നിശ്ചയിച്ച വിലയും അടിസ്ഥാനമാക്കി പൗരന്മാര്ക്ക് വില കുറയ്ക്കാനും ധാരണയിലെത്തി.
പ്രാദേശിക ആടുകള്ക്കും ഇറക്കുമതി ചെയ്ത ആടുകള്ക്കും 40 കിലോയും അതില് കൂടുതലുമുള്ളവയ്ക്ക് 1000 റിയാലാണ് വില.
അല് ശമാല്, അല് ഖോര്, ഉം സലാല്, അല് വക്ര, അല് ഷിഹാനിയ എന്നിവിടങ്ങളിലെ വിദാം ഫുഡ് കമ്പനിയുടെ അറവുശാലകളിലാണ് ആടുകളെ വില്ക്കുക.
വ്യവസ്ഥകള് അനുസരിച്ച് സാധുവായ ഐ ഡി കാര്ഡ് ഹാജരാക്കുന്ന ഓരോ ഖത്തരി പൗരനും ആടുകളെ വില്ക്കും. വാങ്ങുന്നയാള്ക്ക് കുറഞ്ഞത് 20 വയസ്സ് പ്രായമുണ്ടായിരിക്കണം കൂടാതെ ഒരു ആടിനെ മാത്രമാണ് ലഭിക്കുക.
ലോഡിംഗ്, അറവ്, കട്ടിംഗ്, പാക്കേജിംഗ് എന്നിവയുടെ ഫീസ് 50 റിയാല് ആണെന്ന് മന്ത്രാലയം അറിയിച്ചു. അതില് ലോഡിംഗ് ഫീസായി 34 റിയാലും പ്രത്യേക കൂപ്പണുകള് വഴി അറവ്, മുറിക്കല്, പാക്കേജിംഗ് എന്നിവയ്ക്ക് 16 റിയാല് ഫീസും ഉള്പ്പെടുന്നു.
വില്പനക്കാര് സബ്സിഡി നിരക്കുകളും വില്പ്പന നടപടിക്രമങ്ങളുടെ സമഗ്രതയും പാലിക്കുന്നുണ്ടെന്ന് ഉറപ്പാക്കാന് പരിശോധനാ കാമ്പെയ്നുകള് ശക്തമാക്കുമെന്ന് വാണിജ്യ- വ്യവസായ മന്ത്രാലയം അറിയിച്ചു.
