ദോഹ: ഖത്തര് ദേശീയ കായിക ദിനാചരനത്തോടനുബന്ധിച്ച് ഫെബ്രുവരി 23ന് എക്സ്പാറ്റ്സ് സ്പോര്ട്ടീവ് സംഘടിപ്പിക്കുന്ന കമ്മ്യൂണിറ്റി സ്പോര്ട്സ് മീറ്റ്-2024ന്റെ പോസ്റ്റര് പ്രകാശനം ചെയ്തു. സംഘാടക സമിതി രക്ഷാധികാരി ഡോ. താജ് ആലുവ എക്സ്പാറ്റ്സ് സ്പോര്ട്ടീവ് പ്രസിഡണ്ട് എ ആര് അബ്ദുല് ഗഫൂറിന് കൈമാറിയാണ് പോസ്റ്റര് പ്രകാശനം നിര്വ്വഹിച്ചത്.
ഓരോ ജില്ലയില് നിന്നും ഒരു ടീമാവും ഇത്തവണത്തെ കമ്മ്യൂണിറ്റി സ്പോര്ട്സ് മീറ്റില് മാറ്റുരക്കുക. മീറ്റില് പങ്കെടുക്കുന്ന ജില്ലാ ടീമുകളുടെ പ്രഖ്യാപനവും നടന്നു. ഓട്ടം, ലോംഗ് ജമ്പ്, ഹൈ ജമ്പ്, ഷോട്ട്പുട്ട്, പഞ്ചഗുസ്തി, ബാഡ്മിന്റണ്, വടം വലി, ഷൂട്ടൗട്ട് തുടങ്ങിയവയിലാണ് വിവിധ കാറ്റഗറികളിലായി മത്സരങ്ങള് നടക്കുക. മീറ്റിന്റെ ഭാഗമായി വര്ണ്ണാഭമായ ടീം പരേഡും കുടുംബങ്ങള്ക്കായി വിനോദ മത്സരങ്ങളും സംഘടിപ്പിക്കും.
പോസ്റ്റര് പ്രകാശന ചടങ്ങില് ജനറല് കണ്വീനര് അഹമ്മദ് ഷാഫി അധ്യക്ഷത വഹിച്ചു. കള്ച്ചറല് ഫോറം പ്രസിഡണ്ട് ചന്ദ്രമോഹന് ആശംസകളര്പ്പിച്ചു. ടെക്നികല് ചീഫ് കോഡിനേറ്റര് താസീന് അമീന് പരിപാടികള് വിശദീകരിച്ചു.
ടീം കോഡിനേറ്റര് അനസ് ജമാല്, എക്സ്പാറ്റ്സ് സ്പോര്ട്ടീവ് എക്സിക്യൂട്ടിവ് കമ്മറ്റിയംഗം എം ടി അസീം എന്നിവര് വിവിധ ടീം മാനേജര്മാരെ ആദരിച്ചു. സംഘാടക സമിതിയംഗങ്ങളായ അനീസ് റഹ്മാന്, റഷീദ് അഹമ്മദ്, നജ്ല നജീബ്, റഹീം വേങ്ങേരി, റബീഅ് സമാന്, ലത കൃഷ്ണ, ഫാതിമ തസ്നീം തുടങ്ങിയവര് സംബന്ധിച്ചു.
