ദോഹ: കഴിഞ്ഞ വര്ഷം ഖത്തര് സന്ദര്ശിക്കാനെത്തിയത് നാല് ദശലക്ഷം പേര്. കഴിഞ്ഞ അഞ്ച് വര്ഷത്തെ ഏറ്റവും കൂടുതല് എണ്ണമാണിത്.
ഫിഫ ലോകകപ്പ് ഖത്തര് 2022ഉം വിനോദസഞ്ചാര മേഖലയെ പ്രോത്സാഹിപ്പിക്കുന്നതിനുള്ള രാജ്യത്തിന്റെ നിരന്തരമായ ശ്രമങ്ങളും സംരംഭങ്ങളുമാണ് സന്ദര്ശകരുടെ എണ്ണം ഉയര്ത്തിയത്.
ഖത്തറിലേക്ക് വിസ ആവശ്യമുള്ള യാത്രക്കാര്ക്ക് വിസ നടപടിക്രമങ്ങള് ഏകീകരിക്കുന്നതിനും ലളിതമാക്കുന്നതിനുമായി ഹയ്യ പ്ലാറ്റ്ഫോമിന്റെ പ്രവര്ത്തനം ഈ വര്ഷം ആദ്യം ഖത്തര് പ്രഖ്യാപിച്ചിരുന്നു. 95 രാജ്യങ്ങള്ക്ക് ഓണ് അറൈവല് വിസയും അനുവദിച്ചിരുന്നു. അതോടൊപ്പം ഖത്തറിന്റെ ഒരു വര്ഷം നീണ്ടുനില്ക്കുന്ന ഇവന്റുകളുടെ കലണ്ടറും ആകര്ഷകമായ മാര്ക്കറ്റിംഗ് കാമ്പെയ്നുകളും വിനോദ സഞ്ചാരികളുടെ എണ്ണം വര്ധിക്കാന് സഹായിച്ചു.
വിപുലീകരിച്ച ടൂറിസം അടിസ്ഥാന സൗകര്യങ്ങള്, സുരക്ഷ, ആധികാരിക അറേബ്യന് ആതിഥേയത്വം എന്നിവയിലൂടെ ആഗോള വിനോദസഞ്ചാര കേന്ദ്രമെന്ന നിലയില് ഖത്തര് ആകര്ഷണം പ്രകടിപ്പിക്കുന്നത് തുടരുകയാണെന്ന് ഖത്തര് ടൂറിസം ചെയര്മാന് സാദ് ബിന് അലി അല് ഖര്ജി പറഞ്ഞു. ഖത്തറിന്റെ വൈവിധ്യമാര്ന്ന ടൂറിസം ഓഫറുകള്, അതിന്റെ 500 കിലോമീറ്റര് പ്രാകൃതമായ തീരപ്രദേശം, ലോകോത്തര മ്യൂസിയങ്ങള്, സാംസ്കാരികവും സമകാലികവുമായ ലക്ഷ്യസ്ഥാനങ്ങള് എന്നിവ സംയോജിപ്പിച്ച് മേഖലയിലും അന്തര്ദ്ദേശീയമായും ഉള്ള സഞ്ചാരികള്ക്ക് അനുയോജ്യമായ സവിശേഷവും ആകര്ഷകവുമായ സന്ദര്ശന പദ്ധതിയാണ് തയ്യാറാക്കുന്നത്.
2023ല് ഏറ്റവും കൂടുതല് സന്ദര്ശകരെത്തിയത് സൗദി അറേബ്യയില് നിന്നാണ്- 25.3 ശതമാനം. രണ്ടാം സ്ഥാനത്തുള്ള ഇന്ത്യയില് നിന്നും 10.4 ശതമാനം പേരും ജര്മ്മനി (4.1), യു കെ (3.9), കുവൈറ്റ് (3.5) എന്നിങ്ങനെയുമാണ് യാത്രക്കാരെത്തിയത്. സന്ദര്ശകരില് 85 ശതമാനം വിമാനമാര്ഗവും 14 ശതമാനം പേര് കര വഴിയും ഒരു ശതമാനം പേര് കടല് വഴിയുമാണ് എത്തിച്ചേര്ന്നത്.
