ദോഹ: സംസ്കാരവും ലൈവ് എന്റര്ടെയ്ന്മെന്റും കണ്ടെത്തുന്നതിനുള്ള ലോകത്തിലെ മുന്നിര സാങ്കേതിക പ്ലാറ്റ്ഫോമായ ‘ഫീവര്’ ഖത്തറില് തന്ത്രപ്രധാന വിപുലീകരണം പ്രഖ്യാപിച്ചു. അന്താരാഷ്ട്രതലത്തിലുള്ള വന് പരിപാടികള്, ആധുനിക അനുഭവാധിഷ്ഠിത വിനോദങ്ങള് എന്നിവയുടെ ആഗോള കേന്ദ്രമായി ഖത്തര് വളര്ന്നുവരുന്നതിന്റെ ശക്തമായ തെളിവാണ് ഈ മുന്നേറ്റം.
ഇന്വെസ്റ്റ് ഖത്തറിന്റെ പിന്തുണയോടെ ഉയര്ന്ന വളര്ച്ചാ സാധ്യതയുള്ള അന്താരാഷ്ട്ര കമ്പനികളെ ആകര്ഷിക്കാനും സൃഷ്ടിപരത, സാങ്കേതികവിദ്യ, ലൈവ് അനുഭവങ്ങള് എന്നിവ ഉള്ക്കൊള്ളുന്ന സജീവമായ പരിസ്ഥിതി സൃഷ്ടിക്കാനുമുള്ള ഖത്തറിന്റെ വിപുലമായ ശ്രമങ്ങളുമായി ഫീവറിന്റെ വിപുലീകരണം ഒത്തുചേരുന്നതാണ്.
സാമ്പത്തിക വൈവിധ്യവത്ക്കരണം, ടൂറിസം വികസനം, ലോകോത്തര അനുഭവങ്ങള് സംഘടിപ്പിക്കല് എന്നിവ മുന്ഗണന നല്കുന്ന ഖത്തര് നാഷണല് വിഷന് 2030-നോടും ഫീവറിന്റെ ഈ നീക്കം യോജിക്കുന്നു.
ലോകത്തിലെ ഏറ്റവും നവീനമായ സാംസ്കാരികവും വിനോദപരവുമായ ആശയങ്ങള് ദോഹയിലേക്ക് കൊണ്ടുവരുന്നതിലൂടെ ഖത്തറിന്റെ അതിവേഗം വളരുന്ന അനുഭവാധിഷ്ഠിത സമ്പദ്വ്യവസ്ഥയ്ക്ക് ഫീവര് ഗണ്യമായ സംഭാവന നല്കുന്നു. മേഖലയോടുള്ള ദീര്ഘകാല പ്രതിബദ്ധതയുടെ ഭാഗമായി വരാനിരിക്കുന്ന വര്ഷങ്ങളില് ഖത്തറില് നിരവധി ഉയര്ന്ന നൈപുണ്യമുള്ള തൊഴില് അവസരങ്ങള് സൃഷ്ടിക്കാനാണ് ഫീവര് പദ്ധതിയിടുന്നത്. ഇതുവഴി രാജ്യത്തിന്റെ പ്രതിഭ വികസനവും സാമ്പത്തിക വൈവിധ്യവല്ക്കരണ ലക്ഷ്യങ്ങളും ശക്തിപ്പെടും.
സമീപകാലങ്ങളില്, സംസ്കാരം, സാങ്കേതികവിദ്യ, കായികം എന്നീ മേഖലകളില് ആഗോള തലത്തില് പ്രതിച്ഛായ ഉയര്ത്തുന്നതിനായി ഖത്തര് ഗണ്യമായ നിക്ഷേപങ്ങളാണ് നടത്തിയിട്ടുള്ളത്. അന്താരാഷ്ട്ര വന് പരിപാടികളുടെ ആതിഥേയത്വം, ലോകോത്തര അനുഭവങ്ങളുടെ പ്രിയപ്പെട്ട കേന്ദ്രമാകാനുള്ള രാജ്യത്തിന്റെ ലക്ഷ്യത്തെ കൂടുതല് വേഗത്തിലാക്കി. ഡാറ്റയെ അടിസ്ഥാനമാക്കിയുള്ള അത്യാധുനിക ഉപകരണങ്ങളും ആഗോള പരിചയസമ്പത്തും അടുത്ത തലമുറ വിനോദ ആശയങ്ങളും കൊണ്ടുവരുന്ന ഫീവറിന്റെ സാന്നിധ്യം ഈ മുന്നേറ്റത്തെ ശക്തിപ്പെടുത്തുകയും ഖത്തറിന്റെ ദീര്ഘകാല സാമ്പത്തിക വൈവിധ്യവല്ക്കരണ തന്ത്രത്തെ പൂരിപ്പിക്കുകയും ചെയ്യുന്നു.
ലൈവ് എന്റര്ടെയ്ന്മെന്റ്, ടൂറിസം, സൃഷ്ടിപര സമ്പദ്വ്യവസ്ഥ എന്നിവയില് ഖത്തര് തന്ത്രപ്രധാന നിക്ഷേപങ്ങള് നടത്തുന്ന വേളയിലാണ് ഫീവറിന്റെ പ്രവേശനം. ഇതിന്റെ ഭാഗമായി, ആഗോള സ്റ്റാര്ട്ടപ്പുകളെ ദോഹയില് പ്രവര്ത്തനം ആരംഭിക്കാന് ക്ഷണിക്കുന്ന ‘സ്റ്റാര്ട്ടപ്പ് ഖത്തര്’ എന്ന ഓണ്ലൈന് പ്ലാറ്റ്ഫോം ഉള്പ്പെടെ നിരവധി പദ്ധതികള് ഖത്തര് ആരംഭിച്ചിട്ടുണ്ട്. അനുഭവാധിഷ്ഠിത സമ്പദ്വ്യവസ്ഥയെ മുന്നോട്ട് നയിക്കുന്നതില് മീഡിയ സിറ്റി ഖത്തര് നിര്ണായക പങ്ക് വഹിക്കുന്നു. സൃഷ്ടിപര വ്യവസായങ്ങള്ക്ക് ആധുനിക അടിസ്ഥാന സൗകര്യങ്ങളും വന് പരിപാടികള്ക്കുള്ള പിന്തുണയും ഇതിലൂടെ ലഭ്യമാക്കുന്നു. ഖത്തറിന്റെ സമ്പന്നമായ പൈതൃകം ആഘോഷിക്കുന്ന വലിയ സാംസ്കാരിക പരിപാടികളും ഉത്സവങ്ങളും സംഘടിപ്പിക്കുന്നതിലൂടെ സാംസ്കാരിക മന്ത്രാലയവും ഈ ശ്രമങ്ങളെ ശക്തിപ്പെടുത്തുന്നു.
കലാപ്രദര്ശനങ്ങള്, ലൈവ് പ്രകടനങ്ങള്, കായിക മേളകള് എന്നിവ ഉള്പ്പെടുന്ന വിപുലമായ പരിപാടി കലണ്ടര് ഖത്തര് ടൂറിസം അവതരിപ്പിച്ചു കൊണ്ടിരിക്കുകയാണ്. അനുഭവങ്ങള് തെരഞ്ഞെടുക്കുന്നതില് ഫീവറിന്റെ ഡാറ്റാധിഷ്ഠിത സമീപനം പരിപാടി സംഘാടകരെയും പ്രേക്ഷകരെയും തമ്മിലുള്ള അകലം കുറയ്ക്കുകയും ഖത്തറിന്റെ വിനോദ മേഖലയിലെ വളര്ച്ചയ്ക്ക് ഗണ്യമായ സംഭാവന നല്കുകയും ചെയ്യും.
ലോകമെമ്പാടും വിജയകരമായ പരിപാടികള് ഒരുക്കിയ അനുഭവസമ്പത്തുള്ള ഫീവര്, ഖത്തറിന്റെ വളരുന്ന വിനോദ രംഗത്ത് നിര്ണായക പങ്ക് വഹിക്കാന് തയ്യാറാണ്. കായികം, നവീകരണം, വിനോദം എന്നിവയുടെ സംഗമസ്ഥാനമായി ഖത്തര് തന്റെ ആഗോള സാന്നിധ്യം വിപുലീകരിക്കുന്നതിനൊപ്പം അന്താരാഷ്ട്ര നിലവാരത്തിലുള്ള ഉള്ളടക്കങ്ങള്, ആഴത്തിലുള്ള അനുഭവരൂപങ്ങള്, സാങ്കേതികവിദ്യ അധിഷ്ഠിത പരിപാടികള് എന്നിവ പ്രാദേശിക വിപണിയിലേക്ക് കൊണ്ടുവരുന്നതിലാകും ഫീവറിന്റെ ശ്രദ്ധ.
2026 ഫെബ്രുവരി 1 മുതല് 4 വരെ നടക്കുന്ന വെബ് സമ്മിറ്റ് ഖത്തറില് ഫീവര് പങ്കെടുക്കും. സാംസ്കാരിക പരിപാടികളിലും കായികവുമായി ബന്ധപ്പെട്ട ലൈവ് അനുഭവങ്ങളിലും ഖത്തറിന്റെ ദര്ശനത്തിന് തങ്ങളുടെ സാങ്കേതികവും സൃഷ്ടിപരവുമായ കഴിവുകള് എങ്ങനെ സഹായകരമാകുമെന്ന് അവിടെ ഫീവര് അവതരിപ്പിക്കും.
