അബൂദാബി: യു എ ഇ ദേശീയ സുരക്ഷാ വിഭാഗം ഒരു തീവ്രവാദ സംഘടനയെ തകര്ത്ത് അംഗങ്ങളെ അറസ്റ്റ് ചെയ്തു. ദേശീയ സുരക്ഷാ വിഭാഗം അറസ്റ്റ് ചെയ്ത 27 പേരുടേയും തിരിച്ചറിയല് രേഖകള് വെളിപ്പെടുത്തുകയും അവരുടെ ഫോട്ടോകള് പുറത്തുവിടുകയും ചെയ്തു.
യു എ ഇയില് തീവ്രവാദ, അട്ടിമറി പ്രവര്ത്തനങ്ങള് നടത്താനുള്ള പദ്ധതികള് ഉള്പ്പെടെയുള്ള രഹസ്യ പ്രവര്ത്തനങ്ങളില് ഗ്രൂപ്പ് അംഗങ്ങള് ഉള്പ്പെട്ടിട്ടുണ്ടെന്ന് അധികൃതര് പറഞ്ഞു. സംഘടനയും ഇറാന്റെ വിലായത്ത് അല്-ഫഖിഹും തമ്മിലുള്ള ബന്ധവും അന്വേഷണങ്ങളില് കണ്ടെത്തി. ആയത്തുല്ല ഖുമൈനി ജനപ്രിയമാക്കിയ ഷിയാ രാഷ്ട്രീയ സിദ്ധാന്തമാണ് വിലായത്ത് അല്-ഫഖിഹ്.
യു എ ഇയുടെ ആഭ്യന്തര സുരക്ഷയ്ക്ക് ഭീഷണിയായ തീവ്രവാദ ആശയങ്ങള് സ്വീകരിക്കുകയും യുവ എമിറാത്തികള്ക്കിടയില് തെറ്റായ വിവരങ്ങള് പ്രചരിപ്പിക്കുകയും വിദേശ താത്പര്യങ്ങള്ക്കായി അവരെ റിക്രൂട്ട് ചെയ്യുകയും രാജ്യത്തിന്റെ നയങ്ങള്ക്കെതിരായ വിയോജിപ്പുകള് പ്രോത്സാഹിപ്പിക്കുകയും ചെയ്തു തുടങ്ങിയ കുറ്റങ്ങളും ഇവര്ക്കെതിരെ ചുമത്തിയിട്ടുണ്ട്.
രഹസ്യ റിക്രൂട്ട്മെന്റ്, ബാഹ്യ സ്ഥാപനങ്ങളുമായി ബന്ധപ്പെട്ട പ്രവര്ത്തനങ്ങള് എന്നിവയിലൂടെ അംഗങ്ങളെ സെന്സിറ്റീവ് സ്ഥാനങ്ങളില് സ്ഥാപിക്കാന് ശ്രമിച്ചതായി അധികൃതര് 27 പേരെ തിരിച്ചറിയുകയായിരുന്നു. ലെബനനിലെ ഹിസ്ബുള്ളയും ഇറാനും ധനസഹായം നല്കി പ്രവര്ത്തിപ്പിക്കുന്ന ഒരു തീവ്രവാദ ശൃംഖല കഴിഞ്ഞ മാസം തകര്ത്തതിന് പിന്നാലെയാണ് അറസ്റ്റുകള്.
യു എ ഇയിലുടനീളം നടത്തിയ റെയ്ഡുകളില് സുരക്ഷാ സേന സംശയിക്കുന്നവരെ അവരുടെ വീടുകളിലും ഓഫീസിലും യാത്രയിലുമാണ് അറസ്റ്റ് ചെയ്തത്. ഇവരില് നിന്നും വലിയ തുകയും കണ്ടെടുത്തു.
അനൗദ്യോഗിക മാര്ഗങ്ങളിലൂടെ സംഘം ഫണ്ട് ശേഖരിച്ച് സംശയാസ്പദമായ ബാഹ്യ സ്ഥാപനങ്ങള്ക്ക് കൈമാറിയതായും സംശയിക്കുന്നുണ്ട്.
രേഖകള്, പുസ്തകങ്ങള്, സി ഡികള് എന്നിവയുള്പ്പെടെ തീവ്രവാദ പ്രത്യയശാസ്ത്രങ്ങളുമായി ബന്ധപ്പെട്ടവ കണ്ടെടുത്തതായി അധികൃതര് പറഞ്ഞു. ഇറാന്റെ മുന് പരമോന്നത നേതാവ് ആയത്തുല്ല അലി ഖംനേയുടെ ചിത്രങ്ങളും അദ്ദേഹത്തിന്റെ ‘ടു ദി യൂത്ത്’ എന്ന പുസ്തകവും ചില സി ഡി കവറുകളില് മുന് പരമോന്നത നേതാവിനെ ചിത്രവും ഒന്നില് ‘ലോങ് ലൈവ് ദി റെസിസ്റ്റന്സ്’ എന്ന വാക്കുകള് ആലേഖനം ചെയ്തതും മരിച്ച പരമോന്നത നേതാവിനെ പ്രശംസിക്കുന്ന പുസ്തകങ്ങളും ഹിസ്ബുള്ളയുമായി ബന്ധപ്പെട്ട രേഖകളും കണ്ടെത്തി.
റിമോട്ട് കണ്ട്രോള് ഉള്പ്പെടെയുള്ള ഇലക്ട്രോണിക് ഉപകരണങ്ങള് ഘടിപ്പിച്ച കൈകൊണ്ട് നിര്മ്മിച്ച ഡ്രോണ് പോലെ തോന്നിക്കുന്ന വസ്തുവും പിടികൂടിയവയില് ഉള്പ്പെടുന്നു. ഇറാനിയന് നേതാക്കളുടെ നിരവധി ഫോട്ടോഗ്രാഫുകളും പിടിച്ചെടുത്തു.
രാജ്യത്ത് ഒരു രഹസ്യ ഗ്രൂപ്പ് സൃഷ്ടിക്കുകയും പ്രവര്ത്തിപ്പിക്കുകയും ചെയ്യുക, വിദേശ ഗ്രൂപ്പുകളോട് വിശ്വസ്തത പുലര്ത്തുക, ദേശീയ ഐക്യത്തിനും സാമൂഹിക സ്ഥിരതയ്ക്കും ഹാനികരമെന്ന് കരുതുന്ന നടപടികള് സ്വീകരിക്കുക തുടങ്ങിയ കുറ്റങ്ങളാണ് പ്രതികള്ക്കെതിരെ ചുമത്തിയിരിക്കുന്നത്.
