ദോഹ: സ്റ്റേഡിയം ഡിബി വെബ്സൈറ്റിന്റെ ‘സ്റ്റേഡിയം ഓഫ് ദ ഇയര്‍ അവാര്‍ഡിന്’ മത്സരിക്കുന്ന 23 സ്റ്റേഡിയങ്ങളില്‍ ലുസൈല്‍ സ്റ്റേഡിയവും ഇടംപിടിച്ചു.
സ്റ്റേഡിയം ഡിബിയുടെ പ്രതിവര്‍ഷം നടക്കുന്ന ‘ഏറ്റവും വലിയ ഓണ്‍ലൈന്‍ സ്റ്റേഡിയം അവാര്‍ഡുകള്‍’ അഞ്ച് സ്റ്റേഡിയങ്ങള്‍ തിരിച്ചറിയാനും അവയെ പഞ്ചനക്ഷത്ര സ്‌കെയിലില്‍ റേറ്റുചെയ്യാനും വെബ്സൈറ്റിലേക്ക് അവരുടെ റേറ്റിംഗുകള്‍ സമര്‍പ്പിക്കാനും ഉപയോക്താക്കളോട് ആവശ്യപ്പെട്ടിട്ടുണ്ട്.
ഫിഫ ലോകകപ്പ് ഖത്തര്‍ 2022 ഫൈനല്‍ നടന്ന ലുസൈല്‍ സ്റ്റേഡിയത്തിലാണ് ഫ്രാന്‍സിനെ പരാജയപ്പെടുത്തി ലയണല്‍ മെസ്സിയും അര്‍ജന്റീനന്‍ സംഘവും കപ്പ് സ്വന്തമാക്കിയത്.
23 സ്റ്റേഡിയങ്ങളുടെ ഷോര്‍ട്ട്ലിസ്റ്റില്‍ ലോകത്തിലെ എല്ലാ ഭൂഖണ്ഡങ്ങളില്‍ നിന്നുമുള്ള സ്റ്റേഡിയങ്ങള്‍ ഉള്‍പ്പെടുന്നു. അവയില്‍ 12 എണ്ണം ചൈനയില്‍ നിന്നാണ്.
ഖത്തറിലെ ലുസൈല്‍ സ്റ്റേഡിയം, ഇറാഖിലെ അല്‍-മിന, അല്‍-സവ്റ സ്റ്റേഡിയങ്ങള്‍ എന്നിവ മാത്രമാണ് അറബ് ഗള്‍ഫ് മേഖലയില്‍ നിന്നുള്ള നോമിനികള്‍ വെബ്സൈറ്റ് ഷോര്‍ട്ട്ലിസ്റ്റ് ചെയ്തിരിക്കുന്നത്. വെബ്സൈറ്റിലെ വോട്ടിംഗ് 2023 മാര്‍ച്ച് 14 അര്‍ധരാത്രി വരെ തുടരും.
