ദോഹ: ഗാസയുടെ ഭരണത്തിന് ഡോ. അലി അബ്ദുല് ഹമീദ് ഷാഅത്ത് അധ്യക്ഷനായ ഫലസ്തീന് സാങ്കേതിക (ടെക്നോക്രാറ്റിക്) സമിതി രൂപീകരിച്ചതിനെ ഖത്തര്, അറബ് റിപ്പബ്ലിക് ഓഫ് ഈജിപ്ത്, റിപ്പബ്ലിക് ഓഫ് തുര്ക്കിയെ എന്നിവ ഉള്പ്പെടുന്ന മധ്യസ്ഥ രാജ്യങ്ങള് സ്വാഗതം ചെയ്തു. ഗാസയില് സ്ഥിരത ഉറപ്പാക്കുന്നതിനും മാനവിക സാഹചര്യം മെച്ചപ്പെടുത്തുന്നതിനുമുള്ള ശ്രമങ്ങള് ശക്തിപ്പെടുത്തുന്നതിലേക്ക് നയിക്കുന്ന പ്രധാന പുരോഗതിയായാണ് ഈ നീക്കത്തെ മധ്യസ്ഥര് വിലയിരുത്തിയത്.
ഗാസ വെടിനിര്ത്തല് കരാറിന്റെ രണ്ടാം ഘട്ടം നടപ്പിലാക്കുന്നതിനുള്ള വഴി ഈ സമിതി രൂപീകരണം തുറക്കും എന്ന പ്രതീക്ഷയും മധ്യസ്ഥര് പ്രകടിപ്പിച്ചു. യു എസ് പ്രസിഡന്റ് ഡൊണാള്ഡ് ട്രംപ് പ്രഖ്യാപിച്ച പദ്ധതിയനുസരിച്ചാണ് രണ്ടാം ഘട്ടം നടപ്പാക്കുന്നത്. ഇതിലൂടെ വെടിനിര്ത്തല് കൂടുതല് ഉറപ്പുവരുത്താനും വീണ്ടും സംഘര്ഷം പൊട്ടിപ്പുറപ്പെടുന്നത് തടയാനും സാധിക്കുമെന്ന് അവര് വ്യക്തമാക്കി.
ദീര്ഘകാല സമാധാനം കൈവരിക്കുന്നതിനും ഗാസയുടെ പുനര്നിര്മാണത്തിന് അനുയോജ്യമായ സാഹചര്യങ്ങള് സൃഷ്ടിക്കുന്നതിനും എല്ലാ കക്ഷികളും കരാര് പൂര്ണ്ണമായി നടപ്പാക്കുന്നതില് പ്രതിബദ്ധത പാലിക്കേണ്ടതിന്റെ ആവശ്യകത മധ്യസ്ഥര് ഊന്നിപ്പറഞ്ഞു. സുരക്ഷ, സ്ഥിരത, മാന്യമായ ജീവിതം എന്നിവയ്ക്കായുള്ള ഫലസ്തീന് ജനതയുടെ ആകാംക്ഷകള് സാക്ഷാത്കരിക്കപ്പെടേണ്ടതിന്റെ പ്രാധാന്യവും പ്രസ്താവനയില് ചൂണ്ടിക്കാട്ടി.
