ദോഹ: ഈദുല്‍ അദ്ഹ അവധിക്കാലത്ത് ഖത്തര്‍ സന്ദര്‍ശിക്കാനെത്തിയവരില്‍ കൂടുതല്‍ സൗദി അറേബ്യയില്‍ നിന്നും കുവൈത്തില്‍ നിന്നുമുള്ളവര്‍. യു എ ഇയാണ് മൂന്നാം സ്ഥാനത്ത്.
ഈദ് സമയത്ത് ആളുകള്‍ ചെറിയ യാത്രകള്‍ നടത്തിയെങ്കിലും തിരക്കും ഉയര്‍ന്ന ടിക്കറ്റ് നിരക്കും പരിഗണിച്ച് മിക്കവരും ഈദിന് ശേഷം യാത്ര ചെയ്യാനാണ് താത്പര്യപ്പെട്ടത്. ഈദുമായി ബന്ധപ്പെട്ട യാത്രകള്‍ സൗദി അറേബ്യ, യുണൈറ്റഡ് അറബ് എമിറേറ്റ്‌സ്, തുര്‍ക്കിയെ തുടങ്ങിയ അടുത്തുള്ള സ്ഥലങ്ങളിലേക്കും ചിലര്‍ ലണ്ടനിലേക്കുമാണ് നടത്തിയത്.
ഈദിന് ശേഷമാണ് നീണ്ട വേനല്‍ക്കാല അവധിക്കാലത്തിനുള്ള റിസര്‍വേഷന്‍ ആരംഭിക്കുന്നത്. ബ്രിട്ടന്‍, യൂറോപ്യന്‍ രാജ്യങ്ങള്‍, യു എസ് എ എന്നിവിടങ്ങളിലേക്കാണ് ഏറ്റവും കൂടുതല്‍ വിനോദ സഞ്ചാരികള്‍ ഖത്തറില്‍ നിന്നും പോകുന്നത്. ഖത്തറില്‍ നിന്നുള്ള വിനോദസഞ്ചാരികളുടെ ഏറ്റവും ആകര്‍ഷകമായ സ്ഥലങ്ങളിലൊന്നാണ് ലണ്ടന്‍. കൂടാതെ, തുര്‍ക്കിയെ ധാരാളം വിനോദസഞ്ചാരികളെ ആകര്‍ഷിക്കുന്നു, തുടര്‍ന്ന് ജര്‍മ്മനി, ബെല്‍ജിയം, ഓസ്ട്രിയ, സ്വിറ്റ്‌സര്‍ലന്‍ഡ് എന്നീ രാജ്യങ്ങളും പട്ടികയിലുണ്ട്.
വേനല്‍ക്കാല അവധിക്കാലത്ത് നിരവധി പ്രവാസികള്‍ അവരുടെ രാജ്യങ്ങളിലേക്കും യാത്ര ചെയ്യുന്നുണ്ട്.
ബനാന ഐലന്‍ഡ്, ഹില്‍ട്ടണ്‍ സാല്‍വ റിസോര്‍ട്ട്, ലുസൈല്‍, കത്താറ, മഷെരിബ്, വെസ്റ്റ് വാക്ക് എന്നിവയാണ് ഖത്തറില്‍ വിദേശ വിനോദ സഞ്ചാരികളുടെ പ്രധാന ആകര്‍ഷണങ്ങള്‍.
മിക്ക വിനോദസഞ്ചാരികളും ശൈത്യകാലത്താണ് ഖത്തറിലേക്കുള്ള യാത്ര ആസൂത്രണം ചെയ്യുന്നത്. വേനല്‍ക്കാല അവധിക്കാലത്ത് രാജ്യത്തെ സന്ദര്‍ശകരില്‍ ഭൂരിഭാഗവും ഖത്തറില്‍ താമസിക്കുന്നവരുടെ ബന്ധുക്കളാണ്.
ഖത്തറിന്റെ ട്രാവല്‍ ആന്‍ഡ് ടൂറിസം മേഖല ഈ വര്‍ഷം രാജ്യത്തിന്റെ സമ്പദ്വ്യവസ്ഥയിലേക്ക് 90.8 ബില്യണ്‍ റിയാലാണ് സംഭാവന ചെയ്യുകയെന്നാണ് പ്രതീക്ഷിക്കുന്നത്. ഇത് രാജ്യത്തിന്റെ മൊത്തം ഉല്‍പ്പാദനത്തിന്റെ 11.3 ശതമാനം വരും. ട്രാവല്‍ ആന്‍ഡ് ടൂറിസം മേഖലയുടെ ജി ഡി പി സംഭാവന 2023ല്‍ 31 ശതമാനം വര്‍ധിച്ചു. ഇത് ഖത്തറിന്റെ മൊത്തത്തിലുള്ള സാമ്പത്തിക ഉത്പാദനത്തിന്റെ 10.3 ശതമാനമാണ്.
