ഹൂസ്റ്റണ്: ഫിഫ ലോകകപ്പ് 2026-ല് വമ്പന് അട്ടിമറി. നാലുതവണ ലോകചാമ്പ്യന്മാരായ ജര്മനിയെ പെനാല്റ്റി ഷൂട്ടൗട്ടില് വീഴ്ത്തി പരാഗ്വേ പ്രീക്വാര്ട്ടറിലേക്ക് (റൗണ്ട് ഓഫ് 16) മുന്നേറി. ലോകകപ്പ് ചരിത്രത്തിലെ ഏറ്റവും വലിയ അട്ടിമറികളിലൊന്നായാണ് ഈ വിജയം വിലയിരുത്തപ്പെടുന്നത്.
റൗണ്ട് ഓഫ് 32 മത്സരത്തിന്റെ ആദ്യപകുതിയില് പരാഗ്വേയാണ് ലീഡ് നേടിയത്. 42-ാം മിനിറ്റില് മതിയാസ് ഗലാര്സയുടെ ക്രോസില് നിന്ന് ജൂലിയോ എന്സിസോ നേടിയ ഹെഡര് ഗോളാണ് ജര്മനിയെ പിന്നിലാക്കിയത്.
ആദ്യപകുതിയില് നിറംമങ്ങിയ പ്രകടനം കാഴ്ചവെച്ച ജര്മനി രണ്ടാംപകുതിയില് തിരിച്ചടിച്ചു. 53-ാം മിനിറ്റില് ഫ്േളാറിയന് വിര്ട്സിന്റെ ക്രോസില് നിന്ന് കായ് ഹാവെര്ട്സ് നേടിയ ഹെഡറിലൂടെ ജര്മനി സമനില പിടിച്ചു.
തുടര്ന്ന് കോര്ണറില് നിന്ന് ജോനാഥന് ടാ നേടിയ ഗോള് വി എ ആര് പരിശോധനയ്ക്ക് ശേഷം പരാഗ്വേ ഗോള്കീപ്പറിനെ ഫൗള് ചെയ്തെന്ന കാരണത്താല് റദ്ദാക്കി. നിശ്ചിത സമയത്തും അധികസമയത്തും ഇരു ടീമുകള്ക്കും വീണ്ടും ഗോള് നേടാനാകാതെ വന്നതോടെ മത്സരം പെനാല്റ്റി ഷൂട്ടൗട്ടിലേക്ക് നീങ്ങി.
ഷൂട്ടൗട്ടില് ജര്മനിക്ക് തുടക്കത്തിലേ തിരിച്ചടിയായി. ആദ്യ കിക്കെടുത്ത ഹാവെര്ട്സ് ലക്ഷ്യം കണ്ടില്ല. നിക്ക് വോള്ട്ടമാഡെയും ജോനാഥന് ടായും പെനാല്റ്റി പാഴാക്കിയപ്പോള്, പരാഗ്വേയും രണ്ട് കിക്കുകള് നഷ്ടപ്പെടുത്തിയെങ്കിലും ഒടുവില് 4-3ന് വിജയം സ്വന്തമാക്കി. ജോസെ കനാലെയുടെ നിര്ണായക പെനാല്റ്റിയാണ് പരാഗ്വേയുടെ ചരിത്രവിജയം ഉറപ്പിച്ചത്.
ടൂര്ണമെന്റ് ആരംഭിക്കുമ്പോള് ഫിഫ ലോകറാങ്കിങ്ങില് ജര്മനി പത്താം സ്ഥാനത്തും പരാഗ്വേ 41-ാം സ്ഥാനത്തുമായിരുന്നു. അതുകൊണ്ടുതന്നെ ഈ വിജയം ലോകകപ്പ് ചരിത്രത്തിലെ ഏറ്റവും വലിയ അട്ടിമറികളിലൊന്നായി കണക്കാക്കപ്പെടുന്നു. നോക്കൗട്ട് ഘട്ടത്തില് ജര്മനി ഏറ്റുവാങ്ങുന്ന ഏറ്റവും വലിയ തിരിച്ചടിയെന്ന വിശേഷണവും ഈ തോല്വിക്ക് ലഭിക്കുന്നു.
1994-ലെ അമേരിക്കന് ലോകകപ്പില് നിലവിലെ ചാമ്പ്യന്മാരായിരുന്ന ജര്മനിയെ ക്വാര്ട്ടര് ഫൈനലില് ബള്ഗേറിയ പുറത്താക്കിയതാണ് ഇതിന് മുമ്പത്തെ വലിയ അട്ടിമറിയായി വിലയിരുത്തപ്പെട്ടിരുന്നത്. അന്ന് ഹ്രിസ്റ്റോ സ്റ്റോയിച്ച്കോവിന്റെ മികവിലായിരുന്നു ബള്ഗേറിയയുടെ വിജയം.
ലോകകപ്പ് ചരിത്രത്തില് പെനാല്റ്റി ഷൂട്ടൗട്ടില് ജര്മനി തോല്ക്കുന്നത് ഇതാദ്യമാണ്. കൂടാതെ, 2014-ല് ലോകകപ്പ് നേടിയതിന് ശേഷം ജര്മനിക്ക് വീണ്ടും പ്രീക്വാര്ട്ടര് കടക്കാനായിട്ടില്ലെന്ന നിരാശാജനകമായ റെക്കോഡും തുടരുകയാണ്.
പ്രീക്വാര്ട്ടറില് ജൂലൈ 4ന് ഫിലാഡല്ഫിയയില് നടക്കുന്ന മത്സരത്തില് ഫ്രാന്സ്- സ്വീഡന് പോരാട്ടത്തിലെ വിജയികളെയാണ് പരാഗ്വേ നേരിടുക.
