ഭുവനേശ്വര്: പതിനെട്ടാമത് പ്രവാസി ഭാരതീയ ദിവസ് കണ്വെന്ഷന് പ്രധാനമന്ത്രി നരേന്ദ്ര മോഡി ഉദ്ഘാടനം ചെയ്തു. ഇന്ത്യയിലിപ്പോള് ഊര്ജ്ജസ്വലമായ ഉത്സവങ്ങളുടേയും ഒത്തുചേരലിന്റേയും സമയമാണെന്ന് നരേന്ദ്ര മോഡി ഉദ്ഘാടന പ്രസംഗത്തില് ചൂണ്ടിക്കാട്ടി. ഏതാനും ദിവസങ്ങള്ക്കുള്ളില് പ്രയാഗ് രാജില് മഹാകുംഭമേള ആരംഭിക്കുമെന്നും മകരസംക്രാന്തി, ലോഹ്രി, പൊങ്കല്, മാഗ് ബിഹു തുടങ്ങിയ ഉത്സവങ്ങളും വരാനിരിക്കുകയാണെന്നും പ്രധാനമന്ത്രി കൂട്ടിച്ചേര്ത്തു.
ദീര്ഘനാളത്തെ വിദേശവാസത്തിനു ശേഷം മഹാത്മാഗാന്ധി ഇന്ത്യയിലേക്ക് മടങ്ങിയ 1915ലെ ഈ ദിവസമായിരുന്നുവെന്ന് അനുസ്മരിച്ച പ്രധാനമന്ത്രി ഇത്രയും അത്ഭുതകരമായ ഒരുസമയത്ത് ഇന്ത്യയിലെ പ്രവാസികളുടെ സാന്നിധ്യം ആഘോഷത്തിന്റെ ആവേശം വര്ധിപ്പിച്ചുവെന്നും പറഞ്ഞു.
ഇന്ത്യയും ഇന്ത്യക്കാരായ പ്രവാസികളും തമ്മിലുള്ള ബന്ധം ശക്തിപ്പെടുത്തുന്നതില് പ്രവാസി ഭാരതീയ ദിവസ് മികവ് രേഖപ്പെടുത്തിയതായി അദ്ദേഹം കൂട്ടിച്ചേര്ത്തു. പ്രവാസി ഭാരത് ദിവസ് സംഘടിപ്പിച്ച ഒഡീഷയില് നിന്നും നൂറുകണക്കിന് വര്ഷങ്ങള്ക്ക് മുമ്പ് വ്യാപാരികള് സുമാത്ര, ജാവ തുടങ്ങിയ സ്ഥലങ്ങളിലേക്ക് നീണ്ട കടല് യാത്രകള് നടത്തിയിരുന്നു. അതിന്റെ സ്മരണയ്ക്കായി ഒഡീഷയില് ഇപ്പോഴും ബാലി യാത്ര ആഘോഷിക്കുന്നുണ്ടെന്നും പ്രധാനമന്ത്രി പറഞ്ഞു.
ലോകം വാളിന്റെ ശക്തിയിലൂടെ സാമ്രാജ്യങ്ങള് വികസിപ്പിക്കുമ്പോള് സാമ്രാട്ട് അശോകന് സമാധാനത്തിന്റെ പാതയാണ് തെരഞ്ഞെടുത്തത്. ഭാവി യുദ്ധത്തിലല്ല, ബുദ്ധനിലാണ് എന്ന് ലോകത്തോട് പറയാന് ഈ പാരമ്പര്യം ഇന്ത്യയെ പ്രചോദിപ്പിക്കുമെന്നും നരേന്ദ്ര മോഡി ചൂണ്ടിക്കാട്ടി.
ഇന്ത്യന് പ്രവാസികളെ ഇന്ത്യയുടെ അംബാസഡര്മാരായി താന് എപ്പോഴും കണക്കാക്കിയിട്ടുണ്ടെന്ന് പ്രധാനമന്ത്രി ഊന്നിപ്പറഞ്ഞു. ലോകമെമ്പാടുമുള്ള സഹ ഇന്ത്യക്കാരെ കാണുന്നതിലും അവരുമായി സംസാരിക്കുന്നതിലും സന്തോഷം പ്രകടിപ്പിച്ച അദ്ദേഹം അവരില് നിന്ന് തനിക്ക് ലഭിക്കുന്ന സ്നേഹവും അനുഗ്രഹങ്ങളും മറക്കാനാവാത്തതാണെന്നും എപ്പോഴും തന്നോടൊപ്പം നിലനില്ക്കുമെന്നും പറഞ്ഞു.
ഇന്ത്യന് പ്രവാസികളോട് ഹൃദയംഗമമായ നന്ദി പ്രകടിപ്പിക്കുകയും ആഗോള വേദിയില് അഭിമാനത്തോടെ തലയുയര്ത്തി നില്ക്കാന് അവസരം നല്കിയതിന് അവരോട് നന്ദി പറയുകയും ചെയ്ത മോഡി കഴിഞ്ഞ ദശകത്തില് നിരവധി ലോക നേതാക്കളെ കണ്ടുമുട്ടിയിട്ടുണ്ടെന്നും അവരെല്ലാം ഇന്ത്യന് പ്രവാസികളുടെ സാമൂഹിക മൂല്യങ്ങള്ക്കും അതത് സമൂഹങ്ങള്ക്കുള്ള സംഭാവനകള്ക്കും പ്രശംസിച്ചിട്ടുണ്ടെന്നും എടുത്തുപറഞ്ഞു.
ഇന്ത്യ ജനാധിപത്യത്തിന്റെ മാതാവ് മാത്രമല്ല, ജനാധിപത്യം ഇന്ത്യന് ജീവിതത്തിന്റെ അവിഭാജ്യ ഘടകമാണ്- പ്രധാനമന്ത്രി പറഞ്ഞു. ഇന്ത്യക്കാര് സ്വാഭാവികമായും വൈവിധ്യത്തെ സ്വീകരിക്കുകയും അവര് ചേരുന്ന സമൂഹങ്ങളില് തടസ്സമില്ലാതെ സംയോജിപ്പിക്കുകയും പ്രാദേശിക നിയമങ്ങളെയും പാരമ്പര്യങ്ങളെയും ബഹുമാനിക്കുകയും ചെയ്യുന്നുവെന്ന് അദ്ദേഹം ചൂണ്ടിക്കാട്ടി. ഇന്ത്യക്കാര് അവരുടെ ആതിഥേയ രാജ്യങ്ങളെ സത്യസന്ധതയോടെ സേവിക്കുകയും അവരുടെ വളര്ച്ചയ്ക്കും സമൃദ്ധിക്കും സംഭാവന നല്കുകയും ഇന്ത്യയെ എപ്പോഴും അവരുടെ ഹൃദയത്തോട് ചേര്ത്തുനിര്ത്തുകയും ചെയ്യുന്നുവെന്ന് മോഡി അഭിപ്രായപ്പെട്ടു. ഇന്ത്യയുടെ ഓരോ സന്തോഷവും നേട്ടവും അവര് വളരെ ആവേശത്തോടെ ആഘോഷിക്കുന്നുണ്ടെന്നും അദ്ദേഹം കൂട്ടിച്ചേര്ത്തു.
വെറും 10 വര്ഷത്തിനുള്ളില് ഇന്ത്യ 250 ദശലക്ഷം ആളുകളെ ദാരിദ്ര്യത്തില് നിന്ന് മോചിപ്പിച്ചതായും ലോകത്തിലെ പത്താമത് വലിയ സമ്പദ്വ്യവസ്ഥയില് നിന്ന് അഞ്ചാമത്തെ വലിയ സമ്പദ്വ്യവസ്ഥയിലേക്ക് ഉയര്ന്നതായും പ്രധാനമന്ത്രി അഭിപ്രായപ്പെട്ടു. ഇന്ത്യ ഉടന് തന്നെ മൂന്നാമത്തെ വലിയ സമ്പദ്വ്യവസ്ഥയായി മാറുമെന്ന് അദ്ദേഹം ആത്മവിശ്വാസം പ്രകടിപ്പിച്ചു.
ചന്ദ്രയാന് ദൗത്യം ശിവശക്തി പോയിന്റിലെത്തുന്നത്, ഡിജിറ്റല് ഇന്ത്യയുടെ ശക്തിയെ ആഗോളതലത്തില് അംഗീകരിക്കുന്നത് തുടങ്ങിയ ഇന്ത്യയുടെ നേട്ടങ്ങള് ഊന്നിപ്പറഞ്ഞ മോഡി ഇന്ത്യയിലെ എല്ലാ മേഖലകളും പുനരുപയോഗ ഊര്ജ്ജം, വ്യോമയാനം, ഇലക്ട്രിക് മൊബിലിറ്റി, മെട്രോ നെറ്റ്വര്ക്കുകള്, ബുള്ളറ്റ് ട്രെയിന് പദ്ധതികള് എന്നിവയില് റെക്കോര്ഡുകള് തകര്ത്തുകൊണ്ട് പുതിയ ഉയരങ്ങളിലേക്ക് മുന്നേറുകയാണെന്ന് വിശദമാക്കി. ഇന്ത്യ ഇപ്പോള് ‘ഇന്ത്യയില് നിര്മ്മിച്ച’ യുദ്ധവിമാനങ്ങളും ഗതാഗത വിമാനങ്ങളും നിര്മ്മിക്കുന്നുണ്ടെന്ന് അദ്ദേഹം എടുത്തുപറഞ്ഞു. ‘ഇന്ത്യയില് നിര്മ്മിച്ച’ വിമാനങ്ങളില് പ്രവാസി ഭാരതീയ ദിവസിനായി ആളുകള് ഇന്ത്യയിലേക്ക് യാത്ര ചെയ്യുന്ന ഒരു ഭാവി അദ്ദേഹം വിഭാവനം ചെയ്തു.
പ്രവാസി ഭാരതീയ ദിവസില് മുഖ്യാതിഥിയായി ട്രിനിഡാഡ് ആന്റ് ടൊബാഗോ റിപ്പബ്ലിക്ക് പ്രസിഡന്റ് ക്രിസ്റ്റീന് കാര്ല കംഗലു ഓണ്ലൈനായി പങ്കെടുത്തു.
എഴുപത് രാജ്യങ്ങളില് നിന്ന് മൂവായിരത്തോളം പ്രതിനിധികളാണ് സമ്മേളനത്തില് പങ്കെടുക്കാന് ഒഡീഷയിലെത്തിയത്. നാളെ രാഷ്ട്രപതി ദ്രൗപതി മുര്മു സമാപന സമ്മേളനം ഉദ്ഘാടനം ചെയ്യും. സമാപന സമ്മേളനത്തില് പ്രവാസി ഭാരതീയ സമ്മാന് പുരസ്ക്കാരങ്ങള് വിതരണം ചെയ്യും.
സമ്മേളന നഗരിയില് നോര്ക്കയുടെ കഴിഞ്ഞ വര്ഷത്തെ പ്രവര്ത്തനങ്ങളുടേയും നേട്ടങ്ങളുടേയും അച്ചീവ്മെന്റ് കലണ്ടര് പുറത്തിറക്കി. നോര്ക്ക വൈസ് ചെയര്മാന് എം എ യൂസഫലി മസ്ക്കത്തിലെ ഇന്ത്യന് എംബസി ഓണറി കോണ്സുലാര് ഡോ. സാനതന് നല്കിയാണ് പ്രകാശനം നിര്വഹിച്ചത്.
