ദോഹ: ഷെങ്കന് വിസ അപേക്ഷിക്കുന്നതില് ഏറ്റവും കൂടുതലുള്ളവരുടെ പട്ടികയില് ഖത്തറിന് മൂന്നാം സ്ഥാനം. 2022-ല് വിസ അപേക്ഷകളില് ശ്രദ്ധേയമായ കുതിച്ചുചാട്ടത്തിനാണ് ഖത്തര് സാക്ഷ്യം വഹിച്ചത്.
കൊസോവോ, ഖത്തര്, കുവൈത്ത് എന്നീ രാജ്യങ്ങളാണ് ഷെങ്കന് വിസ അപേക്ഷിക്കുന്നതില് ശ്രദ്ധേയമായത്. ഈ രാജ്യങ്ങളിലുള്ളവരാണ് പ്രതിശീര്ഷ വിസ അപേക്ഷകള് ഏറ്റവും കൂടുതല് സമര്പ്പിച്ചതെന്ന് കണക്കുകള് വെളിപ്പെടുത്തുന്നു.
കൊസോവോയിലെ ഓരോ ഒരുലക്ഷം പേരിലും 6,891 പേരാണ് വിസയ്ക്ക് അപേക്ഷിക്കുന്നത്. കുവൈത്തില് 3,426 പേരും ഖത്തറില് 2,939 പേരുമെന്നതാണ് കണക്ക്.
ഏകീകൃത വിസയ്ക്ക് അപേക്ഷിക്കുന്ന ഖത്തറികള് 79,859 ആണെന്നും മള്ട്ടിപ്പിള് എന്ട്രി വിസയ്ക്ക് അപേക്ഷിക്കുന്നവരില് 53,870 പേര് ഉണ്ടെന്നും ഷെങ്കന് സ്ഥിതിവിവരക്കണക്കുകള് രേഖപ്പെടുത്തിയിട്ടുണ്ട്. ഖത്തറിലെ ഏകദേശം മൂന്ന് ദശലക്ഷം ജനസംഖ്യയുടെ 2.9 ശതമാനം ഷെങ്കന് വിസയ്ക്ക് അപേക്ഷിച്ചു.
മള്ട്ടിപ്പിള് എന്ട്രി വിസകളില് ഖത്തറിന് 98.9 ശതമാനം വിഹിതമുണ്ടെന്നും സ്ഥിതിവിവരക്കണക്കുകള് കാണിക്കുന്നു. അതേസമയം ഇഷ്യൂ ചെയ്യാത്ത യൂണിഫോം വിസകള് 11.1 ശതമാനം ആണെന്ന് റിപ്പോര്ട്ട് ചെയ്തു. ഖത്തറിലെ ഓരോ 100,000 പേരില് 325 പേര്ക്കും ഷെങ്കന് വിസ നല്കിയിട്ടില്ല.
90/180 ദിവസത്തെ നിയമം ലംഘിക്കുന്നില്ലെങ്കില് മള്ട്ടിപ്പിള് എന്ട്രി വിസ അതിന്റെ ഉടമയെ എത്ര തവണ വേണമെങ്കിലും ഷെങ്കന് ഏരിയയില് നിന്ന് അകത്തേക്കും പുറത്തേക്കും പോകാന് അനുവദിക്കുന്നു.
പ്രതിശീര്ഷ ഷെങ്കന് വിസ അപേക്ഷകളുള്ള ആദ്യ 10 രാജ്യങ്ങളുടെ പട്ടികയില് ഖത്തറിന് പിന്നില് സ്ഥാനം പിടിച്ച മറ്റ് ഏഴ് രാജ്യങ്ങള് കാപ്പോ വെര്ഡെ (2,935), സുരിനാം (2,726), അര്മേനിയ (2,232), യു എ ഇ (1,966), ലെബനന് (1,853), ടുണീഷ്യ (1,351), ബഹ്റൈന് (1,307) എന്നിവയാണ്.
മൊത്തം അപേക്ഷകളുടെ എണ്ണത്തില് 79,859 അപേക്ഷകളുമായി ഖത്തര് 24-ാം സ്ഥാനത്തും കുവൈത്ത് 14-ാം സ്ഥാനത്തുമാണ്. മൊത്തം അപേക്ഷകളുടെ പട്ടികയില് തുര്ക്കി, ദക്ഷിണാഫ്രിക്ക, ഇന്ത്യ എന്നീ രാജ്യങ്ങളാണ് ഒന്നാം സ്ഥാനത്തുള്ളത്.
