ന്യൂയോര്ക്ക്: ഗാസയിലെ മാനുഷിക വിരാമത്തിന് പിന്നില് അമീര് ശൈഖ് തമീം ബിന് ഹമദ് അല് താനിയുടെ മാര്ഗനിര്ദേശവും വ്യക്തിപരമായ ശ്രദ്ധയും അശ്രാന്തമായ നയതന്ത്ര ശ്രമങ്ങളും നടന്നതായി പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിന് അബ്ദുല് റഹ്മാന് ബിന് ജാസിം അല്താനി പറഞ്ഞു. ന്യൂയോര്ക്കിലെ യു എന് ആസ്ഥാനത്ത് നടന്ന യു എന് സുരക്ഷാ കൗണ്സില് ബ്രീഫിംഗില് സംസാരിക്കുകയായിരുന്നു അദ്ദേഹം.
ഈജിപ്ത് പ്രസിഡന്റ് അബ്ദുല് ഫത്താഹ് എല്-സിസിയും യു എസ് പ്രസിഡന്റ് ജോ ബൈഡനും ഖത്തര് അമീറും പ്രതിനിധികളും നടത്തിയ ചര്ച്ചയില് കഴിഞ്ഞയാഴ്ച നാല് ദിവസത്തെ മാനുഷിക താത്ക്കാലിക വിരാമ ഉടമ്പടിയില് കലാശിച്ചു. പിന്നീട് ഇത് മറ്റൊരു കരാറിന് ശേഷം രണ്ട് ദിവസത്തേക്ക് നീട്ടുകയും 90ലധികം പേരെ മോചിപ്പിക്കുകയും ചെയ്തു. ഗാസ മുനമ്പിലെ സിവിലിയന് സ്ത്രീകളും കുട്ടികളും ബന്ദികളാക്കപ്പെട്ടവരും ഇസ്രായേല് ജയിലുകളില് തടവിലാക്കപ്പെട്ട 210 ഫലസ്തീന് സ്ത്രീകളും കുട്ടികളും മോചിപ്പിക്കപ്പെടുകയും ഗാസ മുനമ്പിലേക്ക് കൂടുതല് ദുരിതാശ്വാസ സഹായങ്ങള് ലഭ്യമാവുകയും ചെയ്യുന്നതിലേക്ക് ഇത് സഹായകരമായി.
ഗാസ മുനമ്പിലെ ഫലസ്തീന് ജനത ഏഴ് വിനാശകരമായ ആഴ്ചകളെയാണ് അഭിമൂഖീകരിച്ചതെന്ന് പ്രധാനമന്ത്രി ചൂണ്ടിക്കാട്ടി. അതിന്റെ അപകടകരമായ വശങ്ങളെയും അനന്തരഫലങ്ങളെയും കുറിച്ചും അതില് ഉള്പ്പെട്ട അന്താരാഷ്ട്ര മാനുഷിക നിയമങ്ങളുടെ ഗുരുതരമായ ലംഘനങ്ങളെക്കുറിച്ചും സുരക്ഷാ കൗണ്സിലിന് ബോധ്യമുണ്ടായിരുന്നുവെന്നും അദ്ദേഹം പറഞ്ഞു.
തുടക്കം മുതല് പ്രാദേശിക, അന്തര്ദേശീയ പങ്കാളികളുമായും ഐക്യരാഷ്ട്രസഭയുമായും അടുത്ത് ആശയവിനിമയം നടത്താന് ഖത്തര് ഭരണകൂടം വേഗത്തില് ശ്രമിച്ചിരുന്നതായി അദ്ദേഹം വിശദീകരിച്ചു. അറബ്, ഇസ്ലാമിക രാജ്യങ്ങളിലെ ഭരണാധികാരികളുമായി ഏകോപിപ്പിച്ച് പ്രവര്ത്തിക്കുകയും സംഘര്ഷങ്ങള് പരിഹരിക്കുന്നതിനുള്ള നയതന്ത്രത്തിന്റെയും സമാധാനപരമായ ശ്രമങ്ങളുടെയും പ്രാധാന്യത്തിലുള്ള വിശ്വാസത്തെ അടിസ്ഥാനമാക്കി തടവുകാരെ മോചിപ്പിക്കുകയും അടിയന്തര സഹായം എത്തിക്കുകയും ചെയ്യുന്നു.
സമഗ്രവും സുസ്ഥിരവുമായ ഒരു കരാര് കൈവരിക്കാന് കഴിയുമെന്ന പ്രതീക്ഷ പ്രകടിപ്പിച്ച പ്രധാനമന്ത്രി യുദ്ധവും രക്തച്ചൊരിച്ചിലും അവസാനിപ്പിക്കുകയും ഗൗരവമേറിയ ചര്ച്ചകളിലേക്കും രാഷ്ട്രീയ പ്രക്രിയയുടെ തുടക്കത്തിലേക്കും സംഭവങ്ങള് നയിക്കുന്നതായും പറഞ്ഞു. ഫലസ്തീന് ജനതയ്ക്ക് സമഗ്രവും ശാശ്വതവും നീതിയുക്തവുമായ സമാധാനത്തിലേക്കും അന്താരാഷ്ട്ര നിയമസാധുത പ്രമേയങ്ങള്ക്കനുസൃതമായി അവരുടെ നിയമാനുസൃതമായ അവകാശങ്ങളിലേക്കാണ് കാര്യങ്ങള് ശാക്തീകരിക്കപ്പെടേണ്ടതെന്നും അദ്ദേഹം പറഞ്ഞു.
അന്താരാഷ്ട്ര നിയമം അനുസരിക്കാനും അടിയന്തര സന്ധികള്ക്കും ആഹ്വാനം ചെയ്യുന്നത് ഉള്പ്പെടുന്ന ശരിയായ ദിശയിലേക്കുള്ള ആദ്യപടിയായി പ്രമേയം അംഗീകരിക്കുന്നതിലേക്ക് നയിച്ച കൗണ്സില് അംഗങ്ങളുടെ ശ്രമങ്ങളെയും അദ്ദേഹം അഭിനന്ദിച്ചു. ദീര്ഘകാലത്തേക്കുള്ള മാനുഷിക ഇടനാഴികള്, ബന്ദികളെ മോചിപ്പിക്കുക, സാധാരണക്കാര്ക്ക് അടിസ്ഥാന സേവനങ്ങള് നഷ്ടപ്പെടുത്തുന്നതില് നിന്ന് വിട്ടുനില്ക്കുക, സ്ഥിരമായ വെടിനിര്ത്തല് ആവശ്യപ്പെടുന്നതിനും മതിയായ മാനുഷിക സഹായത്തിന്റെ ഒഴുക്ക് ഉറപ്പാക്കുന്നതിനും കൗണ്സിലിന്റെ അധിക നടപടികള് ആവശ്യമാണെന്ന് ഖത്തര് അഭിലാഷം പ്രകടിപ്പിച്ചു.
ഗാസ മുനമ്പില് ഉടനീളം ആവശ്യമുള്ള എല്ലാവര്ക്കും തടസ്സമില്ലാത്ത പ്രവേശനം ഉറപ്പാക്കുക, ക്രോസിംഗുകളിലും ഫ്രണ്ട് ലൈനുകളിലും നിരീക്ഷിക്കുന്നതിനുള്ള സംവിധാനം സ്ഥാപിക്കുക, അന്താരാഷ്ട്ര മാനുഷിക നിയമത്തിന് കീഴിലുള്ള ബാധ്യതകള് പാലിക്കാന് അധിനിവേശ ശക്തിയോട് ആവശ്യപ്പെടുക എന്നിവ ഉള്പ്പെടെ ആവശ്യപ്പെട്ടു.
ഒരു കക്ഷിക്കും മുന്ഗണന നല്കാതെ അന്താരാഷ്ട്ര നിയമം ന്യായമായും വസ്തുനിഷ്ഠമായും നടപ്പാക്കുന്നത് കാണാന് ഖത്തര് ആഗ്രഹിക്കുന്നുവെന്ന് അദ്ദേഹം പറഞ്ഞു. സിവിലിയന്മാര്ക്കെതിരെ ഇസ്രായേല് അധിനിവേശം നടത്തുന്ന കുറ്റകൃത്യങ്ങളും അതിക്രമങ്ങളും അഭിസംബോധന ചെയ്യുന്നതില് അന്താരാഷ്ട്ര സമൂഹത്തിന്റെ മൗനവും ഇരട്ടത്താപ്പും തുടരുകയാണ്. അന്താരാഷ്ട്ര സംവിധാനത്തിലും അതിന്റെ സംഘടനകളിലും ഉള്ള വിശ്വാസത്തെ ദുര്ബലപ്പെടുത്തുന്ന മാനവികതയ്ക്കെതിരായ കളങ്കമാണിതെന്നും ഖത്തര് വിശദമാക്കി.
അറബ് രാജ്യങ്ങള് യുദ്ധത്തിനല്ല സമാധാനത്തിനാണ് ആവശ്യപ്പെടുന്നതെന്നും അറബ് രാജ്യങ്ങളെ കുറിച്ച് കള്ളം പറയുന്നതിന് പകരം ഇസ്രായേല് അംഗീകരിച്ച സമാധാന ഉടമ്പടിയുടെ നിര്ണായക വിഷയത്തില് ശ്രദ്ധ കേന്ദ്രീകരിക്കുന്നതാണ് നല്ലതെന്നും അദ്ദേഹം പറഞ്ഞു.
അന്താരാഷ്ട്ര നിയമസാധുത പ്രമേയങ്ങളായ അറബ് സമാധാനത്തിന് അനുസൃതമായി ഫലസ്തീന് പ്രശ്നത്തിന് സമഗ്രവും നീതിപൂര്വകവും ശാശ്വതവുമായ ഒത്തുതീര്പ്പില്ലാതെ മേഖലയില് സമാധാനം ഉണ്ടാകില്ലെന്ന് ഊന്നിപ്പറയേണ്ടത് യുദ്ധാനന്തര കാലഘട്ടത്തെക്കുറിച്ച് ചര്ച്ച ചെയ്യുമ്പോള് പ്രധാനമാണെന്ന് അദ്ദേഹം പറഞ്ഞു. കിഴക്കന് ജറുസലേമിനെ തലസ്ഥാനമാക്കി 1967-ലെ അതിര്ത്തിയില് സ്വതന്ത്ര ഫലസ്തീനിയന് രാഷ്ട്രവുമായി ദ്വിരാഷ്ട്ര പരിഹാരത്തിന്റെ അടിസ്ഥാനത്തിലാണ് ഫലസ്തീന് ജനതയ്ക്ക് അവരുടെ എല്ലാ അവകാശങ്ങളും ലഭിക്കുകയെന്നും പ്രധാനമന്ത്രി പറഞ്ഞു.
