കെയ്‌റോ: ഖത്തറിലെ സര്‍ക്കാര്‍ ഉടമസ്ഥതയിലുള്ള റിയല്‍ എസ്റ്റേറ്റ് സ്ഥാപനം ഈജിപ്തില്‍ 3.5 ബില്യണ്‍ ഡോളറിന്റെ നിക്ഷേപം നടത്തുമെന്ന് റിപ്പോര്‍ട്ട്. വിശ്വസനീയ വൃത്തങ്ങളില്‍ നിന്ന് ലഭിച്ച റിപ്പോര്‍ട്ട് പ്രകാരം ഉത്തരാഫ്രിക്കന്‍ സമ്പദ്വ്യവസ്ഥയെ പിന്തുണയ്ക്കുന്ന ഗള്‍ഫ് രാജ്യങ്ങളുടെ ഏറ്റവും പുതിയ നീക്കമാണിത്.
ഖത്തറിന്റെ സോവറിന്‍ വെല്‍ത്ത് ഫണ്ടിന് കീഴിലുള്ള യൂണിറ്റായ ഖത്തര്‍ ഡിയാര്‍ ഈജിപ്തിന്റെ മെഡിറ്ററേനിയന്‍ തീരപ്രദേശത്ത് നടത്തുന്ന വലിയ പദ്ധതിയുമായി ബന്ധപ്പെട്ട നിക്ഷേപ പ്രഖ്യാപനം വ്യാഴാഴ്ച നടത്തുമെന്നാണ് വിവരം.
നിക്ഷേപത്തിന്റെ പ്രധാന ഉദ്ദേശം വിനോദസഞ്ചാര മേഖലയുടെ വികസനവും മറ്റു റിയല്‍ എസ്റ്റേറ്റ് പദ്ധതികളുടെയും ഗോള്‍ഫ് കോഴ്‌സുകളുടെയും നിര്‍മ്മാണവുമാണ്. പ്രാദേശികവും അന്താരാഷ്ട്രവുമായ സന്ദര്‍ശകരെ ആകര്‍ഷിക്കാനാണ് പദ്ധതി ലക്ഷ്യമിടുന്നത്.
കമ്പനി ഏകദേശം 26 ബില്യണ്‍ ഡോളറിന്റെ ഇന്‍-കൈന്‍ഡ് നിക്ഷേപവും പ്രഖ്യാപിക്കും. ഈ പദ്ധതി ഈജിപ്തിന്റെ വടക്കന്‍ തീരപ്രദേശമായ ആലം അല്‍ റൂം മേഖലയിലെ 7.2 കിലോമീറ്റര്‍ വിസ്തൃതിയില്‍ നടപ്പിലാകും.
കഴിഞ്ഞ വര്‍ഷാരംഭത്തില്‍ യു എ ഇയും അന്താരാഷ്ട്ര നാണയനിധിയും (ഐ എം എഫ്) ചേര്‍ന്ന് പ്രഖ്യാപിച്ച 57 ബില്യണ്‍ ഡോളറിന്റെ സഹായ പാക്കേജിന് പിന്നാലെ ഈജിപ്തില്‍ വന്‍തോതിലുള്ള വിദേശ നിക്ഷേപങ്ങള്‍ തുടര്‍ച്ചയായി എത്തുകയാണ്. അതിലൂടെയാണ് മദ്ധ്യപൂര്‍വ്വേഷ്യയിലെ ഏറ്റവും ജനസാന്ദ്രതയുള്ള രാജ്യമായ ഈജിപ്ത് കഴിഞ്ഞ വര്‍ഷങ്ങളിലെ ഏറ്റവും ഗുരുതരമായ സാമ്പത്തിക പ്രതിസന്ധി മറികടക്കാന്‍ ശ്രമിക്കുന്നത്.
വാര്‍ത്ത പുറത്തുവന്നതോടെ ഈജിപ്തിന്റെ ഡോളര്‍ ബോണ്ടുകളുടെ മൂല്യം വര്‍ധിച്ചു. ഫെബ്രുവരി 2061 നോട്ടിന്റെ വില ഡോളറിന് മേല്‍ ഒരു സെന്റിലധികം ഉയര്‍ന്നതോടെ അതിന്റെ യീല്‍ഡ് ഏകദേശം 12 ബേസിസ് പോയിന്റ് താഴ്ന്ന് 9.26 ശതമാനമായി.
യു എ ഇയുടെ 35 ബില്യണ്‍ ഡോളറിന്റെ വന്‍ നിക്ഷേപവും മെഡിറ്ററേനിയന്‍ തീരത്തുള്ള റാസ് എല്‍ ഹെക്മ പ്രദേശത്തെ വികസനത്തിനായി സമാനമായ ധാരണാപത്രത്തിലൂടെയാണ് നടപ്പിലാക്കിയത്.
കഴിഞ്ഞ രണ്ട് വര്‍ഷമായി തുടരുന്ന വിദേശനാണയ ക്ഷാമം കുറയുന്നതിനാല്‍ ഈജിപ്ത് കൂടുതല്‍ വന്‍തോതിലുള്ള നേരിട്ടുള്ള വിദേശ നിക്ഷേപങ്ങള്‍ ആകര്‍ഷിക്കുന്നതിനും സ്വകാര്യ മേഖലയെ ശക്തിപ്പെടുത്തുന്നതിനുമുള്ള നടപടികള്‍ മുന്നോട്ട് കൊണ്ടുപോകുകയാണ്. ഈ രണ്ടും 8 ബില്യണ്‍ ഡോളറിന്റെ വിപുലമായ ഐ എം എഫ് കരാറിന്റെ പ്രധാന ഘടകങ്ങളാണ്.
