സിംഗപ്പൂര്: പശ്ചിമേഷ്യയിലെ എണ്ണവിതരണത്തെക്കുറിച്ചുള്ള ആശങ്കകള് ശക്തമായതോടെ ഏഷ്യന് വിപണിയില് വെള്ളിയാഴ്ച എണ്ണവില ഉയര്ന്നു. അമേരിക്കയും ഇറാനും തമ്മിലുള്ള സംഘര്ഷവും പുതിയ ഏറ്റുമുട്ടലുകളും രൂക്ഷമായ സാഹചര്യത്തില് എണ്ണ വിതരണത്തിന് തടസ്സമുണ്ടാകുമെന്ന ആശങ്കയാണ് വിലവര്ധനയ്ക്ക് കാരണമായത്.
ബ്രെന്റ് ക്രൂഡ് ഫ്യൂച്ചേഴ്സ് വില ബാരലിന് 0.15 ഡോളര് അഥവാ 0.2 ശതമാനം ഉയര്ന്ന് 95.67 ഡോളറിലെത്തി. യു എസ് വെസ്റ്റ് ടെക്സസ് ഇന്റര്മീഡിയറ്റ് ക്രൂഡ് വില 0.26 ഡോളര് അഥവാ 0.3 ശതമാനം വര്ധിച്ച് ബാരലിന് 91.56 ഡോളറായി.
ആഴ്ച അടിസ്ഥാനത്തില് ബ്രെന്റ് ക്രൂഡ് വിലയില് 7.1 ശതമാനവും യു എസ് ക്രൂഡ് വിലയില് 9.8 ശതമാനവും വര്ധന രേഖപ്പെടുത്തി. ജൂലൈ 20ന് അവസാനിച്ച ആഴ്ചയ്ക്കുശേഷമുള്ള ഏറ്റവും വലിയ പ്രതിവാര നേട്ടത്തിലേക്കാണ് ഇരു ബെഞ്ച്മാര്ക്ക് എണ്ണവിലകളും നീങ്ങുന്നത്.
അതേസമയം, റഷ്യ- യുക്രെയ്ന് യുദ്ധം അവസാനിപ്പിക്കുന്നതിനുള്ള ഒരു കരാറിലെത്താന് ഇപ്പോഴും സാധ്യതയുണ്ടെന്ന് റഷ്യന് പ്രസിഡന്റ് വ്ളാദിമിര് പുടിന് വ്യക്തമാക്കിയതിനെ തുടര്ന്ന് എണ്ണവില നേട്ടത്തിന്റെ ഒരു ഭാഗം നഷ്ടപ്പെട്ടു. സമാധാനപരമായ പരിഹാരത്തിന് അമേരിക്കയും ചൈനയും പിന്തുണ നല്കാന് തയ്യാറാണെന്നും അദ്ദേഹം പറഞ്ഞു.
