അഡലെയ്ഡ്: ഓസ്‌ട്രേലിയന്‍ തദ്ദേശീയ ഇഴജന്തുക്കളെ സോക്‌സുകളിലും ഷൂസുകളിലും ബൂട്ടുകളിലും ഒളിപ്പിച്ച് ഹോങ്കോങ്ങിലേക്കും ചൈനയിലേക്കും കടത്താന്‍ ശ്രമിച്ച ചൈനീസ് പൗരനെതിരെ കേസ്. 163 പാമ്പുകളെയും പല്ലികളെയും ഉള്‍പ്പെടെയുള്ള ഇഴജന്തുക്കളെയാണ് അനധികൃതമായി കടത്താന്‍ ശ്രമിച്ചത്.
വിമാനത്താവളങ്ങളിലെ എക്‌സ്-റേ പരിശോധനയില്‍ പിടിക്കപ്പെടാതിരിക്കാനായി ജീവികളെ വിവിധ വസ്തുക്കള്‍ക്കുള്ളില്‍ ഒളിപ്പിച്ചാണ് തപാല്‍ പാഴ്‌സലുകളായി അയച്ചത്. ഡിസംബര്‍ മുതല്‍ മാര്‍ച്ച് വരെയുള്ള കാലയളവില്‍ ഓസ്‌ട്രേലിയന്‍ നാഷണല്‍ എന്‍വയോണ്‍മെന്റല്‍ പ്രൊട്ടക്ഷന്‍ ഏജന്‍സി (ഇപിഎ) തടഞ്ഞുവെച്ച 38 പാഴ്‌സലുകളിലാണ് ജീവനുള്ള ഇഴജന്തുക്കളെ കണ്ടെത്തിയത്.
ഷിങിള്‍ബാക്ക് പല്ലികള്‍, വിവിധ ഡ്രാഗണ്‍ ഇനങ്ങള്‍, ബ്ലൂ-ടങ് പല്ലികള്‍, ഈസ്റ്റേണ്‍ ഹുഡഡ് സ്‌കെയ്‌ലി-ഫൂട്ട്, കന്നിങ്ഹാംസ് സ്‌കിങ്ക് എന്നിവയാണ് പിടിച്ചെടുത്ത ജീവികളില്‍ ഉള്‍പ്പെട്ടത്.
ജീവികളെ സോക്‌സുകളിലും ഷൂസുകളിലും ബൂട്ടുകളിലും ജീവനോടെ കുത്തിനിറച്ച നിലയിലായിരുന്നു. പ്ലാസ്റ്റിക് പാത്രങ്ങള്‍, കോസ്‌മെറ്റിക് ബാഗുകള്‍, കുട്ടികളുടെ കളിപ്പാട്ടങ്ങള്‍ എന്നിവയും ഒളിപ്പിക്കല്‍ മാര്‍ഗമായി ഉപയോഗിച്ചു.
സംഭവത്തെക്കുറിച്ച് നടത്തിയ അന്വേഷണത്തില്‍ ഇത് രാജ്യാന്തര വന്യജീവി കടത്ത് ശൃംഖലയുടെ ഭാഗമാണെന്ന് അധികൃതര്‍ കണ്ടെത്തി. പ്രാദേശിക ഇഴജന്തു വളര്‍ത്തുകാരനില്‍ നിന്നാണ് ജീവികളെ ശേഖരിച്ചതെന്നാണ് അന്വേഷണത്തിലെ കണ്ടെത്തല്‍.
കടത്തുന്നതിനിടെ ജീവികളെ അത്യന്തം ക്രൂരമായ സാഹചര്യത്തിലാണ് സൂക്ഷിച്ചിരുന്നത്. വളരെ ചെറിയ ഇടങ്ങളില്‍ കെട്ടിയിടുകയും കുത്തിനിറയ്ക്കുകയും ചെയ്തിരുന്നു. ഭക്ഷണം, വെള്ളം, വെളിച്ചം, ആവശ്യമായ വായുസഞ്ചാരം എന്നിവ ലഭിക്കാത്തതിനാല്‍ യാത്രയ്ക്കിടെ ജീവികള്‍ ചാകാനുള്ള സാധ്യതയും കൂടുതലായിരുന്നു.
ഓഗസ്റ്റില്‍ അഡലെയ്ഡിലെ ഒരു ഓസ്‌ട്രേലിയന്‍ ഇഴജന്തു വളര്‍ത്തുകാരന്റെ വീട്ടില്‍ അന്വേഷണ ഉദ്യോഗസ്ഥര്‍ പരിശോധന നടത്തി. രണ്ട് ചത്ത പല്ലികളെയും ആരോഗ്യനില മോശമായ ഒരു ജീവനുള്ള പല്ലിയെയും നിരവധി ഇലക്ട്രോണിക് ഉപകരണങ്ങളെയും ഇവിടെനിന്ന് കണ്ടെത്തി.
ഓസ്‌ട്രേലിയന്‍ തദ്ദേശീയ വന്യജീവികള്‍ക്ക് രാജ്യാന്തര വിപണിയില്‍ വലിയ ആവശ്യകതയുണ്ടെന്ന് നാഷണല്‍ ഇപിഎയുടെ കംപ്ലയന്‍സ് ആന്‍ഡ് എന്‍ഫോഴ്‌സ്‌മെന്റ് വിഭാഗം മേധാവി ഡാനി യാനോപൗലോസ് പറഞ്ഞു. കര്‍ശനമായ കയറ്റുമതി നിയന്ത്രണങ്ങള്‍ നിലനില്‍ക്കുന്നതിനാല്‍ ചില ഇഴജന്തുക്കള്‍ക്ക് കള്ളവിപണിയില്‍ ആയിരക്കണക്കിന് ഡോളര്‍ വരെ വില ലഭിക്കുന്നുണ്ടെന്നും അദ്ദേഹം പറഞ്ഞു.
ഓസ്‌ട്രേലിയയിലെ പരിസ്ഥിതി സംരക്ഷണ ജൈവവൈവിധ്യ സംരക്ഷണ നിയമം 1999 പ്രകാരം നിയന്ത്രിത തദ്ദേശീയ വന്യജീവികളെ അനധികൃതമായി കയറ്റുമതി ചെയ്യുകയോ കൈവശം വയ്ക്കുകയോ ചെയ്താല്‍ ഓരോ കുറ്റത്തിനും 3.30 ലക്ഷം ഓസ്‌ട്രേലിയന്‍ ഡോളര്‍ വരെ പിഴയും 10 വര്‍ഷം വരെ തടവും ലഭിക്കാം.
വിദേശ പൗരന്മാര്‍ക്ക് കുറ്റം തെളിഞ്ഞാല്‍ വിസ റദ്ദാക്കുന്നതിനും രാജ്യത്ത് നിന്ന് നാടുകടത്തുന്നതിനുമുള്ള നടപടികളും നേരിടേണ്ടിവരും.
