ദോഹ: മുംബൈയിലെ വീട്ടില് നടന്ന ആക്രമണ സംഭവത്തിന് മാസങ്ങള്ക്ക് ശേഷം ബോളിവുഡ് നടനും ചലച്ചിത്ര നിര്മ്മാതാവുമായ സെയ്ഫ് അലി ഖാന് ഖത്തറില് റെസിഡന്ഷ്യല് പ്രോപ്പര്ട്ടി വാങ്ങി. സുരക്ഷയ്ക്ക് പ്രാധാന്യം നല്കിയാണ് ഖത്തറില് വീട് വാങ്ങിയതെന്ന് സെയ്ഫ് അലിഖാന് വ്യക്തമാക്കി.
പേള് ഖത്തറിലെ സെന്റ് റെജിസ് മാര്സ അറേബ്യ ദ്വീപിലെ ദി റെസിഡന്സസിനെ എടുത്തുകാണിച്ച് അല്ഫര്ദാന് ഗ്രൂപ്പ് മുംബൈയില് നടത്തിയ വാര്ത്താ സമ്മേളനത്തിലാണ് സെയ്ഫ് അലിഖാന്റെ പുതിയ വീട് വാങ്ങല് പ്രഖ്യാപനം നടത്തിയത്. ദ്വീപിലെ അള്ട്രാ-ആഡംബര ബ്രാന്ഡഡ് റെസിഡന്സുകളില് വിശിഷ്ടനായ പുതിയ ഉടമസ്ഥനെന്നാണ് സെയ്ഫ് അലിഖാനെ പരിചയപ്പെടുത്തിയത്.
സെന്റ് റെജിസ് റെസിഡന്സസില് നിക്ഷേപിക്കാനും ഖത്തറിനെ തന്റെ രണ്ടാമത്തെ വീടാക്കി മാറ്റാനുമുള്ള തീരുമാനത്തെക്കുറിച്ച് സെയ്ഫ് അലി ഖാന് സംസാരിച്ചു. നിരവധി യാത്രകള് ചെയ്യുകയും ആഡംബരത്തെ വിലമതിക്കുകയും ചെയ്യുന്ന ഒരാളെന്ന നിലയില് ഖത്തറിലെ സെന്റ് റെജിസ് റെസിഡന്സസ് ശരിയായ തെരഞ്ഞെടുപ്പാണെന്ന് തോന്നിയെന്നും അതൊരു വീട് മാത്രമല്ല ജീവിതശൈലി ലക്ഷ്യസ്ഥാനമാണെന്നും അദ്ദേഹം പറഞ്ഞു. ലോകത്തിന്റെ പല ഭാഗങ്ങളും സന്ദര്ശിച്ചിട്ടുണ്ടെങ്കിലും ഖത്തര് സവിശേഷമായ സമാധാനവും സുരക്ഷയും, പരിഷ്കൃതമായ ആധുനിക ജീവിതവും വാഗ്ദാനം ചെയ്യുന്നുവെന്നും അദ്ദേഹം പറഞ്ഞു. ഇന്ത്യയുമായുള്ള ഖത്തറിന്റെ സാമീപ്യം തനിക്കും കുടുംബത്തിനും അനുയോജ്യമായ സ്ഥലമാക്കി മാറ്റുന്നുവെന്നും അദ്ദേഹം പറഞ്ഞു.
‘ഒരു ദ്വീപിനുള്ളില് ഒരു ദ്വീപ് എന്ന ആശയം വളരെ ആഡംബരപൂര്ണ്ണവും മനോഹരവുമാണ്. അത് ജീവിക്കാന് വളരെ മനോഹരമായ ഒരു സ്ഥലമാണ്. നിങ്ങള് അവിടെ ആയിരിക്കുമ്പോള് ലഭിക്കുന്ന വികാരമാണ് പ്രധാന കാര്യം, കാഴ്ചകള്, ഭക്ഷണം, ജീവിതശൈലി, ജീവിതത്തിന്റെ വേഗത എന്നിവയാണ് എന്റെ തീരുമാനത്തിലേക്ക് നയിച്ച ചില കാര്യങ്ങള്’- അദ്ദേഹം പറഞ്ഞു.
ദോഹയിലെ ഒരു ചിത്രീകരണത്തിനിടെ പ്രസ്തുത സ്ഥലത്ത് താമസിച്ചതിനെക്കുറിച്ചും അദ്ദേഹം പരാമര്ശിച്ചു. ‘അത് അതിശയകരമാണെന്ന് ഞാന് കരുതി, സ്വകാര്യതയും ആഡംബരവും കൂടിച്ചേര്ന്ന എന്തോ ഒന്ന് എനിക്ക് ശരിക്കും ഇഷ്ടപ്പെട്ടു. ഭക്ഷണം പോലുള്ള കാര്യങ്ങളും മെനു ക്യൂറേറ്റ് ചെയ്ത രീതിയും ഇതുപോലുള്ള വിവിധ കാര്യങ്ങളുമായിരുന്നു അത്. ചുരുക്കത്തില്, വീട്ടില് നിന്ന് അകലെയുള്ളതുപോലെ തോന്നിയില്ല. അതിനാല് അത് വളരെ എളുപ്പമാക്കി,’ നടന് പറഞ്ഞു.
