കോട്ടയം: മയക്കു മരുന്നിനെതിരെ ശബ്ദമുയര്ത്തി ലഹരിക്കെതിരെ പോരാട്ടം തന്നെ നടത്തുന്ന സിനിമയാണ് ഉദയം കാത്ത്. പദ്മ കൃഷ്ണന് അയ്യര് സംവിധാനം ചെയ്യുകയും ജോസ് കുടിലില് ( കുറുപ്പന്തറ) നിര്മ്മിക്കുകയും ചെയ്ത ഈ സിനിമ പ്രദര്ശനത്തിന് തയ്യാറാകുന്നു.
പൈതൃകം നിറഞ്ഞ ഒരു ഗ്രാമത്തിലേക്ക് എവിടെ നിന്നോ നടന്നു വന്ന ഒരു അനാഥ സ്ത്രീ. ഭ്രാന്തി കുഞ്ഞമ്മ എന്നാണ് അവരെ ആ ഗ്രാമം മുഴുവനും ഇപ്പോള് വിളിക്കുന്നത്. എങ്ങിനെ അവര് അനാഥ യായി….? എങ്ങിനെ അവര് ഭ്രാന്തിയായി….? എന്നിങ്ങനെയുള്ള ചോദ്യങ്ങള്ക്കു ഉത്തരം നല്കുന്നത് ഈ സിനിമയാണ്.
തെരുവ് ഗായകനായ പപ്പന് എപ്പോഴോ ഒരു കഞ്ചാവ് കച്ചവടക്കാരന്റെ സഹായിയായി ജീവിതം തുടങ്ങിയിരുന്നു. ഇന്നിപ്പോള് ആധുനിക ലഹരി മാഫിയയുടെ പിടിയില് അകപ്പെട്ടു പോയിരിക്കുകയാണ് ആ ഗ്രാമം. ഫിറോസ് എന്ന് പേരുള്ള ശക്തനായ ഒരു ചെറുപ്പക്കാരന്റെ വരവോടെ ആ ഗ്രാമത്തില് ചിലതൊക്കെ സംഭവിച്ചു. ആ കഥയാണ് ‘ഉദയം കാത്ത്’ എന്ന സിനിമയിലൂടെ സംവിധായകന് പറയുന്നത്.
നിര്മ്മാതാവ് ജോസ് കുടിലില് അമേരിക്കന് മലയാളിയാണ്. പുറം രാജ്യത്ത് ജീവിക്കുമ്പോഴും മയക്കുമരുന്നിന്റെ ഉപയോഗം മൂലം ചില കുടുംബം തകര്ന്നു പോകുന്ന അനുഭവങ്ങള് ഇദ്ദേഹം നേരില് കണ്ടിട്ടുണ്ടെന്നും സമൂഹം ഇനിയെങ്കിലും ഈ ദുരന്തങ്ങളില് നിന്നും കര കയറണമെന്ന് ആഗ്രഹിച്ചിട്ടും കൂടിയാണ് ഇത്തരമൊരു പ്രമേയം സിനിമയാക്കാന് തീരുമാനിച്ചതെന്നും നിര്മ്മാതാവ് പറയുകയുണ്ടായി.
ജോസ് കെ എബ്രഹാം, ഹരിലാല്, സതീഷ് കല്ലും കുളം, ജോസുകുട്ടി, ജോര്ജ് കുടിലില്, മോസ്സസ് തോമസ്, ജിഷ്ണു, ദീപ്തി ദേവ്, ബിന്ദു കെ ജയന്, ഡീയോള് മാലി, സുനിത, കോട്ടയം പൊന്നു തുടങ്ങിയവരാണ് പ്രധാന അഭിനേതാക്കള്.
ക്യാമറ- നൗഫസ് നൗഷാദ്, സംഗീതം- സി രാജി, ശിവ പ്രസാദ്, അനുരാജ്, ഗാനങ്ങള്- ക്ഷേമ തോമസ്, രമേശ് മുവാറ്റുപുഴ, ബാനു വിക്രമന് നായര്, എഡിറ്റിങ്- ജിബീഷ് ടീം മീഡിയ, ബാനര് ഒഫീഷ്യല് ഗാര്ഡിയന്സ്.
സിനിമയുടെ സെന്സറിങ് കഴിഞ്ഞു. യു എ സര്ട്ടിഫിക്കറ്റ് ആണ് ലഭിച്ചിട്ടുള്ളതെന്നു സംവിധായകന് പറഞ്ഞു. ഒക്ടോബറില് ചിത്രം റിലീസ് ചെയ്യത്തക്ക വിധത്തില് അണിയറ ജോലികള് പുരോഗമിക്കുന്നു.
