ദോഹ: ലോകത്തെ ഏറ്റവും വലിയ സാങ്കേതിക സമ്മേളനമായ വെബ് ഉച്ചകോടി 2024 മാര്‍ച്ചില്‍ ഖത്തറില്‍ നടത്തുമെന്ന് കമ്മ്യൂണിക്കേഷന്‍സ് ആന്‍ഡ് ഇന്‍ഫര്‍മേഷന്‍ ടെക്നോളജി മന്ത്രാലയം (എം സി ഐ ടി) അറിയിച്ചു. ദോഹയില്‍ നടക്കുന്ന വെബ് ഉച്ചകോടി ആയിരക്കണക്കിന് അന്താരാഷ്ട്ര സംരംഭകരെയും നിക്ഷേപകരെയും ഒരുമിച്ച് കൊണ്ടുവരുന്ന മെന മേഖലയില്‍ ഇത്തരത്തിലുള്ള ആദ്യത്തേതാണ്.
അടുത്ത അഞ്ച് വര്‍ഷത്തിനുള്ളില്‍ യൂറോപ്പ്, വടക്കേ അമേരിക്ക, തെക്കേ അമേരിക്ക, ഏഷ്യ എന്നിവിടങ്ങളില്‍ സ്ഥാപിതമായ സാന്നിധ്യത്തിന് പുറമെ മിഡില്‍ ഈസ്റ്റ്, ആഫ്രിക്ക, ഇന്ത്യ എന്നിവിടങ്ങളില്‍ വളരുന്ന ആവാസവ്യവസ്ഥയില്‍ ടെക് ലോകത്തെ ബന്ധിപ്പിക്കുന്നതിന് വെബ് ഉച്ചകോടി ഖത്തര്‍ പുതിയ അവസരങ്ങള്‍ നല്‍കും.
അതിവേഗം വികസിച്ചുകൊണ്ടിരിക്കുന്ന സ്റ്റാര്‍ട്ടപ്പ് രംഗം, സ്വകാര്യ മേഖല, സാങ്കേതിക നവീകരണത്തിനുള്ള സര്‍ക്കാര്‍ പിന്തുണ എന്നിവയ്ക്കൊപ്പം അതിവേഗം വളരുന്ന സാങ്കേതിക ആവാസവ്യവസ്ഥയാണ് ഖത്തറിനുള്ളത്. വേള്‍ഡ് ഇക്കണോമിക് ഫോറത്തിന്റെ ഗ്ലോബല്‍ കോംപറ്റിറ്റീവ്‌നസ് റിപ്പോര്‍ട്ട് 2021 പ്രകാരം മേഖലയിലെ മറ്റ് രാജ്യങ്ങളെ പിന്തള്ളി നവീകരണത്തിനുള്ള ശേഷിയില്‍ ആഗോളതലത്തില്‍ 28-ാം സ്ഥാനത്താണ് ഖത്തര്‍. ആര്‍ട്ടിഫിഷ്യല്‍ ഇന്റലിജന്‍സ്, ബ്ലോക്ക്‌ചെയിന്‍, സൈബര്‍ സുരക്ഷ തുടങ്ങിയ വളര്‍ന്നുവരുന്ന സാങ്കേതികവിദ്യകളില്‍ ശ്രദ്ധ കേന്ദ്രീകരിച്ച് ടെക്നോളജി ഇന്‍ഫ്രാസ്ട്രക്ചറിലും രാജ്യം വന്‍തോതില്‍ നിക്ഷേപം നടത്തുന്നു.
