ദോഹ: ഖത്തര് മ്യൂസിയം ചെയര്പേഴ്സണ് ശൈഖ അല് മയാസ ബിന്ത് ഹമദ് അല് താനി മ്യൂസിയം ഓഫ് ഇസ്ലാമിക് ആര്ട്ടില് ഉസ്ബെക്കിസ്ഥാന്റെ സംസ്കാരവും പൈതൃകവും പരിചയപ്പെടുത്തുന്ന രണ്ട് പ്രദര്ശനങ്ങള് ഉദ്ഘാടനം ചെയ്തു.
‘ഉസ്ബെക്കിസ്ഥാന്: ഹെറിറ്റേജ് ഇന് മോഷന്’ എന്ന പ്രദര്ശനം നവംബര് 28 വരെയും ‘എക്തഷിഫ്: ഉസ്ബെക്കിസ്ഥാന്’ നവംബര് 24 വരെയും തുടരും. ഖത്തറും ഉസ്ബെക്കിസ്ഥാനും തമ്മിലുള്ള സാംസ്കാരിക കൈമാറ്റം ശക്തിപ്പെടുത്തുന്നതിന്റെയും ഉസ്ബെക്കിസ്ഥാന്റെ സമ്പന്നമായ സാംസ്കാരിക പൈതൃകം ജനങ്ങള്ക്ക് പരിചയപ്പെടുത്തുന്നതിന്റെയും ഭാഗമായാണ് പ്രദര്ശനങ്ങള് സംഘടിപ്പിച്ചിരിക്കുന്നത്.
ഉസ്ബെക്കിസ്ഥാന്റെ സംസ്കാരം, കലാരൂപങ്ങള്, ആചാരങ്ങള്, പാരമ്പര്യങ്ങള് എന്നിവയുടെ വിവിധ വശങ്ങള് അടുത്തറിയാന് സന്ദര്ശകര്ക്ക് അവസരമൊരുക്കുന്നതാണ് രണ്ട് പ്രദര്ശനങ്ങളും. വിവിധ നാഗരികതകളുമായുള്ള ദീര്ഘകാല ഇടപെടലുകളിലൂടെ രൂപപ്പെട്ട ഉസ്ബെക്ക് സാംസ്കാരിക സ്വത്വത്തിന്റെ വൈവിധ്യമാര്ന്ന മുഖങ്ങളും പ്രദര്ശനങ്ങളില് അവതരിപ്പിക്കുന്നു. തലമുറകളിലൂടെ കൈമാറിപ്പോന്ന ജീവിതരീതികളും സര്ഗാത്മക പാരമ്പര്യങ്ങളും വ്യക്തമാക്കുന്ന നിരവധി വസ്തുക്കളും കലാസൃഷ്ടികളും പ്രദര്ശനത്തിലുണ്ട്.
ചരിത്രത്തിലുടനീളം ഉസ്ബെക്കിസ്ഥാന്റെ ഭൂമിശാസ്ത്രപരമായ പ്രദേശം വിവിധ സംസ്കാരങ്ങളുടെയും ആശയങ്ങളുടെയും സംഗമഭൂമിയായിരുന്നുവെന്ന് മ്യൂസിയം ഓഫ് ഇസ്ലാമിക് ആര്ട്ട് ഡയറക്ടര് ശൈഖ അല് നസ്ര് ഖത്തര് ന്യൂസ് ഏജന്സിയോട് പറഞ്ഞു.
വിജ്ഞാനത്തിന്റെയും പഠനത്തിന്റെയും പ്രധാന കേന്ദ്രമായിരുന്ന ഉസ്ബെക്കിസ്ഥാന് ഇബ്ന് സീന, അല് ഖ്വാരിസ്മി, ഇമാം അല് ബുഖാരി തുടങ്ങിയ പ്രമുഖ പണ്ഡിതന്മാരുടെയും ചിന്തകരുടെയും നാടായിരുന്നുവെന്നും അവര് വ്യക്തമാക്കി.
എട്ടാം നൂറ്റാണ്ട് മുതല് ഇന്നത്തെ കാലഘട്ടം വരെയുള്ള ഉസ്ബെക്കിസ്ഥാന്റെ സമ്പന്നമായ ചരിത്രത്തിന്റെ വിവിധ ഘട്ടങ്ങളാണ് രണ്ട് പ്രദര്ശനങ്ങളിലൂടെയും അവതരിപ്പിക്കുന്നതെന്ന് ശൈഖ അല് നസ്ര് പറഞ്ഞു.
‘ഉസ്ബെക്കിസ്ഥാന്: ഹെറിറ്റേജ് ഇന് മോഷന്’ പ്രദര്ശനത്തില് ഉസ്ബെക്കിസ്ഥാനിലെ 13 മ്യൂസിയങ്ങളില് നിന്നുള്ള ദേശീയ ശേഖരത്തിലെ 140 വസ്തുക്കളാണ് ഉള്പ്പെടുത്തിയിരിക്കുന്നത്. രാജ്യത്തിന്റെ ചരിത്രത്തിലെ സുപ്രധാന ഘട്ടങ്ങളും സാംസ്കാരിക- നാഗരിക പൈതൃകവും സന്ദര്ശകര്ക്ക് മനസ്സിലാക്കാന് ഇത് സഹായിക്കും.
അതേസമയം, ‘എക്തഷിഫ്: ഉസ്ബെക്കിസ്ഥാന്’ വ്യത്യസ്തമായൊരു സാംസ്കാരിക അനുഭവമാണ് നല്കുന്നത്. ഏഴ് ഖത്തര് കലാകാരന്മാര് ഉസ്ബെക്കിസ്ഥാനിലെ വിവിധ നഗരങ്ങള് സന്ദര്ശിച്ച് അവിടുത്തെ ചരിത്രസ്മാരകങ്ങളും പ്രാദേശിക ജീവിതവും സംസ്കാരവും നേരിട്ട് മനസ്സിലാക്കിയ യാത്രയുടെ അനുഭവങ്ങളില്നിന്നാണ് ഈ പ്രദര്ശനം രൂപം കൊണ്ടത്. യാത്രയില്നിന്ന് ലഭിച്ച പ്രചോദനം കലാകാരന്മാര് വിവിധ കലാസൃഷ്ടികളായി ആവിഷ്കരിച്ചിരിക്കുകയാണ്.
ഖത്തറും ഉസ്ബെക്കിസ്ഥാനും തമ്മില് വളര്ന്നുവരുന്ന സാംസ്കാരിക ബന്ധത്തിന്റെ പ്രതിഫലനമാണ് ‘ഉസ്ബെക്കിസ്ഥാന്: ഹെറിറ്റേജ് ഇന് മോഷന്’. നാല് വിഭാഗങ്ങളിലായി ഒരുക്കിയിരിക്കുന്ന പ്രദര്ശനത്തില് ചരിത്രപരവും സമകാലികവുമായ കലാസൃഷ്ടികള്, വസ്ത്രങ്ങള്, സന്ദര്ശകര്ക്ക് നേരിട്ടുള്ള അനുഭവം നല്കുന്ന ഇന്സ്റ്റലേഷനുകള് എന്നിവ ഉള്പ്പെടുത്തിയിട്ടുണ്ട്. നൂറ്റാണ്ടുകളായി തുടരുന്ന കലാ- ബൗദ്ധിക കൈമാറ്റത്തിന്റെ ചരിത്രത്തിലൂടെയാണ് പ്രദര്ശനം സന്ദര്ശകരെ നയിക്കുന്നത്.
കല, വാസ്തുവിദ്യ, കരകൗശലം എന്നിവയില് ഇന്നും നിലനില്ക്കുന്ന ഉസ്ബെക്ക് കലാപാരമ്പര്യത്തിന്റെ സ്വാധീനവും പ്രദര്ശനം അടയാളപ്പെടുത്തുന്നു.
താഷ്കന്റ്, സമര്ഖന്ദ്, ബുഖാറ എന്നീ ചരിത്രനഗരങ്ങളിലേക്കുള്ള പഠനയാത്രകളില്നിന്ന് പ്രചോദനം ഉള്ക്കൊണ്ട് ഖത്തര് കലാകാരന്മാര് ഒരുക്കിയ പുതിയ കലാസൃഷ്ടികളാണ് ‘എക്തഷിഫ്: ഉസ്ബെക്കിസ്ഥാന്’ പ്രദര്ശനത്തിന്റെ പ്രധാന ആകര്ഷണം. ഖത്തറും ഉസ്ബെക്കിസ്ഥാനും തമ്മിലുള്ള സാംസ്കാരിക സംവാദത്തിന് പുതിയൊരു തലവും ഈ പ്രദര്ശനം നല്കുന്നു.
തിമൂറിദ് കാലഘട്ടത്തിലെ വാസ്തുവിദ്യാ സവിശേഷതകള്, ജ്യാമിതീയ രൂപത്തിലുള്ള ഇഷ്ടിക നിര്മാണശൈലി, സെറാമിക് നിര്മാണ പാരമ്പര്യം, ഇക്കത്ത് വസ്ത്രനിര്മാണം, തലമുറകളിലൂടെ കൈമാറപ്പെട്ട പരമ്പരാഗത കരകൗശല രീതികള് എന്നിവയാണ് കലാസൃഷ്ടികളിലൂടെ പ്രധാനമായും അവതരിപ്പിക്കുന്നത്. ഉസ്ബെക്കിസ്ഥാനില് ഇന്നും സജീവമായി തുടരുന്ന പരമ്പരാഗത കലാ- കരകൗശല പാരമ്പര്യങ്ങളിലേക്കും പ്രദര്ശനം ശ്രദ്ധ ക്ഷണിക്കുന്നു.
ആയിഷ അല് മുഹന്നദി, അബ്ദുല്ല അല് ഫഖ്റൂ, ലിന അല് അലി, മറിയം അബേല്, അമീന അല് ബൊയ്നിന്, ദി നൂറ, ഹമീദ് അല് ഖഹ്താനി എന്നിവരാണ് പ്രദര്ശനത്തില് പങ്കെടുക്കുന്ന ഏഴ് ഖത്തര് കലാകാരന്മാര്.
വ്യത്യസ്ത കലാശൈലികളും വൈവിധ്യമാര്ന്ന മാധ്യമങ്ങളും ഉപയോഗിച്ച് ഒരുക്കിയിരിക്കുന്ന സൃഷ്ടികളിലൂടെ ഉസ്ബെക്കിസ്ഥാന്റെ ചരിത്രത്തെയും സംസ്കാരത്തെയും ഏഴ് വ്യത്യസ്ത കാഴ്ചപ്പാടുകളില്നിന്ന് അടുത്തറിയാന് പ്രേക്ഷകര്ക്ക് അവസരം ലഭിക്കും.
