ദോഹ: ”കുടുംബം ഒരു രാഷ്ട്രത്തിന്റെ നിധി” എന്ന മുദ്രാവാക്യവുമായി സാമൂഹിക വികസന കുടുംബ മന്ത്രാലയം (എം എസ് ഡി എഫ്) സംഘടിപ്പിക്കുന്ന അന്താരാഷ്ട്ര കുടുംബ വര്ഷത്തെക്കുറിച്ച് തിങ്കളാഴ്ച ബോധവത്ക്കരണം നടത്തും.
ബോധവത്ക്കരണ കാമ്പെയ്ന് ബാക്ക്-ടു-സ്കൂള് സീസണുമായി ചേര്ന്നു പ്രവര്ത്തിക്കും. കൂടാതെ പുണ്യത്തെ പ്രോത്സാഹിപ്പിക്കുന്നതിനുള്ള സംരംഭത്തിന്റെ ഭാഗമായി കുടുംബ ഐക്യവും അനുകമ്പയും വര്ധിപ്പിക്കുന്നതിന് ലക്ഷ്യമിട്ടുള്ള വിവിധ പ്രവര്ത്തനങ്ങളും ഉള്പ്പെടും.
ആഭ്യന്തര മന്ത്രാലയം, വിദ്യാഭ്യാസ ഉന്നത വിദ്യാഭ്യാസ മന്ത്രാലയം, ഫാമിലി കണ്സള്ട്ടിംഗ് സെന്റര് എന്നിവയുള്പ്പെടെ എം എസ് ഡി എഫിനോടൊപ്പം നിരവധി സ്ഥാപനങ്ങള് ഈ കാമ്പെയ്നില് ഉള്പ്പെടും.
രക്ഷിതാക്കളെയും സ്കൂള് വിദ്യാര്ഥികളെയും ലക്ഷ്യം വച്ചുള്ള കാമ്പെയ്ന് കുടുംബ ഐക്യം പ്രോത്സാഹിപ്പിക്കുന്നതിനും ദേശീയ സ്ഥാപനങ്ങളുടെ പരസ്പര സഹകരണം വര്ധിപ്പിക്കുന്നതിനും കുടുംബത്തിലും സമൂഹത്തിലും നല്ല സ്വാധീനം ചെലുത്തുന്നതിനാല് അനുകമ്പ ഉള്പ്പെടെ ചില മൂല്യങ്ങള് ശക്തിപ്പെടുത്താനും ശ്രമിക്കുന്നു.
സ്കൂള് പ്രിന്സിപ്പല്മാര്ക്കും വിദ്യാര്ഥികള്ക്കും കാമ്പെയ്നിന്റെ ലക്ഷ്യങ്ങള് അറിയിക്കുന്നതിനും കുടുംബാംഗങ്ങള്ക്കിടയില് അനുകമ്പയുടെ മൂല്യം ഉയര്ത്തിക്കാട്ടുന്നതിനും വിദ്യാര്ഥികളില് അത് വളര്ത്തുന്നതിന്റെ പ്രാധാന്യം ഊന്നിപ്പറയുന്നതിനുമായി യോഗം നടത്തും. കുടുംബ യൂണിറ്റിന്റെ പ്രാധാന്യം, കുടുംബ ഐക്യത്തിന്റെ പ്രാധാന്യം, മതപരവും ധാര്മ്മികവുമായ മൂല്യങ്ങള് ശക്തിപ്പെടുത്തുക, കുടുംബ വെല്ലുവിളികളെ അഭിമുഖീകരിക്കുന്നതിനുള്ള അനുകമ്പയുള്ള സമീപനം പ്രോത്സാഹിപ്പിക്കുക എന്നിവയും യോഗം ചര്ച്ച ചെയ്യും.
കുടുംബ ഐക്യത്തിനായുള്ള ശ്രമങ്ങള് ഏകീകരിക്കാനും ഊര്ജിതമാക്കാനുമാണ് അന്താരാഷ്ട്ര കുടുംബ ബോധവത്ക്കരണ കാമ്പയിന് ലക്ഷ്യമിടുന്നതെന്ന് എം എസ് ഡി എഫ് കുടുംബ വികസന വകുപ്പ് ഡയറക്ടര് ദാബിയ അല് മുഖ്ബാലി പറഞ്ഞു.
യുവതലമുറയില് സദ്ഗുണം വളര്ത്തിയെടുക്കുന്നതിലും ധാര്മ്മിക മൂല്യങ്ങളും പാരമ്പര്യങ്ങളും തുടര്ച്ചയായ വിദ്യാഭ്യാസത്തിലൂടെയും മാര്ഗ്ഗനിര്ദ്ദേശത്തിലൂടെയും ഒരു തലമുറയില് നിന്ന് അടുത്തതിലേക്ക് കൈമാറുന്നതില് കുടുംബത്തിന്റെയും വിദ്യാഭ്യാസ സ്ഥാപനങ്ങളുടെയും സുപ്രധാന പങ്ക് അല് മുഖ്ബാലി ഊന്നിപ്പറഞ്ഞു.
