റമല്ല: സെപ്റ്റംബറില്‍ നടക്കാനിരിക്കുന്ന ഐക്യരാഷ്ട്രസഭയുടെ പൊതുസഭാ യോഗങ്ങളില്‍ പങ്കെടുക്കാന്‍ നിശ്ചയിച്ചിരിക്കുന്ന ഫലസ്തീന്‍ പ്രതിനിധി സംഘത്തിന് വിസ അനുവദിക്കാത്ത യു എസ് സ്റ്റേറ്റ് ഡിപ്പാര്‍ട്ട്മെന്റിന്റെ തീരുമാനത്തില്‍ ഫലസ്തീന്‍ പ്രസിഡന്‍സി ഖേദവും അത്ഭുതവും പ്രകടിപ്പിച്ചു.
ഫലസ്തീന്‍ രാഷ്ട്രം ഐക്യരാഷ്ട്രസഭയുടെ നിരീക്ഷക അംഗമായതിനാല്‍ പ്രത്യേകിച്ച് അന്താരാഷ്ട്ര നിയമത്തിനും യു എന്‍ ആസ്ഥാന കരാറിനും ഈ തീരുമാനം വ്യക്തമായ വിരുദ്ധമാണെന്ന് പ്രസിഡന്‍സി പ്രസ്താവനയില്‍ ഊന്നിപ്പറഞ്ഞു.
ഫലസ്തീന്‍ പ്രസിഡന്റ് മഹ്മൂദ് അബ്ബാസ് യു എസ് പ്രസിഡന്റ് ഡൊണാള്‍ഡ് ട്രംപ് ഉള്‍പ്പെടെയുള്ള ലോക നേതാക്കള്‍ക്ക് അയച്ച കത്തുകളില്‍ വ്യക്തമാക്കിയതുപോലെ അന്താരാഷ്ട്ര നിയമത്തോടും യു എന്‍ പ്രമേയങ്ങളോടും സമാധാനത്തോടുള്ള കടമകളോടും ഫലസ്തീനിന്റെ പൂര്‍ണ്ണ പ്രതിബദ്ധത വീണ്ടും ഉറപ്പിച്ചുകൊണ്ട് തീരുമാനം പുനഃപരിശോധിക്കാനും പിന്‍വലിക്കാനും യു എസ് ഭരണകൂടത്തോട് ആവശ്യപ്പെട്ടു.
