അബുദാബി: ഗള്‍ഫ് സഹകരണ കൗണ്‍സില്‍ (ജി സി സി) രാജ്യങ്ങള്‍ നിര്‍ദ്ദിഷ്ട സമയക്രമം അനുസരിച്ച് ഗള്‍ഫ് റെയില്‍വേ പദ്ധതി പൂര്‍ത്തിയാക്കാനുള്ള ശ്രമങ്ങള്‍ തുടരുകയാണെന്നും 2030 ഡിസംബര്‍ പൂര്‍ത്തീകരണത്തിനുള്ള അവസാന തിയ്യതിയാണെന്നും ഗള്‍ഫ് റെയില്‍വേ അതോറിറ്റി അറിയിച്ചു.
ആറ് ജി സി സി രാജ്യങ്ങളെയും ഏകദേശം 2,117 കിലോമീറ്റര്‍ ദൈര്‍ഘ്യമുള്ള ഒരു ശൃംഖലയിലൂടെ ബന്ധിപ്പിക്കുന്ന തന്ത്രപരമായ പദ്ധതികളില്‍ ഒന്നാണ് റെയില്‍വേ പദ്ധതിയെന്ന് അബുദാബിയില്‍ ചൊവ്വാഴ്ച ആരംഭിച്ച ഗ്ലോബല്‍ റെയില്‍ 2025 എക്‌സിബിഷന്റെയും കോണ്‍ഗ്രസിന്റെയും രണ്ടാം പതിപ്പിനോടനുബന്ധിച്ച് നടത്തിയ പ്രസ്താവനയില്‍ ഗള്‍ഫ് റെയില്‍വേ അതോറിറ്റി ഡയറക്ടര്‍ ജനറല്‍ എഞ്ചിനീയര്‍ മുഹമ്മദ് ബിന്‍ ഫഹദ് അല്‍ ഷബ്രാമി പറഞ്ഞു.
ഗള്‍ഫ് പദ്ധതി ഓരോ രാജ്യത്തിനും ഉള്ളിലെ ദേശീയ പദ്ധതികളുമായി സംയോജിപ്പിച്ച് പ്രാദേശിക ഗതാഗത സംവിധാനത്തിന്റെ നിര്‍ണായക ഭാഗമായി മാറുന്നതിനാല്‍ ജി സി സി രാജ്യങ്ങളും വിശാലമായ മേഖലയും തമ്മിലുള്ള ബന്ധം മെച്ചപ്പെടുത്തുന്നതിനാല്‍ ലിങ്കേജ് ഘട്ടങ്ങള്‍ പൂര്‍ത്തിയാക്കുന്നതിന് ജി സി സി രാജ്യങ്ങള്‍ നിലവില്‍ സംയോജിത രീതിയില്‍ പ്രവര്‍ത്തിക്കുന്നുണ്ടെന്ന് അദ്ദേഹം അഭിപ്രായപ്പെട്ടു.
ജി സി സി രാജ്യങ്ങളിലെ തുറമുഖങ്ങളുമായും ലോജിസ്റ്റിക്‌സ് കേന്ദ്രങ്ങളുമായും പദ്ധതി ബന്ധിപ്പിക്കുമെന്നും ഇത് ചരക്കുകളുടെ നീക്കം വര്‍ധിപ്പിച്ച് അംഗരാജ്യങ്ങള്‍ക്കിടയിലുള്ള ആളുകളുടെ ഒഴുക്ക് വര്‍ധിപ്പിച്ച് സമ്പദ്വ്യവസ്ഥയില്‍ ഗുണപരമായ സ്വാധീനം ചെലുത്തുമെന്നും അദ്ദേഹം ചൂണ്ടിക്കാട്ടി.
പാസഞ്ചര്‍ ട്രെയിനുകള്‍ മണിക്കൂറില്‍ 200 കിലോമീറ്ററില്‍ കൂടുതല്‍ വേഗതയില്‍ സര്‍വീസ് നടത്തുമെന്നും ചരക്ക് ട്രെയിനുകള്‍ മണിക്കൂറില്‍ 80 മുതല്‍ 120 കിലോമീറ്റര്‍ വരെ വേഗതയില്‍ സര്‍വീസ് നടത്തുമെന്നും ഇത് ഗതാഗത സംവിധാനത്തിന്റെ കാര്യക്ഷമത വര്‍ധിപ്പിക്കുന്നതിനും മേഖലയിലെ സുസ്ഥിര വികസനം പ്രോത്സാഹിപ്പിക്കുന്നതിനും കാരണമാകുമെന്നും അദ്ദേഹം കൂട്ടിച്ചേര്‍ത്തു.
